1Tumanyile kʉtɨ amabhɨlɨ gɨɨtʉ galɨ anzi sheegwi ɨsha khabhalɨlo khashe mʉ nsɨ umu. Ɨleelo we shapongolwa, ʉMʉlʉngʉ akhayiitupa ʉwɨɨkhalo kʉmwanya, ʉwa wiila na wiila, we wʉtalɨ anzi nyumba ye yizenjiilwe nɨ nyoobhe zya bhantʉ. Ʉwɨɨkhalo wʉnʉʉwo mabhɨlɨ amapwa ge gatakufwa. 2Kʉnongwa ye mu sheegwi shiniishi tukubhina, we tʉkʉsʉʉbhɨla kʉkwata amabhɨlɨ amapwa ge wɨɨkhalo wɨɨtʉ ʉwa kʉmwanya. 3Nalyoli tʉkwanzɨwa kʉkwata anza shɨnɨɨsho ɨnga tʉtakhɨmɨɨlɨle pamiiso ga Mʉlʉngʉ ishitali. 4We tʉlɨ mʉ mabhɨlɨ ɨga ge sheegwi ɨsha khabhalɨlo khashe, tukubhina kʉnongwa ya mayɨmba. Te kʉtɨ tʉkwanza kʉzʉʉla ʉmʉbhɨlɨ uwu we wukufwa, lyoli tʉkʉsʉngʉkha kʉwʉkwata ʉmʉbhɨlɨ we wutakufwa, ɨnga ʉmʉbhɨlɨ uwu we wukufwa wumilwe na we wutakufwa. 5ɄMʉlʉngʉ we atulinganizanyiinye lɨnɨɨlyo, atupiiye uMupepu waakwe, ɨnga abhe mpɨnjɨshɨzyo kʉtɨ nalyoli she yɨkhayɨbha.

6Pe insiku zyonti tudandamiine. Tumanyile kʉtɨ, we tʉkʉdɨɨla mʉ mʉbhɨlɨ uwu, tʉkwɨkhala ukutali nʉ Mwene. 7Kʉnongwa ye tʉkwɨkhala kʉ lwɨtɨkho, te kwɨ dala ɨlya kʉlola. 8Nalyoli tudandamiine, khabhɨlɨ tʉkʉlola kʉtɨ kwashi tʉwʉleshe ʉmʉbhɨlɨ uwu, na kʉbhala kwɨkhala nʉ Mwene. 9Pe shɨnɨɨsho, ɨnga tʉlɨ mʉ wɨɨkhalo ʉwa mʉ nsɨ, awe tʉlɨ kʉmwanya peeka nʉ Mwene, ɨshɨgane shɨɨtʉ kʉ kʉmʉkhondezya ʉMwene. 10Kʉnongwa ye yɨkʉtɨ twenti tʉkhayɨmɨɨlɨla pɨlongolela pɨ tengo ɨlya wulonji wa Kilisiti, ɨnga umuntu weeka weeka akhaposheele kʉlandatana nɨ njendo zyakwe, zɨbhe nyinza awe zɨbhe mbiibhi.

11Ishi, kʉnongwa ye tumanyile kʉtɨ tʉkwanzɨwa kumushindikha ʉMwene, tʉkʉyɨkʉngʉla kʉbhalamba abhantʉ kʉtɨ bhamwɨtɨkhaje. ɄMʉlʉngʉ atumanyile akhinza, nɨɨne ɨnkʉsʉʉbhɨla kʉtɨ nɨɨmwe mutumanyile akhinza. 12Tʉtakwanza kʉyɨpaala winza kukwinyu, lyoli tʉkwanza kʉbhabhʉʉzya she ɨmwe mʉkhondeeye kʉyɨpaala kʉnongwa yɨɨtʉ, ɨnga mʉbhe na mazwi aga kʉbhaamʉla bhe bhakʉyɨpaala nhaani she bhalɨ munzi, kʉshɨla she bhalɨ mʉ mwoyo. 13Ɨnga tʉkʉlolekha twe bhalaalusi, tʉkʉlolekha shɨnɨɨsho kʉnongwa ya Mʉlʉngʉ, ɨleelo ɨnga tʉkʉlolekha kʉtɨ tʉlɨ nɨ njeele, ɨpo wukabhi kukwinyu. 14Kʉnongwa ye ʉlʉgano lwa Kilisiti lukuutupa amakha, kʉnongwa ye tumanyile kʉtɨ umuntu weeka áfuuye kʉnongwa ya bhantʉ bhonti, pe shɨnɨɨsho nɨɨtwe twenti uwuntu wɨɨtʉ ʉwɨ maandɨ wufuuye. 15Áfuuye kʉnongwa ɨya bhantʉ bhonti, ɨnga bhatɨkhalaje kʉ shɨgane shaabho, lyoli kʉ shɨgane sha we áfuuye, akhazyʉkha kʉnongwa yaabho.

16Ishi, kufuma akhabhalɨlo ɨkha, tʉtakʉmwenya umuntu wowonti kwɨ dala ɨlya kʉmwenya munzi, poope she akhabhalɨlo khamu twámwenyiizye uKilisiti kwɨ dala ɨlya kʉmwenya munzi, ishi tʉtakʉmwenya winza kwɨ dala lɨnɨɨlyo. 17Pe shɨnɨɨsho, umuntu wowonti we apatinhiine nu Kilisiti, akʉbha aapelwa shipwa. Ɨzyɨ maandɨ zishilile, ishi zyabha mpwa. 18Ɨleelo ganaaga gonti gakufuma kwa Mʉlʉngʉ we atwimvwanyiinye ɨtwe nʉ weene kwɨ dala ɨlya Kilisiti. Nɨɨtwe atupiiye ɨmbombo ɨya kʉlʉmbɨɨlɨla abhantʉ ɨdala ɨlya kwɨmvwanywa nʉ Mʉlʉngʉ. 19Kwe kʉtɨ ʉMʉlʉngʉ abhimvwanyiinye abhantʉ nʉ weene, kwɨ dala ɨlya Kilisiti, sita kʉbhabhaazɨzya imbiibhi zyabho. Khabhɨlɨ ʉMʉlʉngʉ atupiiye ɨtwe ɨmbombo ɨya kʉbhalʉmbɨɨlɨla abhantʉ intumi ɨzya lwɨmvwanyo.

20Pe shɨnɨɨsho, ɨtwe twe bhasonteelezwa bha Kilisiti kʉbhomba ɨmbombo yaakwe. Kʉshɨlɨla amalomu gɨɨtʉ ʉMʉlʉngʉ akubhasundiilila kwɨmvwana nʉ weene. Ye nongwa tʉkʉbhalaabha nhaani mwa Kilisiti kʉtɨ, mwɨmvwane nʉ Mʉlʉngʉ. 21Poope she uKilisiti atáamɨle ni mbiibhi, ɨleelo ʉMʉlʉngʉ amupimbiziizye imbiibhi zyɨtʉ, ɨnga ɨtwe kwɨ dala ɨlya kwɨmvwanywa nu Kilisiti, tʉbhe twe bhagolosu pamiiso ga Mʉlʉngʉ.