Kabo Babilɔn miɛ kpiri n kpaasi barasu ni
1Nyini sin, na ma kaaki aŋu mɛrɛkɛ be ka i fite aŋgoro sujura, i la yiko agaya, na i woowa n ata wein abara ayɛ durunya n kɛrɛ. 2Na wɔ yɛ i konvi su atiɛn faŋga su ka,
“Wɔ kpaasi. Babilɔn miɛ kpiri n akpaasi.
Wɔ kaaki awiɛwiɛ tiɛm, ni ajinim,
ni deke ŋgbɛɛnŋgbɛɛnm,
ni anuma tiɛm woobiri wɔ.
3Dama durunya n nufɔm kɛrɛ nuuri i nzan
ye bu kɔɔri somaya yiri dɔ a.
Na durunya n nu nfɛmɛm kɛrɛ kɔ kpiniiri yiri yoori bu soma.
Na kabo i la ajɛkɛ na i koro tara má i ŋu ni,
durunya n nu watafɔm gusu nya bu ajɛkɛ fite i dɔ ɔ.”
4Na ma kaaki ati akonvi be ŋga bekun, ka i sujɔjɔ aŋgoro n nu, i ŋa,
“M minɛm, am fite miɛ n nu,
na má am yo bu satiɛ yoowa n be,
na má wahara n bo i suba bu dɔ n tu am.
5Dama miɛ n nufɔm satiɛ yoowa n aju Nyɛmɛ dɔ aŋgoro,
na i wara koro fi má bu satiɛ yoowa n sa.
6Sam bo bara n yoori bu ni, yo i gusu sɔ,
tɔ i kaari i ŋusu nnyɔ.
Ma i ŋu kekereke tara kabo i yo ma minɛm ŋuuri kekereke ni.
7Kabo i yo wuraari i ŋu kpiri na i diiri i tii barasu ni,
kere i kekereke na i ahore gusu saaki sɔ.
Dama i ŋa, ‘Ma di fɛmɛ, m ti má kunafɔ,
m ahore sáaki má cɛɛn be.’
8Nyini dɛɛ ti, lekun ye kekereke bá tɔ i ŋu a.
Yiri la tukpaki, ni ahoresaaki, ni ahɔɛ.
Na sin yára i,
dama Micɛra Nyɛmɛ n bo i cin i sui n la yiko agaya.”
9Na durunya n nu nfɛmɛm bo bu kɔ kpiniiri i na bu ni yiri diiri bu tii ni, bu ŋu kabo sin je i, na bu ŋu kabo ŋmisini yasu kɔ aŋgoro barasu, na bu sún, na bu bó awie. 10Kekereke n bo wɔ tu i n dɛɛ ti, i ma bu sɛrɛ wɔ, na bu jina dede, na bu nya suse ka,
“Keto, keto, am niɛ ahin miɛ bambaka ni.
Babilɔn bo i ti miɛ kpiri n lɛɛ
ye ba kaba acin i sui, ye i kɛrɛ aka ŋgbɛɛn,
anyumbaa kata ni i teke n nu bɛrɛ n a.”
11Na watafɔm bo bu wo durunya n nu ni susun, na bu sukoko miɛ ni, dama be to má bu gɔɔri n kun. 12Be to má bu sika, ni jɛtɛ, ni afere barasu nbem bo bu yo nyumi na bu la gɔ ni. Be to má bu suturam barasu barasu bo bu yo nyumi na bu la gɔ ni. Be to má bu bakam bo bu fa yo biɛ kpakpam ni, ni bu ayaba barasu kɛrɛ bo bu fa sui jee yo bu ni, ni deke kɛrɛ bo bu fa baka fa sense bu, ni deke kɛrɛ bo bu fa jawii bulaari, ni yabuɛ fa yo bu na bu la gɔ agaya. 13Be kaaki to má bu toro neŋge barasum bo bu la nvanvani, ni ayiri kunkuunwa nvanvani, ni baka nyunvuin nvanvanifɔ, ni nzan, ni ŋguin, ni kpɔnɔ samɛnɛ, ni diire, ni naanim, ni nbɔɛm, ni kpɔŋgɔm, ni kpɔŋgɔ torokum, ni akɔɔm, ni domuɛm. 14Na watafɔm n ase i ka,
“Dekem bo a yo koro bu agaya n kɛrɛ
aŋmati ayaki u,
u ajɛkɛm, ni u neŋge kpakpam kɛrɛ bo a la bu
akɔ ayaki u,
a nyá má i be kun.”
15Watafɔm bo bu yoori neŋgefɔm nyini miɛ n dɛɛ ti ni, bu kɔ́ jina dede wɔ, dama sɛrɛ ti bu fa kɔ kekereke n bo wɔ tɔ miɛ n nu ni, na bu ahore saaki agaya na bu sun. 16Na bu se ka,
“Keto, keto, am niɛ ahin miɛ bambaka ni.
I yo kara sutura barasu barasu nyunyumi,
na i la sika jɔrɔkɔm,
ni aferem barasu barasu
bo bu yo nyumi na bu la gɔ agaya ni.
17Nyini neŋge n kɛrɛ akaba aka ŋgbɛɛn,
anyumbaa kata ni i teke n nu bɛrɛ n a.”
Na lee bambaka kanfɔm, ni leefɔm, ni lee wurafɔm, ni bo bu juma nati tieku nzue n su n kɛrɛ akɔ ajina dede. 18Na bu jina niɛ kabo miɛ ni suje sin barasu na ŋmisini yasu kɔ aŋgoro ni, na bu bo awie se ka, “Miɛ bɔnɔ wo bɛrɛ bo i ju ahin miɛ bambaka n a?”
19Na bu susasa tuturi gɔ bu tii su na bu kere ka bu ahore asaaki agaya, na bu susun, na bu suse ka,
“Keto, keto, am niɛ ahin miɛ bambaka n ni.
Dama minɛm kɛrɛ bo bu la lee bambakam na bu juma nati tieku nzue n su n
nya bu neŋgem fite nyini miɛ n dɛɛ ajɛkɛ n nu wɔ.
Ye wɔ kaba aka ŋgbɛɛn,
anyumbaa kata ni i teke n nu bɛrɛ n a.
20Ambɛrɛ bo am wo aŋgoro nu,
ni Nyɛmɛ minɛm, ni Yesu jaramasam, ni Nyɛmɛ nɔaniɛ kanfɔm,
am ma am ahore jɔ
fa kɔ kabo miɛ kpiri n aka ŋgbɛɛn barasu bɛrɛ ni,
dama Nyɛmɛ subisa i nɔɔ nu ma am a.”
21Na Nyɛmɛ mɛrɛkɛ faŋgafɔ be n afa yabuɛ bambaka, na wɔ fa atu aji tieku nzue n nu, na wɔ se ka,
“Sɔ ye Nyɛmɛ fá Babilɔn miɛ kpiri n
fa ji wuum a,
na i busu be bá ŋu má.
22Be ti má deke be ŋga miɛ n nu kun,
i biɛku kanfɔ o, i jue difɔ o, i tere kanfɔ o, ni awiɛ kanfɔm.
Na jumayofɔ barasu be mmɔɔ gusu wo má miɛ n nu kun,
be ti má ŋgani san yabuɛ be ŋga miɛ n nu kun.
23Na fitana haari kun n kpein
je má miɛ n nu cɛɛn be na be ŋu i.
Be ti má konya ni konyafan kuyigindi ŋga miɛ n nu kun,
dama watafɔm bo bu yo wo nyini miɛ n nu
yo ti nfaŋgafɔm wɔ durunya n kɛrɛ nu,
na miɛ nufɔm yo boboyaya sam dadaka durunya n nufɔm kɛrɛ.
24Nyɛmɛ acin miɛ n nufɔm sui a,
dama bɛrɛ yo kuunri Nyɛmɛ minɛm, ni i nɔaniɛ kanfɔm n a,
ni minɛm kɛrɛ bo ba kun bu durunya n nu ni, bɛrɛ yiiri bu mbunja.”