Laboo kaŋ Žuda alkabiilaa duu a
1Bagaa kaŋ Žuda borey alkabiilaa, hugu ka koy hugu duu a alkurra karyan ra ga koy hala Edom hirroo ga kaŋ ti Tisin saajoo ka koy Negew gandaa here, gurma kaboo ga. 2Ngi hirroo ga hun teeko Ciiri-ciirantaa se ya here ka koy Negew tenje. 3A ga koy too gurma here Dontoney žigidogoo do ka bisa nda Tisin ka žigi ka koy Kadeš-Barneya gurma here, ka hun no din ka koy bisa nda Hesroŋ ka žigi ka koy Adar ka kuubi ka koy Karka. 4A ga koy Asmoŋ here ka too Misira gooroo do ka doo teekoo ra, nga ti war gurma hirroo.
5Waynahunay here hirroo manʼti kala nongoo kaŋ ra Žurdeŋ isaa ga huru teeko Ciiri-ciirantaa ra. Hawsa here hirroo ga sintin nongoo kaŋ ra Žurdeŋ isaa ga huru teekoo ra. 6Woo banda ga, hirroo ga žigi ka koy Bet-Hogla ka bisa Bet-Araba, hirroo ga žigi koyne ka koy Bohaŋ kaŋ ti Rubeŋ izʼaroo tondoo do. 7Hirroo ga žigi koyne ka koy Debir, ka bisa nda Akor gooroo ka koy hawsa here Gilgal kaboo here kaŋ ga Adumim žigidogoo tenje kaŋ goo gooroo ra dandi here. Woo banda ga, hirroo ga bisa En-Šemeš harey here ka koy En-Rogel. 8Hirroo ga žigi ka koy no din Hinom izoo gooroo do, Žebus kaŋ maa faa ti Žerizalem zunbudogoo gurma caraa here, woo banda ga, hirroo ga žigi ka koy hala tondi hondoo boŋoo ga kaŋ goo Hinom gooroo tenje, dangay here, nda Refa borey ganganoo hawsa boŋoo here. 9Tondi hondoo boŋ beene hirroo ga golbi ka koy Neftowa hari hundogoo ra, ka koy Efroŋ koyrawey here. Woo banda ga, hirroo ga golbi Baala here kaŋ maa faa ti Kiryat-Yarim. 10Hirroo ga kuubi ka hun Baala waynakaŋay here Seyir tondi hondoo do, ka bisa hawsa caraa here Hawsa tondi hondoo here kaŋ maa faa ti Kesaloŋ, ka zunbu ka koy Bet-Šemeš ka bisa nda Timna. 11Hirroo ga koy Ekroŋ hawsa caraa zunbudogoo here, a ga golbi ka koy Šikaroŋ ga ka bisa Baala hondoo ka too Yabnel, hirroo ga fatta teekoo ga.
12Dangay hirroo manʼti kala teeko Beeroo.
Wey ti Žuda borey hirrey nongoo kul here, hugu ka koy hugu.
Kaleb tangam ka duu nga laboo
13I na Kaleb, Yefune izʼaroo noo baa Žuda borey ra ka sawa nda yaamaroo kaŋ Abadantaa nʼa noo Žozuwe se, maanaa Kiryat-Arba kaŋ maa faa ti Hebroŋ. Arba ti Anak baaba. 14Kaleb na Anak boro hinza gaaray kʼi kaa no din kaŋ manʼti kala Šešay, nda Ahimaŋ nda Talmay, Anak izeyaŋ no. 15Za no din ra a na Debir borey tangam. Debir maa žeenaa ti Kiryat-Sefer. 16Kaleb nka bay ka nee: «Ay gʼay ize woyoo Aksa noo a ma tee wande boraa se kaŋ Kiryat-Sefer tangam kʼa dii.» 17Kaleb armaa Kenaz izʼaroo Otniyel nʼa dii. Kaleb nʼa noo nga ize woyoo Aksa ma tee a se wande. 18Kaŋ woyoo too kate, a na nga kurɲoo tusa a ma faari wiri nga baaba ga. Aksa sar ka zunbu nga farkaa ga, Kaleb nee a se: «Macin no nʼga baa?» 19Aksa nee: «Gomni tee ya ne, zama nʼnʼay noo labu Negew gandaa kaŋ ra hari sii, ay noo hari dooyaŋ mo.» Woo ga, Kaleb nʼa noo beene hari dogey, a nʼa noo ganda hari dogey.
20Woo ti Žuda borey alkabiilaa tuboo, hugu ka koy hugu duu nga bagaa.
Žuda alkabiilaa koyrawey
21Koyrawey kaŋ goo Žuda borey laboo kaydogoo ga, Edom hirroo here, Negew ra, manʼti kala: Kabsel, nda Eder, nda Yagur, 22nda Kina, nda Dimona, nda Adada, 23nda Kedeš, nda Hasor, nda Yitnaŋ, 24nda Zif, nda Telem, nda Beyalot, 25nda Hasor-Hadata, nda Keriyot-Hesroŋ kaŋ maa faa ti Hasor, 26nda Amam, nda Šema, nda Molada, 27nda Hasar-Gadda, nda Hešmoŋ, nda Bet-Pelet, 28nda Hasar-Šuwal, nda Ber-Šeba nda nga kuubi-ka-beraa, 29nda Baala, nda Iyim, nda Esem, 30nda Eltolad, nda Kesil, nda Horma, 31nda Siklak, nda Madmana, nda Sansana, 32nda Lebayot, nda Šilim, nda Ayin-Rimoŋ: woo ti koyra waranka cindi yagga (29) nda ngi koyra kanbey.
33Koyrawey kaŋ goo hondey gandaa here ra ti Eštawol, nda Sora, nda Ašna, 34nda Zanowa, nda En-Ganim, nda Tapuwa, nda Enam, 35nda Yarmut, nda Adulam, nda Soko, nda Azeka, 36nda Šarayim, nda Aditayim, nda Gedera, nda Gedera kuubi-ka-beraa: woo ti koyra woy cindi taaci (14) nda ngi koyra kanbey. 37Koyrawey kaŋ tonton i ga ti Senaŋ, nda Hadaša, nda Migdal-Gad, 38nda Dilaŋ, nda Mispe, nda Yoktel, 39nda Lakiš, nda Bozkat, nda Egloŋ, 40nda Kaboŋ, nda Lahimas, nda Kitliš, 41nda Gederot, nda Bet-Dagoŋ, nda Naama, nda Makeda: woo ti koyra woy cindi iddu (16) nda ngi koyra kanbey. 42Koyrawey kaŋ tonton i ga ti Libna, nda Eter, nda Ašaŋ, 43nda Ifta, nda Ašna, nda Nesib, 44nda Kela, nda Akzib, nda Mareša: woo ti koyra yagga nda ngi koyra kanbey. 45Koyrawey kaŋ tonton i ga ti Ekroŋ, nda nga koyrawey nda nga koyra kanbey. 46Za Ekroŋ nda teekoo here koyrawey kul kaŋ goo Ašdod jere nda ngi koyra kanbey. 47Ašdod nda nga koyrawey nda nga koyra kanbey. Gaaza nda nga koyrawey nda nga koyra kanbey hala Misira gooroo ga ka koy teeko Beeroo guraa ga.
48Koyrawey kaŋ goo tondi hondoo ra ti: Šamir, nda Yatir, nda Soko, 49nda Dana, nda Kiryat-Sana kaŋ maa faa ti Debir, 50nda Anab, nda Eštemo, nda Anim, 51nda Gošeŋ, nda Holoŋ, nda Gilo: woo ti koyra woy cindi foo (11) nda ngi koyra kanbey. 52Koyrawey kaŋ tonton i ga ti Arab, nda Ruma, nda Ešaŋ, 53nda Yanum, nda Bet-Tapuwa, nda Afeka, 54nda Humeta, nda Kiryat-Arba kaŋ maa faa ti Hebroŋ, nda Siyor: woo ti koyra yagga nda ngi koyra kanbey. 55Koyrawey kaŋ tonton i ga ti Mawoŋ, nda Karmel, nda Zif, nda Yuta, 56nda Žizireyel, nda Yokdeyam, nda Zanowa, 57nda Kayin, nda Gibeya, nda Timna: woo ti koyra woy (10) nda ngi koyra kanbey. 58Koyrawey kaŋ tonton i ga ti Halul, nda Bet-Sur, nda Gedor, 59nda Maarat, nda Bet-Anot, nda Eltekoŋ: woo ti koyra iddu nda ngi koyra kanbey. 60Koyrawey kaŋ tonton i ga ti Kiryat-Bal kaŋ maa faa ti Kiryat-Yarim, nda Raba: woo ti koyra hinka nda ngi koyra kanbey.
61Koyrawey kaŋ goo saajoo ra ti: Bet-Araba, nda Midin, nda Sekaka, 62nda Nibšaŋ, nda Ciiri-Koyraa, nda En-Gedi: woo ti koyra iddu nda ngi koyra kanbey.
63Žuda borey mana hin ka Žebus borey kaŋ ga goro Žerizalem gaaray. Žebus borey si goro kala Žerizalem hala hõ, ngi nda Žuda borey.