1Kokoyoo Sulaymaana ti Izirayel kul se kokoy. 2Nga boŋkoyney kaŋ goo a cire maaɲey ne: Sadok izʼaroo Azarya kaŋ ti sargari juwalkaa, 3nda Šiša izʼarey Elihoref nda Ahiya, i manʼti kala hantumkawyaŋ, nda Ahilud izʼaroo Žozafat, nga bara kaddaasey gande. 4Yehoyada izʼaroo Benaya ti wongu-izey jineboraa. Sadok nda Abiyatar ti sargari juwalkawyaŋ. 5Nataŋ izʼaroo Azarya manʼti kala gofornerey jineboraa. Nataŋ izʼaroo Zabud manʼti kala sargari juwalkaw, kokoyoo cere no. 6Ahišar ti kokoyoo hugoo goykey jineboraa. Abda izʼaroo Adoniram ti waazibi goyey jineboraa.

7Goforner woy cindi hinka (12) no Sulaymaana nʼi gorandi Izirayel boŋ. Ngi no ma alman taa jamaa ga kokoyoo ŋaahayaa nda nga boro kul kaŋ goo nga hugoo ra ŋaahayaa se. Ngi affoo kul ga huga nda a handu foo jiiroo ra.

8Maaɲey ne: Hur izʼaroo no ma Efrayim tondi hondey juwal. 9Deker izʼaroo no ma Makas, nda Šalbim, nda Bet-Šemeš, nda Eloŋ, nda Bet-Hanaŋ juwal. 10Hesed izʼaroo si goro kala Arubot koyraa ra ka Soko koyraa nda Hefer gandaa kul laama. 11Abinadab izʼaroo no ma Dor hondey laamaa kul juwal. Sulaymaana ize woyoo Tafat ti nga wandoo. 12Ahilud izʼaroo Baana no ma Tanak laamaa, nda Megido laamaa, nda Bet-Šeyaŋ kul laamaa kaŋ goo Sartaŋ jere, Žizireyel se ganda juwal, za Bet-Šeyaŋ hala Abel-Mehola hala Yokmeyam se jine. 13Geber izʼaroo si goro kala Ramot koyraa ra kaŋ goo Galad gandaa ra. A ga Manase izʼaroo Yahir koyra buuna-buunawey kaŋ goo Galad nda Argob nongey kaŋ goo Bašaŋ laama, maanaa koyra beeri woydu (60) kaŋ goo nda cete, koyrawey miɲey hawandi nda alhan guuru warga. 14Ido izʼaroo Ahinadab no ma Mahanayim juwal. 15Ahimas no ma Neftali juwal. Nga mo na Sulaymaana ize woy hiiji kaŋ maaɲoo ti Basemat. 16Hušay izʼaroo Baana no ma Ašer nda Beyalot juwal. 17Paruwa izʼaroo Žozafat no ma Isakar juwal. 18Ela izʼaroo Šimeyi no ma Benžameŋ juwal. 19Uri izʼaroo Geber no ma Galad gandaa juwal kaŋ bay ka tee Amor borey kokoyoo Sihoŋ nda Og, Bašaŋ kokoyoo wane. Boŋkoyni folloku no ma gandaa din juwal.

20Alwaatoo woo, Žuda borey nda Izirayel borey ga boobo ni mma nee teekoo miɲoo labutaasoo ga. I ga ŋaa, i ga haŋ ka wasa, i ga maakaani.