1Leꞌa itea be uleꞌay ndon leꞌa nsak ten bexa Israel, leꞌa Dios leꞌa nti bexa lat be men. Ngoxoꞌob Dios bexa gun bexa tiꞌin ndoꞌ Dios sakndoꞌ be men, nsaꞌa bexa be taꞌa no be man xnab ndoꞌ Dios, ndontsa yuꞌu be ke ten be men. 2Leꞌa dub uleꞌay nlats ladna bexa na lá iniꞌí xteꞌe gun, no bexa na ndun ta lid leꞌa nak, geal leꞌa uleꞌay wa ncho gor lá ndun gan uxobgek ndoꞌ Dios. 3Ta weꞌe leꞌa xa wa nsabndoꞌ usaꞌa man xnab ndoꞌ Dios, ndontsa yuꞌu be ke ten leꞌaka leꞌa xa, no be ke ten be men.

4Naꞌan ton yoo gan gab leꞌa gun tiꞌin ten uleꞌay ndon leꞌa nsak, leꞌa Dios ndi leꞌa uti xa wa lak mti Dios Aarón. 5No liga leꞌa Cristo naꞌanpa ngab leꞌaka xa gak uleꞌay ndon leꞌa nsak. Leꞌa Dios leꞌa mti xa, ndab Dios ndoꞌ xa:

7Leꞌa zha uyoꞌo Cristo ndoꞌ gizhliyo ndee, leꞌa xa ugeꞌ uníꞌi no mbiꞌin xa gor ndadiꞌizhno xa Dios, unab xa ndoꞌ Dios gakno Dios xa, leꞌa Dios ndap juers lá gat xa. Leꞌa Dios mbiꞌínka ta li unab xa wa, geal leꞌa xa uzhebpa nxobgek ndoꞌ Dios. 8Leꞌa Cristo leꞌa nak Xin Dios, ná leꞌa xa utidka gealkweaꞌ wa ndontsa ngók xa uxobgek xa ndoꞌ ta nlad Dios. 9No ta na li mbin Cristo lakka nlad Dios wa, ta weꞌe leꞌa tal ton uxobgek ndoꞌ Cristo, leꞌa Dios usaꞌa dub gealnaban kub ta nunk lá idub. 10No ulaxoꞌob Dios Jesús gak xa uleꞌay ndon leꞌa nsak, lak ngok uleꞌay Melquisedec.

11Bi ncho sianta be taꞌa nlad naꞌ ukeꞌa naꞌ cuent ten ta wa, parea uzhebpa bid ukeꞌa naꞌ‑yá dub mod na yakbeꞌena bega‑yá, leꞌa bega uzhebpa chaꞌaw nyakbeꞌena. 12Leꞌa nat leꞌa bega yá kwen ndangea ladna Cristo, nsabndoꞌ gakla bega mech nluu be men. Parea leꞌa bega bi nkiꞌin uluugal dub xa bega stub biaj be ta nak xan diꞌizh ten Dios. Leꞌa bega nak cuent medoꞌo ndo chizh, dub meꞌed bi lá isuꞌu gaw. 13Leꞌa tal ton lá nyakbeꞌena xteꞌe nsabndoꞌ gun xa, leꞌa xa wa nak cuent dub medoꞌo. 14Ná leꞌa bexa na uniꞌí xtaꞌan nsabndoꞌ gun xa, no xtaꞌan lá nsabndoꞌ gun xa, leꞌa xa wa nak cuent dub men gox ndákka ndaw.