Langatngatu Si Jesus Lu Si Moses
1Ked, susuludku kan Kristu un chilutukan Apudyus un mantagula ya ilayagela un mipati kan siya ud langit, somsomkon taku si Jesus un biligbig taku, siya imbuun Apudyus kan chitaku ya kangatuwan un pachi taku. 2Ked si Jesus, mantegod kan Apudyus un lanchutuk kan siya, un isun bod chi mantetegod Moses un lansimsimbi kan cha losan un tagu si paminyan Apudyus. 3Ngim langatngatu si Jesus lu si Moses, un ha aligla, lapotpotog chi taguʼn lampaud si byeɏoy lu ha mismuʼn byeɏoy un pilaudla. 4Ti kacha byeɏoy ked awed chi lamaud. Ngim ha langwa si losa-losan ked si Apudyus. 5Isun Moses, un tuttuwaʼn mantegochen un bubùulon si paminyan Apudyus. Imbyegala cha byaleg un impakaammun Apudyus un makwa si umaliʼn eɏgew. 6Ngim si Jesu Kristu, mantegochen un Alak un mangayyuwan si paminyan Apudyus. Ked chitaku paminyan Apudyus lu ituɏuy taku un siteteɏod ya popotpotan taku lamlama taku.
Ha Lumin-awaan Cha Tagu Kan Apudyus
7Ked ha koon taku, tuttuwaon taku hachiʼn liigili un intudtuchun chi Ispiritun Apudyus un kalala,
“Si salaʼn eɏgew, lu chongɏonyu ugud Apudyus,
8achiyu patangkilon chi somsomokyu un isun cha aappuyu si awi un summuplingcha kan Apudyus,
langin-in-ancha si Apudyus si inggewancha si lugeɏ un lappun ummili.
9Ti ulay lu intutullongcha killingwak si ulog chi opatpuɏuʼn tawon, sissiyan mangin-in-ancha sakon.
10Ked hachi summangaan Apudyus kan cha aappucha, ot kalala.
‘Pappasig umaadchayu cha somsomokcha
ya achipuncha tuttuwaon cha bilinku.’
11Ked ha summangaan Apudyus, ingkarila un kalala,
‘Pulus lu mapachasancha lin-awaʼn insasaggalak.’ ”
12Ked susulud un mamati, an-allechenyu ta lappun otyan lawwing chi somsomokla kan chikayu ya achipun mamati kan Apudyus ta achipunyu man-awichen si Apudyus un matattagu. 13Ngim ha koonyu, ileɏgew otyan un man-asisegeg kayu lu awed pay laing timpu ta achi kayu maallilaw makabyasuɏ ya tumangkin cha somsomokyu. 14Ti kadwa taku si Jesu Kristu lu ipapati takuʼn mangituɏuy si pammati taku inggala si alungus chi eɏgew. 15Imbyebyeggan chi ugud Apudyus:
“Si salaʼn eɏgew, lu chongɏonyu ugud Apudyus,
achiyu patangkilon chi somsomokyu un isun cha aappuyu si awi
un summuplingcha kan Apudyus.”
16Silu cha langngeɏ si imbyegan Apudyus ngim summuplingcha kan siya? Chicha losan chi impuyut Moses si langitallayala ud Egypt. 17Ya silu bo cha summangaan Apudyus si ulog chi opatpuɏuʼn tawon? Cha taguʼn lakabyasuɏ un langkakatoy si lugeɏ un lappun ummili. 18Ya silu bod cha taguʼn langikariyan Apudyus un achipunla chicha peɏlokon si hachiʼn pita un man-illongancha? Cha achipun tummuttuwa kan siya 19Ked ammu taku un achipuncha mapachasan chi lumin-awaan kan Apudyus ti achipuncha lamati kan siya.