1Managə Jesu ganda bam iche kulə gaba bwasa Mãr̰ĩ-yə̂ da, aba gərsə̂ gwale duwa gə mən wayəw ba da: «Aba gələ̂nin mani, yə̂r kur̰a də ladəbe də gechide də gə aw gə ciri də ka di de! Ciri di, gə awdə ladə nan̰e!» 2Ər̰ə Jesu wayəw da: «Ə̂w, me ciri də geche də mə̂ yə̂rdə ta di, kur̰a də gə awdə nəm mən tenene kaw, sanga ha wara lə̂ kondədə dədə̂ bə̂də̂. Mani pad nə̂ i ta di ha meyendara i bam.»

3Mwom da, Jesu ha dama managə kur̰a də Olibe dədə̂ me cwa dərə̂w əjə kulə gaba bwasa Mãr̰ĩ di. Me Piyer me Jak me Jã me Andəre me ha ꞌywaw bam tulin̰-yə̂ hin̰e, me urəw nəm ba da: 4«Waynin daa: I mindi na me mani nə̂ ta di ha alala mo? I mani na me ha gələ̂nin wala day gə ba haralə̂ di ba yala neyem ɗəm mo?» 5Ər̰ə Jesu waygə da: «Asna angal dan ladle! Kalna gun mən lamnang bə̂də̂! 6Nare nan̰ ha ꞌwoo sumən hara nəm lə̂ me, wi kaw ha waya ba Dole gə Mãr̰ĩ biyə̂w gə Kris di, ba i an̰ju, me cendi ha lama nare nan̰ bwagə bam. 7Managə anə̂ dara dwaya gwale gənə̂ say də tulə̂ngə̂ ib me, də mana gə hə̂n̰-yə̂ gwale dəra me kaw, alna lan̰a bə̂də̂, dara mani nə̂ ya ta de di alala le ba, ɗəm da, i dər̰in̰a ꞌyan̰a dəra bə̂də̂ sən̰. 8Nare nə̂ wama gə mən-nə̂ ha jara say gə kwandagə nə̂ wama gə ɗangə̂, me dolgə ha jara say gə kwandagə dolgə. Mana-lə̂ jiga jiga kaw, sən̰a ha gəgədarale, me badəgara kaw ha əndara lə̂ ciri-yə̂ jiga jiga me ca. Wamani gə ta di, wun i ya yaa ba jə̂gədə gə deme dər̰in̰ nə̂ pii-yə̂ ta de sən̰.

9«ꞌYeni di, asna angal dan ladle! Gə ha ꞌyang woni aa sariya nə̂nə̂ nare nə̂ Juwib day əsəragələ̂, gə ha gwabang managə kuləli day woni amsa Mãr̰ĩ-yə̂, gə ha hara gandang gechide dərə̂gələ̂ me dolgə dərə̂gələ̂ me dara daran əndi. Mana gə ta-lə̂ da, anə̂ ha ꞌya woni wayagə Nõ də lade. 10Dara wala ꞌyan̰a duwa-lə̂ da, kal nare nə̂ gəndə̂gə jiga jiga pad sən̰a dədə̂ ka dwayna Nõ də lade di le do. 11Me managə gə dara yibə̂ng ꞌyagə woni dwana əsəragələ̂ da, harna sədə̂ng pii dara gwale gə anə̂ ha wayaw di bə̂də̂. Anə̂ gəra ha waya i gwale gə Mãr̰ĩ ha ꞌyang gandəw an̰ju, dara gwale gə ha ganda bədə̂ngə̂ di da, i gə dan gə sədə̂ng bə̂də̂, me i gə Dundi dənə̂ Mãr̰ĩ duwa dəra. 12Gun chendəw duwa gang ha ꞌyaw woni dwana əsəragələ̂ dara ba ꞌyanaw bam. Dwe abə̂w duwa gang kaw ha ala yande gə dwe me ca. Dine nə̂ yaa da, ha kədə̂ woni mar̰ande gə war̰agə woni yagə, me cendi ha ꞌyagə woni dwana əsəragələ̂ dara ba ꞌyanagə bam. 13Nare pad ha ələ̂nge dara daran əndi, me gun gə yinə̂ səw wayna kalna dusəw dənə̂ bəraa ꞌyan̰a-lə̂ da, Mãr̰ĩ ha bələ̂we.»

14«Wala mən, anə̂ ha yara mani nə̂ al ən̰ama woni meyanda mana bam di* inalə̂ mana gə dee cendi ha ꞌya lə̂ bə̂də̂. Kal gun gaba asa gwale gə ta di da, a ꞌwacn̰ana gəndəw ladna! Managə anə̂ yarna mani nə̂ al ən̰ama nə̂ ta di da, kal nare nə̂ i managə wama gə Jude-yə̂ da, gə wana hana kur̰a dədə̂. 15Gun gə damna daa managə kulə duwa dəwə̂ da, a chinə̂ dodə̂ dara laya gə mani nə̂ ilə̂ kulə̂ di bə̂də̂ ɗəm. 16Me gun gə inalə̂ bam yigalə̂ kaw, a cwarnay hane ulay dara laya gə barge duwa bə̂də̂ ɗəm me ca. 17Owe namde woni gudi gudi me woni ꞌyagə dəndragə nãy-yə̂ me ca da, wamani ha ꞌywagə le wala gə ta-lə̂ di! 18Amsəna Mãr̰ĩ dara kal mani nə̂ ta di hane wala gə urni-yə̂ bə̂də̂. 19Dara wala gə ta-lə̂ da, ha ꞌya i gələ̂ gə dərin̰ gə geche gə dii mən kaw gun ꞌyow bə̂də̂ managə ɓəgəden̰ gə Mãr̰ĩ bo gə mani pad bəraa laba. Ɗan̰ kaw, gələ̂ gə dərin̰ gə ya ta de ha ꞌyale ɗang bə̂də̂ bər̰in̰. 20I sədə, wala gaba gələ̂ gə dərin̰ gə ta-lə̂ da, Aba ciri gə Mãr̰ĩ di dee ərmənə̂ me junə̂ wala gə yab bwana bam bə̂də̂ da, gun mən gə dee ha ꞌywa bələ̂ duwa da, ilə̂ bə̂də̂. Me an̰ji ərmə̂ dara ba ha joo wala gə yab di bam ɗəm dara nare nə̂ an̰ji an̰jəragə dara ba ina i duwa di.

21«Wala gə ta-lə̂ da, nare ha wayang ‹Yarna, Dole gə Mãr̰ĩ biyə̂w gə Kris di, i ka›, labaa ‹Yarna, Dole gə Mãr̰ĩ biyə̂w gə Kris di, ilə̂ ta›. Gun gə waynang yande da, yinə̂ gwale duwa di bə̂də̂. 22Dara nare woni kulagə ha ɓər̰in̰ə̂. Gun gə mən ha wayang Dole gə Mãr̰ĩ biyə̂w gə Kris di, ba i an̰ju, me i kulagə. Nə̂ yab da ha wayang ba gə i woni cəmə̂ Mãr̰ĩ bəw, me i kulagə. Cendi ha ala mani nə̂ dan̰a me mani nə̂ ɗoy nare dədə̂gə bam me dara lama gə nare. Cendi ꞌywana bərmə̂ da, ha lama nare nə̂ Mãr̰ĩ an̰jərəgə di gang me ca. 23Yande da, ꞌyeni di, asna angal dan ladle. Nə̂ wayang daa pii dara mani pad nə̂ haralə̂ di ɗəm.»

24«Me wala gə ta-lə̂ da, gələ̂ gə dər̰in̰ gə ta di tarəwə̂ da, dawa ha aa bə̂də̂, mana ha cwara i diləm kədab me, duru kaw ha acn̰a mana bə̂də̂ me, 25dechu kaw ha bwara dodə̂, me mani nə̂ daa pad woni dwana kaw, ha gəgədara daa me ca. 26Mana gə ta-lə̂ dog, nare ha yara Gun gorəndəw di chə̂ə̂ lə̂ daa siyaya dalawə̂ hara nəm dodə̂ gə ꞌywagəda duwa gə nan̰ me ca. 27An̰ji ha kəjə̂ paja nə̂nə̂ Mãr̰ĩ duwa nə̂ daa mana lə̂ pad, managə tulin̰ də jomni-yə̂ me də turgə-lə̂ me əsay gə abe-yə̂ me əsay gə jele-yə̂ me, dara daya gə nare nə̂ an̰ji an̰jəragə di dodə̂.»

28«Ərmənə̂ gwale gənə̂ dwaga dəra yarna sən̰. Managə gangər̰adə nə̂ dine dara ꞌwaja daa me bajadə cwarna kulaje me da, anə̂ ꞌocn̰ dara marsəni ba i ib ɗəm. 29Cwara gənə̂ Gun gorəndəw di kaw ha wunə̂ i yande di me ca: Managə anə̂ dara yara mani nə̂ dee nə̂ wayang gwale day pii di dara alala da, ꞌwacn̰ana dara Gun gorəndəw di yala lə̂ ib ɗəm, an̰ji ilə̂ ciri bədə̂. 30I sədə. Dwayna, nə̂ wayang i gwale səw ɗang bi: Mani nə̂ pad ta di dara alala da, nare nə̂ caga ka di ha mara bam pad pii dərə̂gələ̂ bə̂də̂ sən̰. 31Daa me, sən̰a me, ha meyandara i bam me gwale ni da, ha meyandara bam bə̂də̂ bər̰in̰.

32«Me wala gə ta di me dawa də ta di me da, gun mən kaw ꞌocn̰əgə bə̂də̂. Paja nə̂nə̂ Mãr̰ĩ duwa nə̂ daa kaw ꞌocn̰əgə bə̂də̂, me Mãr̰ĩ gorəndəw kaw ꞌocn̰əgə bə̂də̂ me ca. I Abə̂w gə Mãr̰ĩ mən tenene me ꞌocn̰əgə an̰ju. 33Asna angal dan ladle me damna daa dərə̂ng bəra, dara dawa də ta di hara dəra da, anə̂ ꞌocn̰ədə bə̂də̂.

34«Mani di ha alala wun i ya abe mən gə so ha məjə̂ni-yə̂ ta de. An̰ji kalgə koy duwa ciri di əsəragələ̂ me ꞌyagə wi kaw giyə̂ duwa, giyə̂ duwa, me an̰ji wayəw aba gama ciri bədə ba damna dərə̂w bəra jang me ca. 35Yande da, damna dərə̂ng bəra jang, dara na anə̂ ꞌocn̰ dawa də aba ciri di cwara nəm di bə̂də̂. Gaa ha ꞌya gə turgə, labaa gə changa dwar̰ə, labaa gəray hərdə̂ duwa-lə̂, labaa gə manapər som. 36Managə an̰ji cwarne jisgə yande da, kal an̰ji ꞌywanang ꞌya gə nuni-yə̂ bə̂də̂. 37Gwale gə nə̂ wayəw ka di, nə̂ wayang i ꞌyeni di pad: Damna dərə̂ng bəra jang!»