Waiq Dang Chuaq ta Jò Glàm Bìac Nan Xa Đawit Achìh
Đawit Achìh
1Chuaq ôi, jò Ìh nòih, xìn paq lech ca au;
jò Ìh plôh nòih, xìn paq baxa au.
2Chuaq ôi, xìn Ìh xa-ŏch ca au taiq au cô ìuq wa hŏnh manoh;
Chuaq ôi, xìn Ìh broq brêh ca au taiq caxènh au jìq.
3Mahua yiang au hlè lèt, tarìt tariang!
Chuaq ôi, dùnh dang leq hòm adroi ca Ìh trùh am ca au catèm?
4Chuaq ôi, wìh hlài beq, xìn Ìh dŏih dèch mahua yiang au;
xìn Ìh dèch au nhò can xa-ŏch xam manoh loq waq da Ìh.
5Ma jah 'màng aih pi i ca mangai leq hmàng ca Ìh jò haq khoi cachìt;
ŏi ta ralùng hanang, cabô manè padèch hiniq Ìh?
6Au crò hmoi 'ngah ca mang.
Jùang au loh ca hadàh,
dadrah au loh ca 'yôm diac mat.
7Mat au loh ca pònh taiq cla au mango,
mat au wìa mòn lep taiq wì ma git ca au.
8Pì mangai dù wia hangai ca au beq,
ma jah 'màng aih Chuaq khoi tàng bàu au crò hmoi.
9Chuaq khoi tamàng bàu au waiq xìn.
Haq khoi xa-ŏch rùp bàu au waiq khàn.
10Dìq ca wì ma git ca au jah camaih, èh yùq crè dìq jaq;
wì haq wia enh au, wa ta'ngàc wì haq 'bìq camaih.