1Na kata san yaa ja kundaꞌu ini ni ñayiu vi ja saꞌa ndaa ni,

chi kuini san ja kata san yaa nuu ni, vi Jitoꞌo san.

2Te kuini san kutuaꞌa san ja kaka san nuu ichi ndaa.

¿Te na kiuu saa kii ni ja kikoto ña ni jin san?

Te kokuu san ñayiu vii ñayiu vaꞌa nuu oo san jin ñayiu veꞌe san.

3Te ma ndakani ini san ja saꞌa san ni in jakueꞌe.

Chi skexiko san ñayiu ka kujioo nuu ichi ndaa,

te ma kuandetu san ja na in kitnaꞌa ña ja chikuechi ña jin san.

4Te xtajioo san ndiꞌi jakueꞌe ja ndakani ini san,

te ma saꞌa san ni in jakueꞌe.

5Te skasi yuꞌu san in jichi ni jin ñayiu ka kaꞌan kueꞌe siki inka ñayiu,

te ma kuandee ini san jin ñayiu inu vixin vi ñayiu inu teyii.

6Su ndanduku san ñayiu ja siun ni ka saꞌa guaꞌa ja ka oo taka ñuu,

nagua ja vi koo yatni san jin.

Te maa ni ñayiu ka jika ichi ndaa ka kuu ja vi kokunukuechi nuu san.

7Te ma vi koo ñayiu xndaꞌu ña nuu veꞌe san,

te ni in ñayiu tnoꞌo, ma koo nuu san.

8Te in in neꞌe koskasi yuꞌu san in jichi ni jin ndiꞌi ñayiu kueꞌe ja ka oo nuu ñuu san,

nagua ja saa te xnaa san ndiꞌi ñayiu ja ka saꞌa jakueꞌe nuu ñuu Jitoꞌo.