1Baꞌasugo, m baꞌabiise, more sumalisim ne Zugsob la ni. Li pu daam man ye m lem sob bun kan yela yaꞌase, bozugo li ane suŋir tisi ya.

2Guꞌusimi ya meŋ ne nimbeꞌednam la, bane tum tuumbeꞌed la, laꞌam ne bane kpenꞌesid nidib baŋo la, ka paꞌan ye ba ane Winaꞌam nidib la. 3Ka tiname baŋo kpenꞌeb la paꞌal ye ti sid puꞌusid Winaꞌam ne o Siig Suŋ paŋ, ka nweꞌed nyoꞌog Yesu Kiristo ni. Ti pu tie ninsaali niŋid siꞌel yela. 4Hale baa m meŋi naani moren suekane na keen ka m nweꞌ nyoꞌog ne saalib yela laa.

Soꞌ yaꞌa tenꞌes ye o mor suekane na ke ka o nweꞌ nyoꞌog ne saalib niŋire, mane lee gat. 5Ban n duꞌa man daba anii daar ka ba kpenꞌesi m baŋo. Mane a Israel nid, Benjamin doog buudi ka a Hibiru nid yelmeŋir, ka Jew dim wada la dolisug yela ka m a Farisee nid. 6Ka li yaꞌa ane nimmua yela m da namisid Winaꞌam nidib bane niŋ Yesu yadda. Ka popielim line a wada siakir la yela la, m daa kaꞌ gbaꞌaree.

7Ka yelbane wusa ka m naani nokin ka li da aa m nyood la, ka Kiristo yela, ka m noki li ka li a zaalim. 8Asida, m tenꞌes ye siꞌel mekama ane zaalim. Ka Yesu Kiristo baŋir yela a suꞌum gati li wusa. On yela ka m lu siꞌel mekama ni ka noki li ka li a saꞌad, ye Kiristo lee na a m nyood, 9ne mam be o saꞌan la. M pu lem mor popielim line a m meŋ din ne, line a wada suer dolim. M yuꞌun mor ne popielim line yi Yesu Kiristo yadda niŋirin ka a Winaꞌam din line ka ti diꞌed ne yadda niŋir. 10Ka bood ye m baŋ o ne o kuꞌum vuꞌugir la paŋ, ka laꞌam namis ne o ka wenne o ne o kumin, 11ye daasiꞌere m na tunꞌe nye kuꞌum vuꞌugir.

12Li kaꞌane ye m pun deŋim nye piini la bee lieb suꞌum naae, amaa m nyidigid ye m gbanꞌe piinkane yela ka Yesu Kiristo gaŋi m la. 13M baꞌabiise m pu tenꞌes ye m nyaŋe li nanne. Lin ka m nyidigid la ane ye m tam nyaꞌaŋ bun ka lee mood ye m paam line be tuon la. 14M zotne hale ye m paae naar la ben, ye m di piini la. Ka piini la ane ye Winaꞌam buoli man arazana ni ka li yi Yesu Kiristo ni na.

15Keli ka tinam bane yadda biꞌ la mor potenꞌer kan men, ka soꞌ yaꞌa mor potenꞌer siꞌa, Winaꞌam na nie li ka ya baŋ. 16Keli ka ti gbanꞌe line ka ti deŋim siak la kiŋ kiŋ.

17M baꞌabiise, laꞌamini taaba tuꞌasi mam tuuma, ka kpansimi bane beilim tuꞌasi ti beilim a siꞌem la. 18M deŋim yeli ya noor bedego, ka lem yeti ya ne nintoꞌom ye nidib bedego be ka a dataas ne Yesu Kiristo dapuudir la yela. 19Ba baꞌasug ane saꞌuŋ, ka ba niŋgbiŋ boodim aa ba Winaꞌam. Ba nokid line a nyan la, n nweꞌedi ba nyoꞌog, ka ba yaꞌam kpenꞌed ne line a dunia bun maꞌaa. 20Ka tiname a arazana nidib la, zinꞌikan ka ti guri ti faangid Yesu Kiristo yiib na la. 21One na tiakedi ti taduŋ niŋgbiŋ ka li wen wuu o niŋgbiŋ line venl pilpil la. O na niŋ ala ne o paŋ kane ket ka o nyaŋ ka soꞌe siꞌel mekama la.