1«Nda ni armaa hawoo, wala nga feejoo, wala nga hancinoo dere, de nʼdii a, masi bisa a ga, masi goro manʼa ka koy ni armaa do. 2Nda ni armaa si man ni, wala nʼsʼa bay, ma adabbaa dii ni hugoo do, a ma cindi ni do hala waati kaŋ ni armaa kaa kʼa ceeci, mʼa yeeti a se. 3Takaa follokaa no nʼga tee nga farkaa se, takaa din da nga bankaaraa se, ma takaa follokaa tee haya kul kaŋ dere ni armaa se, de nʼduu a, nʼsi hin ka bisa a ga. 4Nda nʼdii ni armaa farkaa wala nga hawoo kaŋ fondaa ra, masi bisa a ga, a tilasu mʼa gaa kʼa tunandi.»

5«Woy masi aru bankaaray daŋ, aru masi woy darbay daŋ. Boro kul kaŋ na woo tee, almuhal no Abadantaa, ni Koyoo se.

6Nda ni fondaa ga nʼdii ciraw teji, tuuri dumi kul kaŋ no ga wala laboo ga, izeyaŋ bara a ra wala guuri, ɲaŋoo ga kani izey ga wala guurey ga, masi ɲaŋoo zaa nda izey. 7A tilasu ma naŋ ɲaŋoo ma koy jina ma izey hinne zaa. Woo ra nʼga duu gomni, nʼga duu aloomur.

8Nda nʼna hugu taaga cin, ma kunga cin beeneheroo ga, hala masi duu ka kuri alhaku daŋ hugoo ga nda boro hun a ga ka kaŋ.

9Masi dumi tana say ni alaneb faaroo ra, nda nʼnʼa woo tee, hayaa kul kaŋ nʼnʼa say ga yeetandi jere ga Irkoy se, nga nda alaneb faaroo hegaa. 10Masi haw nda farka daŋ cere ga ka beeri. 11Masi bankaaray nda šukka kaŋ teendi nda alman haabu nda leŋ šukka.

12Ma buzu-buzu daŋ ni darbaa kaŋ goo ni jindoo ra kanje taacaa ga.»

13«Nda aru hiiji woy, a marga nda a, woo banda ga, a manʼa bagʼa, 14nda a na attabiya futu har a ga ka maaɲoo futandi ka nee: ‹Ay na woyoo woo zaa, ay marga nda a, ya na kabe gar a ga.› 15Woo ga, woysoogaa baaba nda ɲaŋoo ga kaboo silbawey zaa kʼi ka koy koyraa boro beerey do koyraa miɲoo ga. 16Woysoogaa baaba ga nee boro beerey se: ‹Ay nʼay ize woyoo noo aroo woo se wande, a si bagʼa. 17Nga ne, a na šenniyaŋ har nga attabiyaa ga ka nee: “Ya na dii ni ize woyoo ga kabe silbawey.” Ka gar ay ize woyoo kaboo silbawey ne zaara ga.› I ga zaaraa daaru koyraa boro beerey jine. 18Koyraa din boro beerey ga aroo dii kʼa gooji, 19i gʼa zukandi nzorfu kaaray tamma boŋ zangu (100) kaŋ i gʼi noo woysoogaa baaba se, zama a nka Izirayel woysoogo kaŋ mana aru bay maaɲoo futandi. A ga cindi ka tee nga wandoo, a si hin kʼa fay kullihinne a ga huna. 20Amma nda hayaa tee cimi, kaboo silbawey mana diyandi woysoogaa ga, 21i ga woysoogaa fattandi baaboo hugoo miɲoo ga, koyraa borey gʼa warra nda tondi kʼa wii, a ga buu, zama almunkar no a nʼa tee Izirayel ra, ka woykuurutaray tee nga baaba hugoo ra. Woo ra nʼga ifutu kaa war game.

22Nda aru garandi a ga kani nda woyhiiji, ihinkaa kul ga wiiyandi, aroo kaŋ kani nda woyoo nda woyoo hunday. Ifutu kaa Izirayel ra.

23Nda woysoogo kaŋ si aru bay, aru nʼa wiri, de aru tana dii a koyraa ra ka kani nda a, 24war ma ngi boro hinkaa kul fattandi koyraa miɲoo ga, war mʼi warra nda tondi kʼi wii, i ga buu. Woysoogaa ga buu, zama a mana kaati koyraa ra ka borey cee. Aroo ga buu, zama a nka kaŋ nga cinaa wandoo ga. Woo ra nʼga ifutu kaa war game. 25Amma nda hawsaa ra aroo dii woysoogo kaŋ wirandi, nda aroo nʼa dii ka kani nda a, aroo hinne kaŋ kani nda a no ma wiiyandi. 26Masi haya kul tee woysoogaa se, woysoogaa mana zunubu kul tee kaŋ ga hima nda buuyan. A ga hima nda boro kaŋ kaŋ nga cinaa ga kʼa wii. 27Zama hawsaa ra a duu a, woysoogaa kaati, amma boro kul sii no kaŋ gʼa hallasi.

28Nda aru dii woysoogo kaŋ si aru bay kaŋ mana wirandi, a kaŋ a ga ka kani nda a, de i nʼi gar a ra, 29aroo kaŋ kani nda woysoogaa ga nzorfu kaaray tamma boŋ woyguu (50) noo woysoogaa baaba se, zama a nka kaŋ a ga, a gʼa tee nga wandoo, a si hin kʼa fay kullihinne a ga huna.»