1Huno, ze gulam-bandie munibor gulami ḳoroin, tara hoḳoleu zarzir munibre ijjoti zon mono ḳorouk, zate ḳeu Allar namre ba amrar talimre ḳaraf ḳoar shuzug na fae. 2Ze zone Isaei imandar kunu munibor gulami ḳoroin, ein zanu imandar bai hishabe tan munibre elami na ḳoroin borong aro bala ḳori tan ḳezmot ḳoroin. Ḳaron gulamor ḳezmote ze munibe ufoḳar faira, tain to maear imandar bai. Te ota befare tumi talim ar hukum deo.

3Ḳeu zudi ita bad dia dusra kunu talim dey, ar amrar malik Isa al-Mosir ḳaṭi talim ar Allar ḍor-ḳofor talimre na mane, 4he to misa ohonkari, he kuntau buze na, motobed ḳora, behuda uftami ḳora tar eḳṭa bemar. Otar ḳarone ingsha-ninda, ḳaijja-fosad, ku-shondoe foeda oe. 5Ar oshaṛ bibeḳala manshor maze hamesha gulmal lagailu taḳe. Ita manshor maze Allai hok nai. Tara Isaei imanre duniabi labor ufae mono ḳore.

6Ashole monor tusṭie Isaei iman mafik zindegi ḳaṭaile kub beshi lab oe. 7Amra duniat aibar ḳalo to kuntau loge loia aisi na, ar zaoar ḳalo-o kunta nitam fartam nae. 8Erlagi ḳali ḳani-ḳafoṛ faileu amra kushi roimu. 9Oile duniat zera doni oito sae, tara nanan nomunar forikkat ar fando foṛe, tarar mono kub bod ḳaish foeda oe, zetae tarar zindegire shorbonashor gato falae. 10Ḳaron hoḳol nomunar bod ḳamor zonom oilo ṭeḳa-foeshar maea. Kunu kunu zon ṭeḳa-foeshar lalche Isaei iman taki horia gia, nizor ufre boṛo duk-mosibot ḍakia anche.

11Oile tumi to Allar bonda, tumi ita bod ḳam taki horia ro. Tumi pak-forezgar zindegi, Allar ḍor-ḳof, iman, mohobbot, sobor, ar norom shobabor bae kiali o. 12Imani laṛai ḳorat ro. Aḳerator ze zindegir lagi Alla Pake tumare daot disoin, hou zindegire tumi mozbut ḳori doro. Tumi to imani shakki dislae bout manshor samne. 13Oḳon Alla Pakor name, zein hokkoltar zan dein, ar zein hakim Fontio Filator samne nizor befare hok shakki disla, hou Isa al-Mosir nameo tumare ou minoti ḳorram, 14amrar malik Isa al-Mosi zair oar ag forzonto tumi furafur nikut ar bodnam saṛa roia hukum adae ḳoro. 15Ar gunogane doni hou Alla, zein eḳmatro shomraṭ, bashsha oḳolor bashsha ar malik oḳolor malik, tainu tan ufozukto shomoye al-Mosire zair ḳorba. 16Ḳali Alla Pakreu moute ḳobza ḳorto fare na. Tain ola eḳ nuror foro boshot ḳoroin, hino kunu Adom zat zaito fare na. Kunu Adome kunudin tanre deḳseo na, deḳar takkoto nai. Ijjot ar ḳemota siroḳal ḳali tanu. Amin.

17Huno, ou duniar doni oḳolre hukum deo, tara zanu boṛai na ḳoroin, ar duniabi ostaei donor ufre borosha na ḳoria, Allar ufre borosha ḳoroin. Amrar balair lagi tainu hoḳolta kula ate dan ḳoroin. 18Ar tarare ḳo, tara zanu oinnor balai ḳore, nek kam ḳorat roe, mon kulia dan-ḳoerat ḳore, ar tarar don-doulotor baṭ oinno manshore dey. 19Teu tara nizor lagi emon don zoma ḳorbo, zeta bobishote tarar lagi eḳan mozbut bitor laḳan oibo. Ete hasaror zindegire tara shokto ḳori doria raḳto farbo.

20O Timoti, tumar zimmae ze shompod deoa oise, i shompod tumi balamonte hefazot ḳoro. Aze-baze aḳolor beḳama biddar bulir du-nosla talim taki horia ro. 21Kunu kunu zon ota beḳama aḳol deḳanit gia, ashol iman taki be-fote gesegi.

Alla Pake tumrare rohomot dan ḳoroukka. Amin.