1Achim omɏan cha lalaklakay lu sika, ngim ammam iyug-uggud un isun chi amam. Ya ibilanglu cha laan-alak lu sika suludlu. 2Ya cha mangkabyakot, ibilanglu chichà ilam ya cha byebyeɏasang, ibilanglu chicha susuludluʼn byebyai un lappun lawwing si somsomoklu.

3Asikasuwonyu cha labyaɏu un lappun uchum si mangasikasu kan chicha. 4Ngim lu awed aalakcha willu apucha, tudtuchuwam chicha ta chicha mangasikasu si ilachaʼn labyaɏu, ti ha byeyancha umun-ulaʼn mangwaancha si akomcha un laapudyusan, ya subyalitancha cha kingwan cha chachakkeɏcha ti hachi mampagalas kan Apudyus. 5Ngim cha labyaɏuʼn lappun mangasikasu kan chicha, si Apudyus abus chi lamlamaonchaʼn tumuɏung kan chicha, ked iluwaluwalucha si ileɏgew ya lilabi un manchawat si tuɏung Apudyus. 6Ngim ha labyaɏu un siyad pin-ala somsomkon cha pion chi long-egla, isun chi lalattoy kan Apudyus ulay lu matattagu. 7Itudtuchum cha alla kan cha mamati ta lappun mapabyasuɏancha. 8Ngim lu awed achipun mangasikasu kan cha agila, amod gey cha kabyeɏoyla, isun chi lan-awichela pammatila, kan sillumawwing lu cha achipun mamati.

9Cha ilistayuʼn labyaɏu un makasapuɏ si tuɏung, cha mantawon si olompuɏu willu labyakbyakot ya achipun kasin langasawa.* 10Masapuɏʼn laammuwan cha losan un bibiɏu killingwala, un isun cha in-ilolaʼn lamachakeɏ kan cha aalakla, malagmangilicha ya lapakumbyabyachaʼn lansimbi kan cha mamati,† tiluɏungancha cha manligligat ya impapatilaʼn langwa si bibiɏu.

11Ngim achiyu ilista cha labyaɏu un chaampun bumakbyakot ti lu gumatong chi timpu un pionchaʼn mangasawa, man-awichencha si Kristu. 12Ked hachi machusaancha, ti achipuncha tungpaɏon chi ingkaricha kan Apudyus un kooncha.‡ 13Ked mambyalincha masachut ya man-attu-attuncha kan cha byebbyeɏoy, ya maam-amod ti ilugichaʼn mallikud ya mangkiyakiyap si lappun bibiyangcha. 14Ked itudtuchuk kan cha labyaɏu un chaampun bumakbyakot un un-ulloy lu kasincha mangasawa ta umalakcha ked awed asikasuwonchaʼn byeyancha, ked lappun wayan cha mampabyasuɏ un mangamsiw kan chitaku. 15Ti awed cha uchum un labyaɏu un lagamputcha lansagung kan Satalas.

16Ked lu awed mamatiʼn byebyai ya awed labyaɏu si agila, masapuɏʼn siya mangasikasu kan siya ya achipunla ipabiyang kan cha mamati. Ked cha mamati siyad asikasuwoncha cha labyaɏu un lappun mangasikasu kan chicha.

17Ked cha allaʼn mangipangpangu kan chikayuʼn mamati un bibiɏu mangkokopyacha, masapuɏʼn ipotogyu chicha ya chog-anyu tangchencha, amod gey cha mangipapati un mangibyegbyega ya mantudtuchu si ugud Apudyus. 18Ti ha liigiliʼn ugud Apudyus kalala, “Achiyu bunguton chi tupok chi luwang un man-ilikonyu taplu makwa un mangan lu piola.”§ Ked ha osa bo, “Masapuɏʼn matangchalan chi mangkawachiyon.”*

19Ya achiyu tuttuwaon chi ipabyasuɏn chi osa si osaʼn mangipangpangu malaksig lu awed chuwa willu tiɏu mantistigu un tuttuwaʼn lakabyasuɏ. 20Ngim lu awed lakabyasuɏʼn mangipangpangu, omɏanyu si sangwalanyuʼn mamati ta umogyat cha uchum un mangwa si kamatchi.

21Timothy, bililok sika si sangwalan Apudyus ya si Jesu Kristu ya cha lachutukan un angheles ta tuttuwaom cha losan un imbyegbyegak, un lappun laksigom si tagu. 22Achika achanchalutuk si mangichaɏan kan chikayuʼn mamati, ya achika mikama si mambyasuɏan cha uchum. Ya allechem ta achika makabyasuɏ.

23Chakampun un abus chi chelum si ilumom, ngim masapuɏm chi akit un byeyas† ta maagasan chi sakit chi buwanglu.

24Awed cha uchum un taguʼn mamàila byasuɏcha, ked mampapattak un machusacha. Ngim cha uchum, achipun milasin cha lakabyasuɏancha, ngim asi maila lu alungus chi eɏgew. 25Ked kamatchi un mamàila cha bibiɏu un pin-an cha uchum un tagu koon, ya ulay cha achipun milasin un bibiɏu, achipuncha mitaɏu si ing-inggala.