1Munthu ali wentse omwe an'bvumira kuti Jezu ni Krixtu wakusankhulidwa iye ni Mwana wa Mulungu, na munthu wentse pomwe omwe ana lufoi na Baba, iye ana lufoimbo na Mwana. 2Na tenepo ndipo tin'dziwira kuti tina lufoi na wana wa Mulungu: kucitira lufoi Mulungu na kumbateweza mitemo yace. 3Iri ndiro lufoi na Mulungu: kumbateweza mitemo yace. Nakuti mitemo yaceyo iribe kulemera. 4Ule omwe ni mwana wa Mulungu, iye ambakunda wanthu wakusaya kudziwa Mulungu. Kukonwesa wanthu wakusaya kudziwa Mulungu, n'kukhulupira Mulungu. 5Kodi mbani ambakunda wanthu wakusaya kudziwa Mulungu? Ngule yekha basi omwe ambakhulupira kuti Jezu ni Mwana wa Mulungu. 6Iye ndiye omwe adabadwa na madzi na mulopa, omwe ni Jezu Krixtu. Iye alibe kubadwa na madzi yokha basi, maka madzi na mulopa. Thangwe mzimu ndiwo umbacita umboni nakuti mzimuyo ngwa cadidi. 7Ziripo mboni zitatu: 8Mzimu, madzi na mulopa. Ndipo bzitatubvo bzidaphatana. 9Ninga momwe timbabvumira umboni bwa wanthu, tsono umboni bwa Mulungu ndibo buna basa likulu. Nakuti ni umboni bomwe Mulungu adacitira Mwanace. 10Ule omwe an'khulupira Mwana wa Mulungu, iye anabo umbonibo mumtima mwace. Ule omwe an'saya kukhulupira bzomwe bzimbalewa Mulungu, iye ambamuyesa ngwakunama Mulunguyo thangwe iye ambakhulupira lini umboni bwa Mulungu bomwe adacitira Mwanace. 11Ndipo umbonibo mbubu: kuti Mulungu adatipasa moyo wakusaya kumala, ndipo moyoyo una Mwanace. 12Ule omwe ana Mwana, iye ana moyo. Ule omwe alibe Mwana wa Mulungu, alibe moyo.

13Ndiri kukunemberani bzimwebzi, imwepo omwe mumbakhulupira mudzina la Mwana wa Mulungu kuti imwepo mudziwe kuti muna moyo wakusaya kumala. 14Ici n'cikulupiro comwe tinaco: tikakumbira cinthu centse kuna Mulungu pakupemba, ninga momwe limbalewera fala lace, Iye an'tipasa. 15Tsono tikadziwa kuti iye ambatipasa bzentse bzomwe tin'kumbirabzo ndipo tin'dziwisisa kuti tinabzo kale bzentse bzomwe takumbirabzo. 16Penu munthu aniwona m'bale wace ali kucicita cakuipa comwe cinimupha lini mba amupembere kuna Mulungu ndipo iye an'dzamuciza. Ndiri kulewa wale omwe bzakuipa bzawo bzimbapha lini. Bziripo bzakuipa bzomwe bzimbapha lini. Bziripo bzinango bzomwe bzimbapha. Ndiri kulewa lini kuti mupembere omweyo omwe wacita bzakuphayo. 17Thangwe kuphonya n'khucita bzakuipa, tsono pana bzakuipa bzinango bzomwe bzimbapha lini. 18Tin'dziwa kuti munthu ali wentse omwe ni mwana wa Mulungu ambakhala lini acicita bzakuipa. Nakuti Mwana wa Mulungu ambamukhocherera ndipo Sathani angamucita lini cinthu. 19Tin'dziwa kuti ife ndife wana wa Mulungu, nakuti wanthu wakusaya kudziwa Mulungu ali m'manja mwa Sathani. 20Tin'dziwa pomwe kuti Mwana wa Mulungu adabwera ndipo iye adatidziwisa Mulungu wa Cadidi. Ndipo ife tin'dziwa kuti Jezu Krixtu ni Mwana wa Mulungu. Ndipo Iye ni Mulungu wa Cadidi omwe ambatipasa moyo wakusaya kumala. 21Tuwana twangumwe, khalani na cheru na mirungu yakunama.