1 No Watong i kap taman taar. I tahut bia no ula hanuo na laro,
ma ira haleng na mugurlamin diet na guama.
2 A bahuto ma ra tamat na kankado i kis luhutanei.
Auno no dadas wara kurkure ira tunotuno, ma i kure diet ma ra takodasiana magingin.
3 No iaah i la lulua haan tana
ma i la tuntun haliare ira ana suk ta ira kaba palpal bakut.
4 No uno hile i bulosare no ula hanuo.
No ula hanuo i nes ma i dedar.
5 Ira uladih diet pola hoing ira kadel ra matmataan tano Watong.
Aie no Watong tano ula hanuo bakut.
6 No mawe i hinawas palai tano uno takodasiana magingin,
ma ira matanaiabar bakut diet nes no minarine.
7 Diet bakut ing diet lotu tupas ma diet latlaat ta ira palimpuo, no Watong i la hahirhir diet.
Muat ira god bakut, i tahut bia muat na singa bukunkek menalua tana.
8Watong, ira matanaiabar ta Saion diet hadade ma diet guama,
ma ira tamtaman ta Iudeia diet laro,
kanong ta ira num harkurai.
9 Kanong warah, Watong, augu Nong u Naliu Harsakit tano ula hanuo bakut,
ma di raun haut ugu naliu ta ira god bakut.
10 Diet ing diet sip no Watong, i tahut bia diet na malentakuane ira sakana magingin.
I balaure bat diet ing diet te tar tutun ira udiet nilon tana
ma i halon diet mekaia ta ira lima diet ira ut na sakena.
11No Watong i tar ra madaraas ta diet ira ut na takodas
ma ra gungunuama ta diet ing ira kaati diet i gamgamatien.
12Muat ing muat takodas, i tahut bia muat na guama tano Watong,
ma muat na pirlat no halhaliana hinsana.