1Susulud, sakon si Paul un chilutukan Apudyus ta man-apostoles Jesu Kristu. Ya biɏunku si Sostenes un osaʼn sulud takuʼn mamati. 2Maluɏat kami kan chikayu un pin-a manchetchetong un malaychayaw kan Apudyus utlat Corinth. Pililiyan Apudyus chikayu un tagula mipagapu si pammatiyu kan Jesu Kristu, ya losan un tagu si kaili-ili un manchaychayaw kan Jesu Kristu un Apu taku losan.

3Sapay otyan ta kacheguwan chikayu kan Ama takuʼn Apudyus ya Apu Jesu Kristu, ya palin-awaoncha somsomokyu.

4Manyamayamalak kan Apudyus gapu si kachegula kan chikayu mipagapu si lamatiyanyu kan Jesu Kristu. 5Ti si litimpuyugenyu kan siya, achu lapotog un imbinchisyunla kan chikayu pati man-ugud ya kilalaingyu. 6Ot kummoscheɏ pammatiyu kan Kristu un intudtuchumi kan chikayu. 7Ked ilaminyu ilawat cha losan un binchisyun Kristu ked lappun mangkuɏanganyu si laispirituan un kabyeeɏan si manguuwayanyu si mangulilan Apu Jesu Kristu. 8Ked si Apudyus, pakoskoscheɏola pammatiyu inggala si alungus chi eɏgew taplu lappun mapabyasuɏanyu si mangulilan Apu Jesu Kristu. 9Mantegochen si Apudyus un lanchutuk kan chikayu un makatimpuyug kan Alaklaʼn Jesu Kristu un Apu taku.

10Susulud, mipagapu si kalobbongan chi ngachen Jesu Kristu un Apu taku, chawatok kan chikayu ta mantitimpuyug kayu losan, taplu achi kayu mansilasila, taplu man-os-ossaan otyan cha somsomokyu ya panggopyu. 11Hachi ibilinku kan chikayu, susulud, ti imbyegan cha uchum un tagun Chloe un man-asiillisit kayu. 12Ti ha chingngeɏk, mansabsabyali takcheɏanyu, un kalan kalu cha uchum, si Paul suɏutoncha, ked cha uchum, Apollos kalu bo suɏutoncha, ked cha uchum bo, Peter kalu, ya cha uchum, si Kristu.

13Ha lasilasila kamman si Kristu kan chikayu? Ha Paul kamman chi lilansa si krus gapu kan chikayu? Willu labunyagen kayu kamman gapu si ngachen Paul un chakampun un si Kristu? 14Manyamalak ti lappun bilunyagek kan chikayu, malaksig kan cha Crispus kan Gaius, 15ked lappun singkalan kan chikayu un bilunyagek chikayu si ngachenku. 16O, bilunyagek oyya cha Stephanas un simbyeɏyan, ngim lappun uchum si masmasmokku un bilunyagek. 17Ti chakampun un imbuulak kan Jesu Kristu un mambunyeg, ngim imbuulak kan siya un mangibyegbyega si bibiɏuʼn chameg mipanggop kan siya. Ked chakampun un useɏok chi kilalaing chi tagu un mangibyegbyega, ta siyad maawisan cha tagu latoyan Kristu si krus un siya mapakawalan cha byasuɏ taku.

18Ha bibiɏuʼn chameg mipanggop si latoyan Jesu Kristu si krus, lappun simbila kan cha taguʼn mibyellu. Ngim kan chitakuʼn matagu gapu si lamatiyan taku, siya main-an chi pallakabyelin Apudyus un malagu kan chitaku. 19Ked hachi bo kalan chi liigiliʼn ugud Apudyus si awi un kalala,

20Ked lappun ituɏung chi kilalaing cha mangkalaing ya lan-acheɏ, ya ulay bo cha kasasallubyak si allaʼn pita. Ti impakpakaammun Apudyus un achipunla potgon cha kilalaing utla pita ti lappun simbila kan siya. 21Ti ha kilalaing Apudyus, achipunla palubusan cha tagu un mangwacha si mataguwancha gapu si kilalaingcha. Ti ha piola, matagu cha mamati si ugudla un ibyegbyegami, un lappun simbila si somsomok cha achipun mamati. 22Lappun bo simbila si somsomok cha Judio ti pioncha un awed mipailaʼn lakaskaschaaw si maluttuwaancha. Ya ulay bo cha Gentil, siya bò singsingtoncha kilalaing chi tagu. 23Ngim siyad ibyegbyegami latoyan Kristu si krus. Ked cha Judio, sasangngaonchaʼn chongɏon, ked cha Gentil, lappun simbila kan chicha. 24Ngim kan cha losan un chilutukan Apudyus un mantagula, Judio man willu Gentil, maawatancha losan un si Kristu un ibyegbyegami, siya mangitullongan si pallakabyelin Apudyus ya kilalaingla. 25Ti ha planun Apudyus ked mataguwan taku, ked lalallaing lu ha kilalaing cha tagu ulay kalan cha uchum un lappun simbila. Ked ha langkapsutan Apudyus un ha latoyan Jesu Kristu, un kalanchaʼn lappun simbila, siya bo langabyak Apudyus kan cha losan un lalaing.

26Susulud, achipun taku otyan maliwatan chi kilasasaed taku si lanchutukan Apudyus kan chitaku, ti manmalu kan chitaku lalaing, langatu saedla willu alak chi byaklang. 27Ti pililiyan Apudyus cha kalaʼn cha taguʼn lappun simbila. Ti ha panggopla, ibibiinla cha taguʼn masmas-om si kilabyelincha ya kilalaingcha lu umaliʼn eɏgew. 28Ya pililiyala bo cha taguʼn labyabya ya maam-amsiw utla lubung, ta mangipain-ala un lappun simbin cha losan un potpotgon cha tagu. 29Taplu lappun tagu si mamaspasweɏ si sangwalan Apudyus. 30Ti si Apudyus chi langwa si lipatiyan taku kan Jesus Kristu, ked lambyalilola si Kristu siya leɏpuwan chi kilalaing taku. Mipagapu kan siya, maibilang taku un lalintog ya pummeɏkas taku ya ibilang Apudyus chitaku un lappun byasuɏla kan siya. 31Tuttuwa hachiʼn liigili un ugud Apudyus un kalala, “Losan un mamaspasweɏ, siya otyan ipasweɏla chi killingwan Apu Jesus.”†