1M sobid neꞌeŋa ne ye m yeli ya ligidi kan ka ya laꞌased ye ya suŋ Winaꞌam nidib bane be Juuda teŋin la yela. Doli paꞌalug kan ka m paꞌal Winaꞌam nidib bane be Galatia teŋin la. 2Alasidaar wusa, soꞌ wusa yiisim zemis on tum nye ligid siꞌa digil, ka m yaꞌa ti paa na ligidi laꞌasug ku lem be. 3M yaꞌa ti paa na, m na sob gbauŋ n tum nimbane ka ya meŋ na ti gaŋ la, ka ba more piini la keŋ Jerusalem. 4Ka li yaꞌa lem nar ye m keŋ, ban on doli m, ka ti keŋ.

5M gbanꞌe ye m doli yi Masedonia teŋin, ka lin nyaꞌaŋ m na kena n kaae ya. 6Daasiꞌer m na yuugi ya saꞌan biꞌela bee be ne ya ka waad saŋa ti gaad, ka ya suŋi m ka m gaadi keŋ zinꞌig kan wusa ka m na keŋ. 7M pu bood ye m kaae ya nannanna, li wenne m gaadne ka yina ye m kaae ya. M mor tiꞌir ye m na be ya saꞌan n yuug, Zugsob la yaꞌa maal suer tisi m. 8Amaa m na kpelim be Efesus teŋin n paae Pentekost daar. 9Suer yoꞌog kpela tisi m, ka m na tum Winaꞌam tuuma kane mor nyood, amaa dataas la zuꞌeya.

10Timoti yaꞌa keenn ya saꞌan na, yanam on diꞌem o ka o be ya saꞌan, ka da ke ka o sunf saꞌam. Bozugo o tumne Zugsob la tuuma wenne man tum siꞌem la. 11Soꞌ da neꞌes oo, ka lee suŋimin o, ka o gaadi keŋ ne sumalisim n nyaŋe lebi m saꞌan na. M tenꞌesid ye on ne ti baꞌabiis bama la na leb na.

12Ti baꞌabiig Apollos yela. M kpeꞌeŋid o saŋa wusa ye on ne baꞌabiis bama la kena kaae ya. Ka o kudim pu bood ye o kenn nannanna naa. O yaꞌa paam suer, o na kena.

13Guꞌusimi, ka ziꞌe kiŋ kiŋ ka da bas ya yadda niŋir Winaꞌam nii. More sukpiꞌeuŋ ne paŋ. 14Tumini ya tuuma wusa ne noŋilim.

15Ya miꞌ Stefanas ne o yidim yela, bane deŋi niŋ yadda niŋidib Akaia teŋin yiiga. Ba zaŋi ba meŋ n tumi tisid Winaꞌam nidib. 16M belimi ya ne, ke ka ya beilim wenne nimbama, ne ya tumtum taaba wusa ne bane tum bedego suŋid Winaꞌam nidib la. 17M mor sumalisim Stefanas ne Fortunatus ne Akaikus ken la yela na. Bozugo ba daa suŋi m ne suŋir kan ka yanam pu nyaŋe suŋim la. 18Ba kpeꞌeŋ man ne yanam sunya. Naꞌasimi nimbane wenne bama.

19Winaꞌam nidib bane be Asia soꞌolim puꞌusidi ya. Akuila ne Prisila ne Winaꞌam nidib bane laꞌasedi ba yin la puꞌusidi ya suꞌuŋa, yaname wusa a yinni ne ti Zugsob la zug. 20Baꞌabiis la wusa puꞌusidi ya. Puꞌusimi taaba ne noŋilim.

21Man meŋ nuꞌug ka m sobid neꞌeŋa, ye man Paul n puꞌusidi ya.

22On mekama pu noŋ Zugsob la, kaanb beꞌed be on sob zugin. Ti sosid ti Zugsob ye o kena.

23Ti Zugsob Yesu yelsum be ne ya.

24M noŋilim be ne ya wusa, tiname a yinni ne Kiristo Yesu la zug.