1-2Ha allaʼn suɏatmi kan chikayu, awed chi ibyegami mipanggop si hachiʼn kalanchaʼn Ugud un siya mampeɏpuwan chi biyeg un mallalayun. Sigud un illiinggew kan Apudyus un Ama si chamchamuʼn chaampun chi lubung makwaan, ngim lambyalin tagu ot illinggew si allaʼn pita, ked intullongmi siyaʼn ustu. Chingngeɏmi bo ugudla ya ilappachenmi bo long-egla. 3Ked cha hachiʼn intullongmi ya chingngeɏmi, ipakaammumi kan chikayu ta mitipug kayu kan chikami ya makatimpuyug kami kan Apudyus un Ama taku ya si Jesu Kristu un Alakla. 4Ked ha mangisuɏatanmi kan cha alla, taplu miyustu-ustu galas taku.

5Allaya chingngeɏmi si hachiʼn Alak Apudyus ked ipakaammumi kan chikayu: Si Apudyus chi silaw, ti lappun pulus pangot kan siya. 6Ked lu ibyega taku un lakatimpuyug taku kan siya ngim iinggew taku si manggikbot, mantuntulli taku, ti achipun mitimbuɏuy chi katatagu taku si katuttuwaan. 7Ngim lu iinggew taku si padcha un isun Apudyus, bibiɏu makatimpuyugen taku kan cha susulud takuʼn mamati ked machuɏsan taku kan cha losan un byasuɏ taku mipagapu si chaɏan Jesus un Alakla.

8Lu kalan taku un lappun byasuɏ taku, tuntulliyan taku long-eg taku ked makaan chi katuttuwaan kan chitaku. 9Ngim lu ipudlu taku cha byasuɏ taku kan Apudyus, pakawalola ya peɏkasola chitaku kan cha losan un kilalawwing. Ti si Apudyus ked mantegochen ya ustu-ustu pin-ala koon. 10Ngim lu kalan taku un achipun taku lambyasuɏ, mambyalilon taku si Apudyus matuli, ked achipun limuɏa cha ugudla si somsomok taku.