Toq Boc Plình Raq Broq Nòi Hanình
Đawit Achìh
1Mahua yiang au ŏi hatenh gòm Boc Plình;
bìac dèch claih au toq trùh enh Haq.
2Toq Chuaq raq, Haq hmu xèm da au wa đôn hanình au,
au ùh 'bìq tarìt tariang toq leq.
3Pì bàc ngai wiang jêh mòiq ngai trùh jò leq cô èh?
Dìq ca pì hatình ca dabau jêh cachìt haq;
pì tìah ca panàt cachình,
ùh crài cleq ca pagia ten cro.
4Joq 'màng aih,
wì khoi broq pađim đòiq cađac haq enh nòi ha'nhèq;
wì loq enh bìac patìah 'nùt,
hacùng waiq xôq mahaq ta manoh waiq hanip.
5Ôi mahua yiang au, hatenh gòm Boc Plình beq,
ma jah 'màng aih bìac ngèh gòm da au ŏi ta Haq.
6Toq Chuaq raq hmu xèm da au wa bìac dèch claih au;
Haq đôn hanình au, au ùh 'bìq tarìt tariang.
7Bìac dèch claih wa can 'ngah 'ngai au ŏi ta Boc Plình,
Haq hmu xèm au wa padren dêh da au wa nòi hanình da au.
8Ôi jàn da au, hloi hloi canòm ca Boc Plình beq,
pa'noh dèh manoh enh ngìa ca Haq;
Boc Plình raq nòi hanình da bèn.
9Joq 'màng aih, mangai toq i 'bang tìang ha'neq èh dech 'ngwan;
mangai i 'bang tìang càn, aih patìah 'nùt,
đòiq enh 'nhèq ca càng,
dìq ca wì haq hèo bu dàng hòi hihèm.
10Apaq canòm ca bìac padit padiang,
hadai paq đòiq manoh ngèh gòm nòi bìac atùng;
'nhac ca bìac padrŏng can loq tŏc tam yi hnao,
hadai paq đòiq manoh canòm bìac aih.
11Boc Plình i doi bìac cô mòiq yàng mahaq
au tàng baiq yàng Haq doi:
“Cwìang itai aih toq da Boc Plình raq hêq.
12Ôi Chuaq, can xa-ŏch xam manoh loq waq aih da Chuaq,”
ma jah 'màng aih “Chuaq am ca tang ngai
tiaq bìac broq da wì haq.”