1Tuwana twangu, ndiri kukunemberani bzimwebzi kuti muleke kucita bzakuipa. Penu munthu wacita bzakuipa, tinaye kale muimikiri kuna Baba, omwe ni Jezu Krixtu wakulungama. 2Ndipo iye adabziyesa ntsembe pankhankha ya bzakuipa bzathu. Sikuti ya bzakuipa bzathu bzokha basi tsono na bza wanthu wentse wa dziko la pantsi.

3Natenepo ife tin'dziwadi kuti iye tinimudziwisisa tikakhala timbateweza mitemo yaceyo. 4Munthu ule omwe ambalewa kuti: “Ine nimbamudziwa” tsono acisaya kuteweza mitemo yace, iye ni nyakunama ndipo alibe cadidi. 5Tsono munthu ali wentse omwe an'teweza fala lace ana lufoi la Mulungu la cadidi. Na tenepo ife tin'dziwa kuti tinaye: 6Munthu omwe anilewa kuti anaye, mbafambembo ninga momwe Jezu adafambira.

7Wakufunidwa, ndiri kukunemberani lini mtemo upsa, tsono ni mtemo wa kale-kale, omwe imwepo mukhanawo kale kucokera pakuyamba. Mtemoyo ni fala lomwe mudalibva. 8Na tenepo ndiri kukunemberani pomwe mtemo upsa omwe udawoneka na Jezu ndipo uli kuonekambo pomwe kuna imwepo nakuti mdima uli kumala ndipo ceza ca cadidi ciri kutoya. 9Ule omwe anilewa kuti ali paceza, aciwenga mbale wace ndipo omweyo na lero akhali mumdima. 10Ule omwe ana lufoi na m'bale wace iye ali paceza ndipo pamwepo palibe cinthu comwe cinimukhukhumula. 11Tsono munthu ule omwe aniwenga m'bale wace ali mumdima ndipo iye ambafamba mumdimamo, iye an'dziwa lini komwe ali kuyenda thangwe mdimayo udamupha maso.

12Tuwana twangu, ndiri kukunemberani

thangwe mumbalekereredwa bzakuipa mudzina lace.

13Azibaba, ndiri kukunemberani

ule omwe iye ndiye kucokera pakuyamba.

Alumbwana, ndiri kukunemberani

Ine ndiri kukunemberani, tuwana twangu

14Ine ndiri kukunemberani, azibaba,

ule omwe iye ndiye kucokera pakuyamba.

Ndipo ine ndiri kukunemberani, alumbwana,

thangwe mudakhwima, nakuti fala la Mulungu

15Lekani kufunisisa makhalidwe ya mudziko ayai bzinthu bzomwe bziri mudzikomo. Penu munthu akafunisisa bzinthu bza mudziko iye alibe lufoi la Mulungu. 16Bzinthu bzomwe bziri mudziko mpsibzi: kusirira kwa thupi, cimaso-maso, na kusamwa na bzinthu. Bzentsenebzi mpsa Baba lini tsono mpsa mudziko. 17Dziko na bzinthu bzalene bzimbamala tsono ule omwe ambacita bzomwe bzimbafuna Mulungu an'khala na moyo wakusaya kumala.

18Tuwana twangu, nthawe ino njakumalizira, ninga momwe mudabvera kuti ali kubwera muwengi wa Kristu, ndipo tsapano lino azinji ali kusanduka awengi wa Krixtu, pamwepo ndipo tin'dziwira kuti tsapano ni nthawe yakumalizira. 19Iwo adacoka kuna ife, nakuti iwo akhali lini wathu, thangwe iwo angadakhala mbathu angadakhala na ife basi. Bzimwebzi bzinilatiza kuti iwo wentse akhali lini wathu. 20Nakuti imwepo mudadzozidwa na Wakucena, na tenepo mun'dziwa bzentse. 21Ndiribe kukunemberani bzimwebzi thangwe kuti mun'dziwa lini cadidi, thangwe imwepo mun'cidziwa, nakuti palibe cakunama comwe cimbakhala ca cadidi. 22Kodi nyakunama mbani, ngule lini omwe ambalamba kuti Jezu ni Krixtu? Ule omwe ambalamba Baba na Mwana ni mwengi wa Krixtu. 23Munthu ali wentse omwe anilamba Mwana na iyembo pomwe alibe Baba, tsono ule omwe ambabweka kuna Mwana, iyembo ana Baba. 24Na tenepo, bzomwe mudabva pakuyamba bzire mukhale nabzo. Penu mun'khala nabzo bzomwe mudabvabzo, na imwepombo mun'khala na Baba na Mwana. 25Ndipo iye adaticitira cikhulupiriso cimweci comwe ni moyo wakusaya kumala. 26Ndiri kukunemberani bzimwebzi thangwe la wale omwe ambakunamizani wale. 27Ndipo kudzozidwa komwe mudacitidwa na iye, mukhale nako, lekani kudikhira kuti munthu adzakupfundziseni nakuti kudzoza kwace iye kun'kupfundzisani bzinthu bzentse, ndipo iko nkhwa cadidi, n'khwakunama lini, ninga momwe iko kumbakupfundzisirani na tenepo imwepo khalani nako basi.

28Tuwana twangu, khalani mudaphatana naye basi na cikhulupiriro kuti pomwe iye akadzabzilatiza pakubwera kwace, tidzaleke kubisala na manyazi.

29Penu imwepo mun'dziwa kuti iye ngwakulungama, na tenepo imwepo dziwani kuti munthu ali wentse omwe ambacita bzakulungama ni mwana wa Mulungu.