Kalata gwa Paʉli kʉ
Baefesi
Ɨsyakʉlongosya
Akaaja akanywamu akaa Efesi, kaalɨ nkiisʉ ɨkɨ mmasikʉ aga bikʉtɨ Bʉtuluki. Paʉli aatʉʉgeele nʉ kʉlʉmbɨlɨla ɨNdʉmi ɨNunu nkiisʉ kɨla, ɨfyɨnja fitatʉ (Ɨmbombo sya Batʉmigwa 19). Abandʉ bingi baalɨmmwitiike Jesu nkaaja ako nʉ twaja ʉtʉpalamani. Pakabalɨlo akangɨ, bo alɨ mu nnyololo mu Looma, aabasimbiile kalata ʉjʉ, ʉkʉbamanyisya ʉkʉtɨ ʉlwitɨko lwabo mwa Jesu lwalɨ ndʉbaatɨko lwa Kyala, ʉlwa kʉtɨ Kɨlɨsiti aje jo Ntwa gwa fyosa, pakiisʉ na kʉmwanya.
Ʉlʉponio
1Kalata ʉjʉ afumile kʉmyangʉ ʉne Paʉli, ne ntʉmigwa gwa Kɨlɨsiti Jesu, kʉ bwigane bwa Kyala.
Ngʉbasimbɨla ʉmwe mwe biikemo mwe mukʉtʉʉgala nkaaja akaa mu Efesi, mwe biitɨki abagolofu abaa Kɨlɨsiti Jesu.
2Ɨliipyana nʉ lʉtengaano ʉkʉfuma kwa Taata Kyala na kʉ Ntwa Jesu Kɨlɨsiti, fijege na nuumwe.
Ʉkʉkaba ɨsajo kʉ njɨla jaa Jesu Kɨlɨsiti
3Atuufigwege Kyala, ʉGwise ʉgwa Ntwa gwɨtʉ Jesu Kɨlɨsiti, ʉjʉ atʉsajile nɨ sajo syosa ʉkwendela kwa Mbepo Mwikemo. Kʉ njɨla jaa kʉlʉngana na Kɨlɨsiti, tukʉsyambɨlɨla ɨsajo ɨsyo. 4Kyala bo akaalɨ ʉkʉkɨpela ɨkiisʉ, aatʉsʉngwile ʉkʉtɨ tʉjege bandʉ baake, kʉ njɨla jaa kʉlʉngana kwɨtʉ na Kɨlɨsiti. Aabombile bo ʉlo ʉkʉtɨ tʉjege biikemo, kangɨ beelu nkyeni mmyake. Kʉ lʉgano lwake, 5Kyala aatumwile liijolo, ʉkʉtʉsʉngʉla ʉkʉja baanaake, ʉkwendela mwa Jesu Kɨlɨsiti. Aabombile bo ʉlo, ʉkʉkongana nʉ lʉbaatɨko nʉ bwigane bwake. 6Po tʉntuufyege Kyala kwi ipyana lyake iisisya ɨlɨ aatʉpeele ʉkwendela kʉ Mwanaake ʉNkʉndwe. 7Kʉ njɨla jaa iilopa lya Mwanaake ɨlɨ lyalyoniike pa kɨkohekano, ʉswe twabʉliigwe, kokʉtɨ tʉhobokeliigwe ʉbʉtʉlanongwa bwɨtʉ, ʉkʉkongana nʉ bʉkʉlʉmba ʉbwa ipyana lyake. 8Kyala aatʉpeele iipyana ɨlyo kʉ mahala goosa nʉ kʉsyagania. 9Aatʉbʉʉlile ɨsya ndʉbaatɨko lwake ʉlwa mbʉtiitʉ, ʉkʉkongana nʉ bwigane bwake, ʉlʉ aatumwile ʉkʉbomba ʉkwendela mwa Kɨlɨsiti. 10Ʉlʉbaatɨko lwa Kyala lo ʉlʉ, akabalɨlo aka aakasalile bo kafikile, ikwisa kʉfibʉngaania pamopeene ɨfipeligwa fyosa, ɨfi filiko kʉmwanya na ɨfi filipo pakiisʉ. Po Kɨlɨsiti jo ikwisa kʉjaga nkʉlʉmba gwa fipeligwa ɨfyo.
11Kyala aatʉsʉngwile nuuswe ʉkʉja baanaake mwa Kɨlɨsiti. Ʉkʉfuma liijolo aatalile ʉkʉbaatɨka bo ʉlʉ, ʉjʉ ikʉbomba syosa ʉkʉkongana nʉ bwigane bwake, 12ʉkʉtɨ ʉswe twe Bajuuta twe tʉtalilepo ʉkʉnsʉʉbɨla Kɨlɨsiti, tʉntuufyege Kyala kʉ bʉsisya bwake. 13Na nuumwe mwe mukaja Bajuuta, mwapɨliike iisyʉ ɨlya nalooli, kokʉtɨ ɨNdʉmi ɨNunu ɨjaa bʉpoki, mulɨnkʉmmwitɨka Kɨlɨsiti. Joope Kyala alɨnkʉbakolekela na Mbepo Mwikemo, ʉjʉ aafingile ʉkʉbapa, ʉkʉnangɨsya ʉkʉtɨ ʉmwe mulɨ bandʉ baake. 14Mbepo Mwikemo jo gwa kʉtwɨmɨla ɨkɨlɨngo kyɨtʉ, ɨsi sikʉtʉsisimɨkɨsya ʉkʉtɨ Kyala ikwisa kʉtwabʉla loosa, ʉkʉtɨ tʉjege bandʉ baake. Tʉntuufyege Kyala kʉ bʉsisya bwake!
Ʉlwipuuto lwa Paʉli
15Po leelo, nsipɨliike ɨsya lwitɨko lwɨnu kʉ Ntwa Jesu, nʉ kʉtɨ mubaganile abiitɨki boosa abaa mfipanga fyosa ɨfya Kyala. Kʉnongwa jaa ɨsyo, 16ngaleka ʉkʉnngwɨla ʉlʉpi Kyala kʉnongwa jɨɨnu nʉ kʉbasʉʉmɨla. 17Ngʉsʉʉma ʉkʉtɨ, Kyala ʉgwa Ntwa gwɨtʉ Jesu Kɨlɨsiti, ʉjʉ jo Taata ʉNsisya, abape Mbepo Mwikemo, ʉgwa kʉbapa amahala nʉ kʉbamanyisya muno ajɨɨliile, ʉkʉtɨ mummanye kanunu fiijo. 18Kangɨ ngʉsʉʉma abiigʉle amaaso agaa mu ndumbula syɨnu, ʉkʉtɨ mufimanye kanunu ɨfi mukʉsʉʉbɨla na ɨfi aababɨlɨkiile. Ɨfyo kyo kɨlɨngo ɨkɨsisya fiijo, ɨkɨ aafingile ʉkʉbapa abandʉ baake. 19Mugamanye amaka gaake amakʉlʉmba fiijo, aga gikʉbomba ɨmbombo kʉmyɨtʉ twe tʉmmwitiike Jesu. Galɨ bo ʉlwa maka gala amakʉlʉmba, 20aga Kyala aalɨnsyʉkiisye Kɨlɨsiti ʉkʉfuma mbafwe, nʉ kʉmmbɨɨka kʉ kɨboko kyake ɨkiilɨɨlo, pabʉjo ʉbʉsisya fiijo, kʉmwanya. 21Ʉko Jesu jo nkʉlʉmba gwa bʉlagɨli boosa, ʉbʉkʉlʉmba boosa na maka goosa, ʉkʉfikɨnda ɨfipeligwa fyosa ɨfi filɨ nʉ bʉlagɨli, ʉkwandɨla akabalɨlo aka, na aka kikwisa. 22Kyala aalɨmpeele Jesu amaka gaa kʉfilagɨla fyosa. Aalɨmmbɨɨkile ʉkʉja Ndongosi gwa kɨpanga kyake, bo ʉlwa ntʉ mu mbɨlɨ. 23Ɨkɨpanga kya Kyala go mbɨlɨ gwa Kɨlɨsiti. Kɨkaagɨlwa kʉnongwa jaake, ʉjʉ ikʉfipela fyosa ʉkʉsita kwagɨlwa.