1Dama gə gwale me, nasəba me da swa i woy mo? Swa i managə ərmə̂ dan gə acn̰e gə ilə̂ jara ganang dəban bwagə gwayni gə dam lə̂ sədə̂ngə̂ pad ta di. 2Anə̂ yər mani me dusərə̂ng urgəle me anə̂ ꞌywanagə bə̂də̂ mwom da, anə̂ ərəm ꞌya gə nare. Anə̂ al harni me anə̂ ꞌyo mani di bə̂də̂ mwom da, anə̂ nasəbə gə nare me anə̂ daməw gwale me ca. Mani nə̂ anə̂ urgə me anə̂ ꞌyogə bə̂də̂ ta di, i dara anə̂ urgə i Mãr̰ĩ səwə̂ bə̂də̂. 3Anə̂ urnə̂ mani me anə̂ ꞌywana bə̂də̂ da, i dara anə̂ ur i gə ərmə̂ gə acn̰e me mani nə̂ anə̂ urgə ta di anə̂ ur i dara meyandagə bam pə̂gin̰ managə mani dan nə̂ dərə̂ng urə̂. 4ꞌYeni nare woni ɗəbə̂ Mãr̰ĩ tarəwə̂ jang bə̂də̂ nə̂ ga! Anə̂ ꞌocn̰ dara urə̂ gə mani nə̂ sən̰a dədə̂ ka nan̰ məra da, i ala gə mar̰ande gə Mãr̰ĩ bə̂də̂ mo? Gun gə urnə̂ mani nə̂ sən̰a dədə̂ ka nan̰ məra da, an̰ji gədə i Mãr̰ĩ aba mar̰ande duwa. 5Anə̂ ərəm dara gwale gə maktubə wayəw pad ta di i pə̂gin̰ ɓa: Dundi də Mãr̰ĩ chəndə gandədə sədə̂ndələ̂ ta di an̰ji al halgəni dəra nan̰e dara ba damnalə̂ jang. 6Ər̰ə, Mãr̰ĩ al ganandə dusi də lade nan̰ ɗang ɗoy bam dara maktubə way da: «Woni gwaba jwargagə da, Mãr̰ĩ cogə tarəw me woni asa dədə̂gə dodə̂ da, an̰ji al gandagə dusi də lade me ca.» 7Kalna Mãr̰ĩ me ina dole dan an̰ju me ɗəbənəw sidan wayna da, an̰ji ha wa hara bam hin̰ sədəngə̂ 8Chədne hane Mãr̰ĩ səwə̂ ib me an̰ji kaw ha chidə̂ sədəngə̂ me ca. ꞌYeni woni ala acn̰a da, biynə̂ sədə̂ng bam acn̰a-lə̂, me ꞌyeni nə̂ dusərə̂ng sər sər da, kalna dusərə̂ng wusənə̂ le me ca. 9Alna n̰agəniyə̂ wamani dan dəwə̂ me nulnə̂ gura me, kalna baya dan di cwarna gədənə̂ gura me sii ꞌywala dan di cwarna gədənə̂ n̰agəni me ca. 10Hurbəna dədə̂ng dodə̂ Aba ciri dərə̂wə̂ me an̰ji ha cwara yibə̂ng dədə̂ng di daa sən̰ me ca.

11Chamran, kalna waya kwanang gwale day gə acn̰e ɗi, aba waya jaw gwale duwa gə acn̰e me aw sariya de me da, an̰ji way i biy gə ꞌwo gwale duwa gə acn̰e me aw i sariya me caag da, mə̂ anaw biy gə ꞌwo sariya mwom da, mə̂ i aba lan̰aw bə̂də̂ ɗəm. 12I Mãr̰ĩ mən tenene me ꞌyandə biy gə ꞌwo di me a sariya an̰ju me. I an̰ju mən tenene me neyem bələ̂ gun me meyendaw bam me ca. Ɗəm da, əjəm da, mə̂ i wi me mə̂ aw jam gun sariya mo?

13Caga da, dwayna gwale ni, ꞌyə̂ni woni waya da: «Laba labaa sanga da, nə̂ ha nin hara ciri də geche də yandeyə̂ nə̂ ha nin dama lə̂ ala aliya mən, nə̂ ha nin ala kenge me nə̂ ha nin ꞌywa gursə.» 14Mani nə̂ ha alang sanga da, anə̂ ꞌwocnə̂gə mənang kaw mo me bələ̂ dan da ha wunə̂ man me mo? ꞌYeni da, anə̂ wun ya masəm gə dəmə̂ ɓani hin̰e me ɓam da, nol bam kalang ta de. 15Gwale gə de anə̂ ha wayaw di i ya ta de: Aba ciri urnə̂ da, də ha damang dərə̂ndə bəra, də ha dama ala mani nə̂ ya ka de me, nə̂ ya ta de me ca. 16Ər̰ə caga da, anə̂ ꞌogə sədə̂ng ꞌyə̂ni me anə̂ gwobə jwargang me, ꞌwaga gə sii gə ya ta de da, acn̰ nan̰e. 17Ɗəm da, gun gə ꞌwacn̰ana ala gə ladni me alnaw bə̂də̂ da, al i acn̰a gə geche.