1Ngim susulud, achipun makwa un mantudtuchuwak kan chikayu un isun chi mantutudtuchuk kan cha lootong chi pammatila un ichaychaɏan chi Ispiritun Apudyus. Mantudtuchuwak kan chikayu un isun chi lailubungan un tagu ya isun cha alak un malluglugi un mamati kan Jesu Kristu. 2Ked hachi gapun chi achipunku langitudtuchuwan si lachaɏom kan chikayu, ti ha illinggewak utlat isuyu alak un sissiyan sumusususu, un achipun makagòeɏ si mangkot-ong un makan. Ked sissiya kayu si sala un isun cha alak un achipun makaawat si uchum. 3Ti sissiyan lailubungan kayu. Ti man-asiapos kayu ya man-asisubog kayu, ked gapu si kamatchiʼn kilasasaedyu siya mampaloklok un isuyu cha achipun mamati. 4Isun cha uchum un sakon kalu suɏutoncha, ked cha uchum si Apolos kalu bo suɏutoncha. Hachi mangilasilan un siyad tuɏachonyu cha ugalin cha achipun mamati.

5Ti silu si Apollos? Kan silu si Paul un pin-ayu mansusubogen? Bubùulon chikami kan Apudyus un mansimsimbi kan siya si mamatiyanyu, ked kacha osa kan chikami koola ipakwan Apudyus kan siya. 6Ha miyaligela, sakon chi langimuɏa si bukeɏ, si Apollos chi lansibug, ngim si Apudyus chi lamachakeɏ. 7Ked ha langimuɏa ya pin-a malibog, chakampun un lapotpotogcha lu si Apudyus un mamachakeɏ. 8Lappun lansabyaliyan chi langimuɏa ya lalibsibug, ti man-isucha kan Apudyus, ked si umaliʼn eɏgew, gunggulaan Apudyus chi kacha osa sigun si killingwala. 9Ti chikami kan Apollos, mankadkadwa kami un mansimsimbi kan Apudyus. Ked chikayu isun cha pappayaw Apudyus un ipakawachila ya isuyu byeɏoy Apudyus un impapaudla kan chikami.

10Gapu si kachegun Apudyus un illidchola kan sakon, isun chi lalaingak un lamaud si byeɏoy un laleman chi langisaachek, ked cha uchum un tagu, chicha isun chi mangituɏuy mampaud si hachiʼn illugik. Ngim kacha osa masapuɏʼn ammala leman chi in-ilolaʼn mampaud. 11Ti achipun makwa un sukatan chi ulay siluʼn tagu chi misaachen, siya abus si Jesu Kristu. 12Ked cha mangituɏuy mampaud, mansabsabyali in-iloncha. Ti cha uchum useɏoncha byalituk, gambyang ya cha mangkangila un byetu si mampauchencha si byeɏoy taplu bibiɏu ya mangkoscheɏ. Ngim cha uchum, useɏoncha kayu, guɏun ya chagammi. 13Ti ha mangulilan Kristu siya eɏgew un manguisala kan cha losan, hachi mangitullongan si kilaustuʼn chi killingwan chi kacha osa, ti ha mangipain-ala, isun chi soggola cha losan ta siya mangitullong si mallalayun ya mangkiged. 14Ked lu achipun masgob chi lapaud un ustu lisaachela, gunggulaan Apudyus chi lampaud. 15Ngim ha taguʼn masgob chi killingwala, achipun Apudyus gunggulaan siya. Matagu bò amin, ngim isun chi lailisi si apuy.

16Ha achipunyu ammu un chikayu templon Apudyus ti bilumɏoy chi Ispiritula kan chikayu? 17Ked cha taguʼn manyam-an si templon Apudyus, yam-alon bod Apudyus siya. Ti laapudyusan chi templon Apudyus ked chikayuʼn mismu templola.

18Ked, ilanyu ta achiyu tuntulliyan chi long-egyu. Lu awed kan chikayu mangibilang si long-egla un lalaing un mibyaseɏ si kilalaing cha achipun mamati, masapuɏ otyan un ipabyabyala somsomokla ta koola tuttuwaʼn kilalaing un mampeɏpu kan Apudyus, ulay lu amsiwon cha tagu. 19Ti lappun simbila kan Apudyus chi kilalaing chi lailubungan. Ti ha liigili si ugud Apudyus, kalala, “Ha useɏon Apudyus si mangɏogela kan cha taguʼn lalaing ked ha mismuʼn kilasikapcha.”* 20Ked ha osaʼn liigili, kalala bo, “Ammun Apudyus un ha somsomok cha mangkalaing un tagu ked lappun simbila.”† 21Ked lappun otyan mangipasinchayaw si tagu si kabyeeɏalaʼn koon. Ti illidchon Apudyus losan un mangkuwayu.‡ 22Ked ha katuttuwaan, ilaminla illidchon chikami un mansimbi kan chikayu, ti illidchola si Paul, Apollos, Peter, ha allaʼn lubung, biyeg kan otoy, si sala ya si umaliʼn eɏgew, losan ked mangkuwayu. 23Ti chikayu para kan Kristu, ked si Kristu para kan Apudyus.