1Kel ka bane a yamis la baŋ ye li nar ka ba naꞌasi ba zugsobnam la suꞌuŋa, ka soꞌ da saꞌam Winaꞌam yuꞌur ne ti paꞌalugo. 2Ka yamis ban ka ba zugsobnam a yadda niŋidib la da zanꞌas ye ba naꞌasi ba, ban a ba baꞌabiis ne taaba la zugo, amaa ba tumi ba boodim suꞌuŋa bozugo bane tuuma ka ba tum la, ane yadda niŋidib ne ban ka ba noŋ.

Paꞌalim ka kpeꞌeŋi ba neꞌenam. 3Soꞌ yaꞌa paꞌan line be li konꞌ, ka pu siak ti Zugsob Yesu Kiristo yelsida pianꞌad line dol Winaꞌam suer laa, 4o mor titaꞌalim, ka lee ziꞌ siꞌe siꞌela, ka mor potenꞌebeꞌed n bood pianꞌayaalis ne noŋgban nwaꞌar, ka me zabid pianꞌad yela, line mor nennim ka pu mor noŋgban yinnii. Ba bood yuꞌusaꞌuŋ ne tenꞌes beꞌed ne 5noŋgban nwaꞌar line yi nimbane mor yaꞌam beꞌed ka pu mor yelsida la, ka tenꞌesid ye Winaꞌam suer dolim ane line na ke ka ba di nyood.

6Li a yelsida ye line malis yaꞌa be soꞌ sunfin, nyood bedego be ne one dol Winaꞌam suer. 7Ka ti pu mor siꞌeli kenn dunia ni naa, ka ti me ku nyaŋe zaŋ siꞌel dunia nwa ni keŋee. 8Ti yaꞌa mor diib ne fuud, lin siaki ti. 9Ka bane bood ye ba a kpanꞌamnam la na kpenꞌ makirin, ka lu sutaana bendigun, line a boodim beꞌed, line saꞌamid nid ka lem taꞌasid o kuꞌum puugin. 10Bozugo ligidi noŋilim ane tuumbeꞌed buudi wusa nyaꞌar. Ninsieba nini muꞌe ne ligidi yela hale ka li ke ka ba yi yadda niŋirin la, ka namisi ba meŋ ne susaꞌaŋ bedego.

11Amaa fun, one a Winaꞌam nid la, zanꞌasim neꞌenam wusa, ka dol Winaꞌam popielim suer la kiŋ kiŋ ne yadda niŋir ne noŋilim ne modigir ne suguru. 12Fu yadda niŋir yela, kpeꞌeŋimi fu meŋ ka nyaŋe gbanꞌe nyovur line kaꞌa naare, line ka Winaꞌam gaŋi tis uf saŋkan ka fu peligi fu poog pianꞌ pianꞌasuŋ nidib bedego tuon la.

13M tis uf nokaŋa Winaꞌam, one tisid siꞌel wusa nyovur la tuon, ne Yesu Kiristo, one daa nie n pianꞌ suꞌuŋa Pontus Pilate tuon la, 14ye fu diꞌe saꞌalug la. Guri li suꞌuŋa ne popielim ka kaꞌ gbaꞌaree, n ti paae Yesu Kiristo ti Zugsob lebig saŋa. 15O lebig la na ane Winaꞌam n ziꞌel saŋa siꞌa la. One a naꞌatitaꞌar yinni la, ka mor yelsum ka a naꞌanam naꞌab ne Zugsobnam Zugsob. 16One maꞌaa soꞌe nyovur ka be line nie nyain galis la ni ka soꞌ ku nyaŋe liꞌel la, ka soꞌ kaeꞌ nye o bee na nyaŋe nye o. Naꞌasi ne paŋ line kaꞌ naar na be o ni. Ami.

17Saꞌalim bane mor kpanꞌam dunia kaŋa nwa ye ba da mor nyeesim, ka da mor tiꞌir ne ba kpanꞌam line ka ba ziꞌ lin na niŋ siꞌem, amaa mor tiꞌir ne Winaꞌam one tisi ti siꞌel wusa line na malisi ti sunya la. 18Saꞌalimi ba ka ba tum tuumsoma, ka ke ka ba tuumsuma aa bedego ka lem bood ye ba tis piini ka a naꞌasi dim. 19Neꞌ a suer kan ka ba na suaꞌ ba meŋ kpanꞌam line a eenb kpiꞌuŋo gur beug sa, ka gbanꞌe nyovur line sid a sida la.

20Timoti, gur line ka ba guꞌul uf la. Luakim pianꞌayood line pu dol Winaꞌam suer ne nogban nwaꞌar, ka sieba gos ka li a ye ba mor baŋir. 21Ka sieba gos ka ban more li, dinzug ka ba yi ba yadda niŋirin.

Winaꞌam na tisi fu yelsum.