1Si Melchizedek, siya Ari ud Salem si awi ya osaʼn pachin Apudyus un Kangatuwan. Si langulilan Abraham un ummoy lakagubyat ot ilabyakla cha opat un Ari, ilabot Melchizedek siya ot binchisyulala. 2Ot illidchon Abraham kan Melchizedek cha ingkasimpuɏun cha losan un lasamsamcha.* Ha piolaʼn uguchon chi ngachen un Melchizedek, ked Arin chi kilalintog ya siya bo Ari ud Salem, hachi kalalaʼn, Ari un mampalin-awa ti ha piolaʼn uguchon chi Salem ked lin-awa. 3Lappun liigili si mipanggop kan amala ya ilala ya ulay bo aappula. Ya lappun bod liigili si liyalakala ya latoyala. Miyalig si Melchizedek un Alak Apudyus un sissiyan pachi ing-inggala.

4Itullong taku ked chi kilangatun Melchizedek, ti ulay si Abraham un leɏpuwan cha Judio, illidchola kan siya cha ingkasimpuɏun cha silamsamla. 5Ha illintog Apudyus mipanggop si ingkasimpuɏu, abus cha galak Levi un pachi alla kalobbongancha un mangawat si ingkasimpuɏu kan cha asin-Judiocha, ulay lu man-iisuchaʼn galak Abraham. 6Ngim ulay lu chakampun un galak Levi si Melchizedek, ilawatla ingkasimpuɏu kan Abraham ya bilinchisyulala siya un langawat si ingkarin Apudyus. 7Ked lappun chuwa-chuwalan ha taguʼn mambinchisyun ked langatngatu lu ha taguʼn binchisyulala. 8Cha papachi un galak Levi langawat si ingkasimpuɏu kan cha tagu, tagucha un matoy. Ngim si Melchizedek un langawat si ingkasimpuɏun Abraham, matattagu siya ti siya imbyegan chi ugud Apudyus. 9Ked maibyega taku un ulay si Levi, un mangaw-awat si ingkasimpuɏu kan cha tagu, ked illidchola bo ingkasimpuɏula gapu kan Abraham. 10Ti chaampun miyalak si Levi si langabtan Melchizedek kan Abraham, ked maibyega taku un awed pay laing si Levi si long-eg apulaʼn Abraham.

11Ked ammu taku un illidchon Apudyus chi lintog kan cha Judio un libyeseɏ si lanchutukala kan cha galak Levi un papachi. Lu umalay chi kilapachi un mampalintog si tagu, achipun otyan masapuɏ un awed sabyalin pachi un umali un isun chi kilapachin Melchizedek, un chakampun si kilapachin Aaron. 12Ti lu masukatan chi kilapachi, masapuɏ bo un masukatan chi lintog. 13Ti lampeɏpu si sabyalin kilapuun si Apu taku, ked lappun ulay ossaan kan cha galakla un lansimbi un pachi si altar. 14Ti lalaweg un lampeɏpu si Apu takuʼn Jesu Kristu si kapuun Judah. Ked lappun imbyegan Moses mipanggop si kilapachin cha galak Judah.

15Ked lalawlaweg chi alla lu awed sabyaliʼn pachi un lumoswa un isun Melchizedek. 16Ha lambyalilan Jesus pachi chakampun un mipagapu si lintog un isun chi singgalak kan siya, ngim gapu si pallakabyelin mipanggop si biyeg un mallalayun. 17Ti ha imbyegan chi liigilin ugud Apudyus mipanggop kan siya,

18Ked liwalin chi chachaan un lintog ti lakapsut chi kabyebyelinla ya lappun simbila. 19Ti lappun kabyebyelin chi lintog Moses un mampalintog si tagu. Ked si sala, laatod kan chitaku chi labibbiɏu un lamlama un umacheliyan taku kan Apudyus.

20Ked awed bo ingkarin Apudyus. Lappun kamatchi si ingkarila si lampachiyan cha uchum. 21Ngim si lambyalilan Jesus pachi, ingkarin Apudyus kalan kan siya:

22Gapu si allaʼn ingkarila, si Jesus chi mambyalin un malakcheɏ taku si labibbiyu un katuɏagen Apudyus si tagu lu ha chachaan.

23Ha chamu, achu cha papachiʼn lampaspasali lampachi ked achipuncha lantuɏuy si kilapachicha ti lato-latoycha. 24Ngim si Jesus, sissiya kilapachila ti matatagu ing-inggala. 25Ked hachi gapula un kabyeeɏalaʼn malagu kan cha umacheli kan Apudyus gapu kan siya ti matatagu ing-inggala un mangiyàaɏuk kan chicha si sangwalan Apudyus.

26Ked si Jesus chi kangatuwan un pachi un miyapot kan chitaku. Ti laapudyusan siya, lappun kachillawala, lappun byasuɏla, lisila kan cha malagbyasuɏ ya lipangatuʼd langit. 27Chakampun un isun cha uchum un kangatuwan un papachi un biligat un masapuɏʼn manchatun kan Apudyus gapu si basuɏla ya byasuɏn cha tagu. Ngim si Jesus, lamingpingsan chi langichatulala si mismuʼn long-egla un matoy ked umalay ing-inggala taplu mapakawan cha byasuɏn cha tagu. 28Ti mibyeseɏ si lintog Moses, awed cha taguʼn lachutukan un kangatuwan un pachi, ulay lu lakapsutcha. Ngim ha ingkarin Apudyus, un ummun-ulud si lintog, chilutukala un kangatuwan un pachi Alakla un lappun byasuɏla si ing-inggala.