1Neꞌeŋa gaad la, Yesu da keŋ Jerusalem ka Jew dim maluŋ yinni be. 2Zaŋgoom kane gilig Jerusalem la mor zaꞌanoya, ka yinni be ka ba buon ye Peꞌes Zaꞌanoor. Li baba ka beuŋbil be ka ba buon Betzata ne Jew dim pianꞌad ka maal suga yalima anu be anina. 3Ka banꞌadnam bedego digi ba ni, ka sieba a zunzoos, ka sieba wabis ka sieba a ponda ((ka ba gur kuꞌom la damug saŋa. 4Ka saŋa be ne ka Zugsob malek sig kolugin la dami dam kuꞌom la, ka one mekama sig yiiga on dam naae la o na nye laafe.)) 5Ka dau yinni daa be anina n benꞌ yuma piistanꞌ ne anii. 6Ka Yesu nye o ka baŋ ye o yiti digi anina ka li yuug la, ka yel o ye, “Fu bood ye fu nye laafe?”

7Ka banꞌad la lebis ye, “M Zugsoba, m kaꞌa soꞌ one na zaŋimi sigis kuꞌomin la, kuꞌom damug saŋa laa, ka man ti ye m sig la, ka soꞌ pun deŋim sig sa.”

8Ka Yesu yel o ye, “Duom, zaŋimi fu debir la ka keŋ.” 9Ka aniŋa niŋa ka dau la nye laafe ka noki o debir la ka keŋ.

Daakan da ane Jew dim vuꞌusum daar. 10Linzug ka Jew dim la yel dau la ye, “Zina ane vuꞌusum daar. Ti wada pu nar ye fu ze debire.”

11Ka o lebisi ba ye, “Dau kane tiꞌebi m la yel m ye, zaŋimi fu debir la ka keŋ.”

12Ka ba buꞌos o ye, “Daukan aa anoꞌone n yel uf ye, zaŋimi fu debir ka keŋe?”

13Ka dau kane nye laafe la pu baŋ lin aan soꞌ bozugo Yesu daa toom n kpenꞌ nidib la soogin.

14Ka lin nyaꞌaŋ la ka Yesu nye ponꞌor kane ka o daa tiꞌeb la Winaꞌam puꞌusum yin ka saꞌal o ye, “Gosima, fu nye laafe. Da lem tum tuumbeꞌed yaꞌase ka siꞌel ti niŋ uf ka li a beꞌed n gaad yiigin laa.” 15Ka dau la keŋ yel Jew dim la ye Yesu a one tiꞌeb o la.

16Linzug ke ka Jew dim la da namis Yesu, on da tiꞌeb dau la vuꞌusum daar la. 17Ka Yesu lebis ba ye, “M Baꞌ nam kpelim tum, ka mam me tum.” 18Ka Jew dim la bood hale ye ba ku o, bozugo li kaꞌane vuꞌusum daar wada saꞌuŋ la yela maꞌanee amaa on buon Winaꞌam ye, o Baꞌ, ka zemisid o meŋ ne Winaꞌam.

19Ka Yesu lebisi ba ye, “M yeti ya line a sida ye, Biig la ku nyaŋe niŋ siꞌel ne o meŋ paŋa. O niŋid ne line ka o nye ka o Baꞌ niŋid la maꞌaa. Ka o Baꞌ la niŋid siꞌem la ka o me niŋid. 20Bozugo Baꞌ la noŋ Biig la ka paꞌal o line wusa ka o niŋid. On na paꞌal o tum kada ka li gat bama ka li na lidigi ya. 21Ka wenne Baꞌ la vuꞌugid kum ka tisid nyovur la, ala men ka Biig la tisid bane ka o bood la nyovur. 22Ka Baꞌ la pu kad soꞌ saria amaa o bas saria kadib la tis ne Biig la, 23ye nidib wusa naꞌas o wuu ban naꞌasidi o Baꞌ la siꞌem la. One pu naꞌasid Biig la, me pu naꞌasid o Baꞌ kane tum o la naa.

24“Asida ka m yeti ya neꞌeŋa ye, one niŋi m pianꞌad la yadda ka me niŋ one tumi m la yadda, mor nyovur line kaꞌ naare. Ba ku kad o saria. Ka o yi ne kumin n kpenꞌ nyovurin. 25Asida ka m yeti ya ye saŋa la liꞌelne, li sid miriya, ka bane kpi la na wum Winaꞌam Biig la kukor, ka bane wum la na voe. 26Ka ti Baꞌ Winaꞌam n soꞌe nyovur siꞌem la, ala men ka o ke ka o Biig la me soꞌe nyovur, 27ka tis o paŋ ye o kad saria, on a Ninsaal Biig la zug.

28“Da ke ka li lidigi ya. Saŋa la liꞌeliya ka bane wusa be yaadin na wumi o kukor 29ka yi na. Bane tum suꞌum na vuꞌug kumin ka nye nyovur, amaa bane tum beꞌed na vuꞌug ka Winaꞌam moŋi ba buod.

30“M ku nyaŋe niŋ siꞌel ne m meŋ paŋa. M kat saria ka li dolne mam wum siꞌel Winaꞌam saꞌan la. M bood ye m niŋ ne one tumi m la na boodim ka kaꞌane m meŋ boodim, dinzugo m saria kadib ane yelsida. 31M yaꞌa di m meŋ kaset, li kaꞌ sidaa. 32Amaa soꞌ be n diti m kaset ka m miꞌ ye li ane sida.

33“Ya daa tum soꞌ Joon saꞌan ka o tuꞌas sida la yela n tisi ya. 34Li kaꞌane ye li nar ye saal di kaset tisi ma, amaa m yel neꞌeŋa ye ya nye faangir. 35Joon daa ane wuu fitla line tisid neesim ka ya siak ye ya be neesim la ni ne sumalisim saŋa biꞌela.

36“Kaset line paꞌali m yela la gat line ka Joon di la. Tuumban ka Winaꞌam ke ka m tum la, tuumban ka m sid niŋid la paꞌan ye m Baꞌ Winaꞌam la tumi m na. 37Ka m Baꞌ on tum man na la, o meŋ di kaset n tis man. Ya nam pu wumi o kukore, ka me nam pu nye on a siꞌem, 38ka pu mor o pianꞌad la ya nii, yaname pu niŋ on ka o tum ya ni la yadda la zug. 39Ya tenꞌes ye nyovur kane kaꞌ ben la be Winaꞌam gbauŋin, ka linzug ka ya ied ye ya baŋi li gbin. Gbauŋ la diti m kaset, 40ka laꞌam ne wala ya zanꞌas ka pu keenn m saꞌan na ye ya nye nyovure.

41“M pu bood naꞌasi saalib saꞌanee, 42amaa m miꞌ ya poos ka ya pu mor Winaꞌam noŋir ya sunya nii. 43Mam nokne m Baꞌ yuꞌur n kena, ka ya pu diꞌe ma. Amaa soꞌ yaꞌa nok o meŋ yuꞌur n kena ya na diꞌe o. 44Ya na niŋ wala niŋ Winaꞌam yadda, yanam bane diꞌesid naꞌasi ya taaba ni ka pu bood naꞌasi kane yit Winaꞌam yinni maꞌaa la ni na?

45“Da tenꞌes ye m na noki ya yelbeꞌed keŋ m Baꞌ la saꞌane. Li ane Moses n yeli ya ala, on zug ka ya mor tiꞌir la. 46Ya yaꞌa siakin Moses ya naani siakin man men, on sobi m labaar la zug. 47Ka ya yaꞌa pu siaki o sob la, ya na niŋ wala siaki m pianꞌad la?”