Hodáwand mani talár ent
Pa sázger o washáwázáni sálárá. Hodáwanday hezmatkár Dáuday Zabur. Dáudá é Zabur hamá wahdá pa Hodáwandá per bast ke Hodáwandá cha sajjahén dozhmenán o cha Sháulay dastá rakként. Dáudá chosh gwasht:
1Oo Hodáwand, oo mani zór o wák! Tará báz dósta dárán.
2Hodáwand mani talár ent, mani kalát o mani rakkénók ent,
mani Hodá mani talár ent o hamáiay poshtá báhóth o mayára bán.
Á mani espar ent, mani zórákén rakkénók o mani sangar.
3Hodáwandá ke satá o sanáay láhek ent tawára kanán o
cha wati dozhmenána rakkán.
4Markay sád o bandán maná patátagat o
tabáhi o zawáliay hár o hirrópán maná torséntagat.
5Mordagáni jahánay sád o bandán patátagatán o
gón markay dámá, dém pa dém atán.
6Wati paréshániáni tahá Hodáwandon tawár jat o
komak lóthagay peryáton wati Hodáay gwará borz kort.
Áiá cha wati parasteshgáhá mani tawár eshkot o
mani komak lóthagay peryát áiay góshán raset.
7Nun zemin chandhet o jomb o jóshá lagget,
kóháni béh o bonyát ham larzetant,
chiá ke á hezhm geptagat.
8Cha áiay pónzá dutt dar átk o
sóznákén ásé cha dapá,
taptagén angar zobánok janagá atant.
9Ásmáni ér áwort o jahl átk,
syáhén jambar áiay pádáni chérá at.
10Karrubiéay bánzoláni sará neshtagat o
gwátay bánzoláni sará bál at.
11Taháróki wati pósháki kort o
jambaráni gobár o syáhén hawri wati chágerday kápár kortant.
12Rozhn o drapshnáki cha áiá démá at o jambar chest bayagá atant,
taptagén seng o ácheshén angar dara kaptant.
13Hodáwandá cha ásmáná grandet o
borzén arshay Hodáyá cha taptagén seng o ácheshén angarán wati tawár sar dát.
14Áiá wati tir shántant o dozhmen sheng o sháng kortant,
gróki dawr dát o sargardáni kortant.
15Daryáay ápráh gendag butant o
donyáay bonyát paddar,
cha tai neherr o hakkalán
cha tai pónzay trondén gwátá, oo Hodáwand!
16Áiá cha borzádá dast shahárt o maná gepti,
cha zyádahén ápá maná dar áworti o
17cha zóráwarén dozhmená rakként,
cha áyán ke napratesh mani sará próshtagat,
chiá ke cha man zórákter atant.
18Sakki o sóriáni róchá, mani démá dar átkant,
bale Hodáwand mani posht o panáh at.
19Áiá maná práh o émenén jágahé áwort o
maná rakkénti, chiá ke cha man báz wassh o razá at.
20Hodáwandá pa mani pahrézkáriá gón man néki kortag,
mani dastáni pákiay mozz bakshátag,
21chiá ke man Hodáwanday ráh yalah nadátag o
cha Hodáyá dém pa badiá nashotagán.
22Áiay parmán modám mani chammáni démá butagant o
áiay hokm cha wat dur nadáshtagant.
23Áiay démá tamán o béayb butagán o
watá cha gonáhá dur dáshtag.
24Hodáwandá mani pahrézkáriáni mozz dátag,
áiá mani dastáni páki distag.
25Taw gón wapádárán wapádár ay o
gón tachkénán tachk.
26Gón pákénán pák ay o
gón repkkárán chálák.
27Chiá ke taw békebrána rakkénay,
bale porkebr o gorunákán chamjahla kanay.
28Oo Hodáwandén Hodá! Taw ay ke mani cherágá rozhnága kanay.
Hamá ent ke mani tahárókián róshena kant.
29Gón tai madatá lashkaréay sará orosh o hamlaha barán o
gón Hodáay komaká ent ke cha borzén diwálán koppa kanán.
30Haw! Hodá, áiay ráh tamán o kámelén ráhé,
Hodáay habar béayb ant,
pa harkasá ke áiay gwará panáha zurit, esparé.
31Hodáwandá abéd, kay Hodá ent o
Hodáyá abéd, kay talár?
32É Hodá ent ke maná zór o wáka dant o
mani ráhá tamán o béayba kant.
33Mani pádán áskáni paymá téza kant o
maná borziáni óshtagá láhekia dant.
34Mani dastán pa jangá ázmudaga kant,
tán báskon brenjén kamáná beloppénit o chóth bekant.
35Taw wati sóbén bayagay espará maná bakshay o
rástén dastet mani posht o panáh ent,
tai narmdeli o békebri maná mazania dant.
36Taw mani pádáni chéray ráhá práha kanay
tánke pádon malarzant.
37Dozhmenáni randá kapán o
mani dast pa áyána rasit,
tán halák mabant, pera natarrán.
38Anchosh zeminá janán ke pád áyagay móh o wákesh mabit,
mani pádáni chérá kapant.
39Taw pa jangá maná zór o wáka bakshay o
dozhmenán mani pádáni chérá dawra dayay.
40Mani pádán dozhmenáni gardenay sará éra kanay o
man wati dozhmenán gár o gomsára kanán.
41Pa komaká peryáta kanant bale rakkénóké nést,
cha Hodáwandá komaka lóthant, bale passawa nadant.
42Man áyán háka kanán o gwátá dayán,
damk o kuchaháni gelay paymá chandhán.
43Taw maná cha mardománi jang o chópána rakkénay o
kawmáni sardára kanay,
hamá mardom mani hezmatá kanant ke manesh pajjáha nayárán.
44Tán mani tawárá eshkonant, parmána barant,
darámad mani démá wati sará jahla kanant.
45Á deltrakka bant,
larzán o drahán cha wati kalátána tachant.
46Hodáwand zendag ent. Pa mani talárén Hodáyá názénk.
Mani rakkénókén Hodáyá shán o shawkat bát.
47Hodá ent ke mani bérá gipt,
kawm o ráján mani chérdastiá nádénit o
48maná cha dozhmenána rakkénit.
Haw! Taw mani dozhmenáni démá maná sarperáza kanay o
cha zálemén mardomána chotthénay.
49Oo Hodáwand! Paméshká tará kawmáni nyámá satá kanán o
tai námá názénán.
50Á wati bádsháhá mazanén sób o pérózia bakshit o
wati rógen per moshtagéná mehra kant,
bezán Dáud o áiay nasl o padréchá tán abad.