1Alelúuyaj.

Néijmiꞌi nu ɨ nyaxɨéjnyuꞌcaa jɨn tyaatatyójtziꞌreꞌej ɨ Tavástaraꞌ

aꞌájna joꞌmaj ɨ tyeɨ́tyee jóosɨɨreꞌ maj tyámuaꞌ een,

aꞌájna joꞌmaj néijmiꞌi jóosɨɨreꞌ.

2Vaꞌcán pu jɨn tyíꞌmuarɨeꞌ ɨ Tavástaraꞌ,

majta ɨ maj jaxɨeꞌveꞌ, aꞌɨ́j mu jitze tyúumuaꞌtyej.

3Naa pu huaséꞌrin jeꞌej tɨ tyíꞌmuarɨeꞌ ajta huápuɨꞌɨj naa tyihuáꞌsejratyeꞌ,

ajta jusén jɨmeꞌ séejreꞌ ɨ tɨ jɨn tyámuaꞌ tyáꞌxaꞌpuɨꞌɨntareꞌ.

4Ajta aꞌyan jáaruuj tɨꞌij quee aꞌtɨ́j yóꞌhuaꞌnan ɨ tɨ jɨn naa huaséꞌrin.

Tavástaraꞌ pu naa tyihuojóꞌmuaꞌraj ajta quee jiyeꞌtzín tyinyúꞌcacaa;

5cueꞌráj pu tyihuoꞌtáꞌsij aꞌɨ́ɨjma ɨ maj tzáahuatyiꞌraꞌaj jimi tyíchaꞌɨj,

¡aꞌnáj tɨnaꞌaj pu jamuaꞌreej tyiꞌtɨ́j tɨ jɨn tyaꞌtóoratziiriꞌ!

6Huoꞌtaséjratyej ɨ tɨ néijmiꞌi jɨn putyíꞌuurej aꞌɨ́ɨjma ɨ jutyéɨtyeristyamuaꞌ,

aꞌyaa puꞌij aꞌɨ́ɨjma tyuꞌtáꞌ aꞌɨ́ɨjma tɨ tyíaꞌricaꞌaj ɨ maj quee tyáꞌtzaahuatyeꞌ.

7Jeꞌej tɨ aꞌɨ́ɨn rɨcɨj tyámuaꞌ pu een ajta aꞌyan tyiꞌjaꞌyájna;

aꞌyaa pu tyíɨꞌrij tyaj jitzán tyúꞌcaꞌnyej jeꞌej tɨ aꞌɨ́ɨn tyuꞌtaꞌíjtacaꞌ,

8jiꞌnye jusén jɨmeꞌ pu tyámuaꞌ éenyeꞌej tyíꞌsejreꞌ

ajta aꞌyan tyuꞌtyátaavijhuacaꞌ jɨꞌréꞌcan jɨmeꞌ ajta huatoojéꞌyacan jɨmeꞌ.

9Aꞌɨ́ɨjma pu iirájtoo ɨ jutyéɨtyeristyamuaꞌ

ajta jusén jɨmeꞌ tyámuaꞌ jáaruuj ɨ tɨ jɨn tyaꞌtóoratziiriꞌ.

Dios pu tyámuaꞌ een ajta áꞌtyesiꞌreꞌ.

10Ajta tyej tyij jéetzeꞌ tyámuaꞌ tyojoꞌitéej aꞌyaa pu tyúuxɨeꞌveꞌ tyaj jaatyátzaahuatyeꞌen ɨ Tavástaraꞌ;

aꞌɨ́ɨmaj ɨ maj tzáahuatyiꞌraꞌaj jimi tyíchaꞌɨj, tyámuaꞌ mu tyihuojoꞌitéej muaꞌjuꞌun aꞌɨ́ɨmaj.

¡Dios mu aꞌnáj tɨnaꞌaj tyiꞌtyóotziꞌreꞌej muáꞌjuꞌun!