1 Muat na tanga tahut tano Watong, kanong a bilai ie.
No uno harmarsai i kis hathatika.
2 Tanga tahut ta God nong i tamat ta ira kaba god bakut.
No uno harmarsai i kis hathatika.
3Tanga tahut tano Watong nong i tamat ta ira kaba watong bakut.
No uno harmarsai i kis hathatika.
4 Aie sen mon i la gilgil ira tamat na pinapalim na kinarup.
No uno harmarsai i kis hathatika.
5 Aie nong ga gil no mawe ta ira uno minmintot at.
No uno harmarsai i kis hathatika.
6 Aie nong ga palase no pise aram naliu ta ira taah.
No uno harmarsai i kis hathatika.
7 Aie nong ga gil ira tamat na lulungo.
No uno harmarsai i kis hathatika.
8No kasakes i la kurkure no bung na kasakes.
No uno harmarsai i kis hathatika.
9No teka ma ira tiding diet la kurkure no bung.
No uno harmarsai i kis hathatika.
10 Aie nong ga bu bing ira matana bulu na tunaan ta ira Isip.
No uno harmarsai i kis hathatika.
11 Ma ga lamus hasur ira Israel merau nalamin ta diet ira Isip.
No uno harmarsai i kis hathatika.
12 Ga lamus hasur diet ma no dadas na limana.
No uno harmarsai i kis hathatika.
13 Aie nong ga paleng no Dardarana Tes nalamin.
No uno harmarsai i kis hathatika.
14Ma ga lamus ira Israel nalamin ta ira iruo palpal na tes.
No uno harmarsai i kis hathatika.
15Iesen ga hakango no king me Isip ma ira uno matana ubane tano Dardarana Tes.
No uno harmarsai i kis hathatika.
16 Aie nong ga lua ta ira uno matanaiabar nalamin tano hanuo bia.
No uno harmarsai i kis hathatika.
17Aie nong ga kato bing ira tamat na king.
No uno harmarsai i kis hathatika.
18 Ma ga bu bing ira dadas na king.
No uno harmarsai i kis hathatika.
19 Ga bu bing Sihon, no king audiet ira Amor.
No uno harmarsai i kis hathatika.
20 Ma ga bu bing Og, no king me Basan.
No uno harmarsai i kis hathatika.
21 Ma i ga tar se ira udiet pise ta ira uno matanaiabar bia diet na tinane leh.
No uno harmarsai i kis hathatika.
22 A haratinan ie taar tano uno tultulai Israel.
No uno harmarsai i kis hathatika.
23Aie nong pa ga lik luban dahat ing dahat ga kis na maris.
No uno harmarsai i kis hathatika.
24 Ma ga halangalanga dahat sukun ira udahat ebar.
No uno harmarsai i kis hathatika.
25Ma i la tamtabar ira tunotuno ma ira wawaguai bakut ma ra nian.
No uno harmarsai i kis hathatika.
26 Muat na tanga tahut tano God nong i kis taar aram ra mawe.
No uno harmarsai i kis hathatika.