1“M yeli ya neꞌenam wusa ye ya da yi yadda la ni. 2Ba na kadi ya yiis laꞌasug doodin, ka saŋa la sid kenna ka soꞌ yaꞌa ku ya, o na tenꞌes ye o tum line ka Winaꞌam bood. 3Ban ziꞌ m Baꞌ ne m meŋ la zug, ka ba na niŋ neꞌenam. 4Ka m yeli ya neꞌenam ye li saŋa la yaꞌa paae ya na tenr ye m daa yeli ya li yela.

“M pu yeli ya neꞌenam pinꞌiluginee, mam da be ya saꞌan la zug, 5amaa nannanna m ken one tum m la saꞌan, ka ya soꞌ pu buꞌosi m ye, fu waꞌae yaa nii? 6Ka mam yeli ya neꞌeŋa la zug ka ya sunya saꞌam bedego. 7Ka laꞌam ne wala li ane sida ka m yeti ya ye, li ane ya suꞌum zug ka m ye m yi kpela, ka m yaꞌa pu keŋe, Suŋid la ku kenn ya ni naa. 8Amaa o yaꞌa kena o na nie paꞌal dunia nidibi yidig tuumbeꞌed yela siꞌem ne ban yidig popielim yela siꞌem ne ban yidig saria kadib yela siꞌem la. 9Ba yidig tuumbeꞌed yela, bozugo ba pu niŋ man yadda. 10Ba yidig popielim yela, bozugo man kenne m Baꞌ Winaꞌam saꞌan ka ba ku nyee man la zug. 11Ba yidig saria kadib yela, bozugo Winaꞌam moŋ dunia nwa naꞌab buod siꞌem la zug.

12“M mor yela bedego na pianꞌa tisi ya amaa ya ku nyaŋe baŋi li nannanna. 13Ka one a yelmeŋir Siig la yaꞌa kena, o na suŋi ya ka ya baŋ yelsida la wusa; ka o ku pianꞌ ne o meŋ yela, amaa o na pianꞌ lin ka o wum la, ka me na paꞌani ya yel bane na ti kena. 14O na zunꞌe man yuꞌur; ka zaŋ man yela n yeli ya. 15M Baꞌ la soꞌe siꞌel wusa la ane man din. Linzug ka m yel ye, o na zaŋ man yela n yeli ya la.”

16Ka Yesu yel ye, “Li kpelim saŋa biꞌela ka ya ku lem nyee ma, ka li na niŋ biꞌela yaꞌas ka ya na nyee m.”

17Ka nyaꞌandolib sieba yet taaba ye, “On yet ye li kpelim saŋa biꞌela ka ti ku nyee o, ka li na niŋ biꞌela yaꞌas ka ti na nyee o la, ka lem ye, m kenne m Baꞌ saꞌan la, li gbin a bo?” 18Ka ba lem ye, “On yet ye, saŋa biꞌela la, li gbin a bo? Ti ziꞌ li gbin ne.”

19Ka Yesu baŋ ye ba bood ye ba buꞌos o li gbin la, ka yeli ba ye, “Ya buꞌosid ne taaba man yel ye, saŋa biꞌela ka ya ku nyee ma, ka saŋa biꞌela yaꞌas ka ya na nyee m la, gbin ne? 20Asida ka m yeti ya ye, ya na kum ka fabin, ka dunia dim sunya lee na malis. Ya sunya na saꞌam, ka ya susaꞌaŋ la na lieb sumalisim. 21Poꞌa yaꞌa saꞌ duꞌam, li zabidne, o saŋa paae la zug, ka o yaꞌa duꞌa naae o sunf malis, on duꞌa biig la zug ka tam zabir la. 22Ala men ya sunya saꞌam nannanna amaa m na lem nyee ya yaꞌas, ka ya na mor sumalisim, ka soꞌ ku ke ka ya sunya lem saꞌam. 23Saŋkan la ka ya ku lem buꞌosi m buꞌosa yaꞌase. Asida ka m yeti ya ye, ya yaꞌa sos siꞌeli m Baꞌ la saꞌan ne man yuꞌur zug, o na tisi ya. 24Ya nan pu sos siꞌel ne man yuꞌur zugo. Sosimi ka ya na diꞌe ka ya sunya na peꞌel ne sumalisim.

25“M pianꞌ neꞌeŋa siilimi ya ne. Amaa saŋa la kenna ka m ku lem pianꞌade ya ne siilise, ka lee na pianꞌade ya m Baꞌ la yela nyain nyain. 26Saŋkan la ka ya na sos Winaꞌam ne man yuꞌur zug, ka m pu yel ye, m na sos o ya yelaa, 27bozugo o meŋi noŋi ya la zug. O noŋi ya, yanam noŋi m ka siak ye m yi ne m Baꞌ la saꞌan na zug. 28M sid naam ne m Baꞌ la ni kenn dunia ni na, ka na lem naam dunia ni n lebi m Baꞌ la saꞌan.”

29Ka o nyaꞌandolib la yel ye, “Eheenn, nannanna fu yuꞌun pianꞌad ne nyain nyain, ka kaꞌ siilima. 30Ka ti yuꞌun baŋ ye fu miꞌ siꞌel wusa, ka li pu nar ye soꞌ buꞌos uf buꞌosa. Neꞌeŋa zug ka ti siak ye fu yine Winaꞌam saꞌan na.”

31Yesu lebisi ba ye, “Ya yuꞌun siaki ya? 32Saŋa la kenna, ka li sid paae ya ka ya na widigi kul soꞌ ne o yir o yir ka basi mane m konꞌo konꞌ, amaa m kaꞌa m konꞌ, m Baꞌ be man saꞌan la zug.

33“M yeli ya neꞌeŋa ye ya mor sumalisim man ni. Dunia kaŋa ni ya mor namisug, amaa more sukpiꞌeuŋ; ka m nyaŋ dunia.”