Paulo La Ginigini Baisa TAITO
Kabovitouula
Matauna Taito gala guma Yudia eidubumi Yesu Keriso e itugwali titoulela bimila towotetila bipilasi Paulo. E deli ititavinasi ikamitulaisi Bulogala Bwaina paila Yesu Keriso. E Paulo igini miyana Paulo La Ginigini Baisa Taito paila eisilavi Taito isisu mapilana Kiriti, mwada biyamati ekalesia mapilana valu.
E miyana leta bitabani kwaitolu vavagi kwevakaveka.
Ikugwa Paulo ikatululuwai Taito avai bubunela ibudoki tokugwala ekalesia, paila bidubadu mina Kiriti si bubunela saina gegedu.
Oluvi Paulo iluki ammakawala bipilasi ekalesia la boda ituwoli ituwoli, makawala tommoya, nunumoya, nakubukwabuya, tokubukwabuya e deli mabudona tokwatupipi.
E kala vigimkovila Paulo iluki Taito avai bubunela bibudoki totapwaroru komwaidosi. Eigini kidamwa ibodi deli ninasi manum bikalubailasi, bipakaisi pugipogi, kominimani e deli tavilevi olopola mabudona ekalesia.
Buki kala katumimisa
Kala vitouula 1.1-4
Ekalesia kasi tokugwa 1.5-16
Avaka ibudoki si wotetila mabudosina olopola ekalesia 2.1-15
Mimilisi katuloluta, e deli buyoyu 3.1-11
Kala vigimkovila 3.12-l5
1Yeigu Paulo la towotetila Yaubada deli la aposetolo Yesu Keriso.
Yaubada inagaigu iwitalaigu kidamwa bapilasi si dubumi matausina Yaubada la tomota availa availa leinagi, e bavakadi kidamwa bikatetasi kala vakeda uulela tapwaroru. 2Paila vavagi makwaisina uula tapikwakwaisi paila bitamovagasisi. Paila igau gala isim valu watanawa Yaubada ikatotila makawala. Yaubada einigibogwi e gala isasopa paila bitamovagasisi makawala. 3E tuta matutona einagi, baisa avaka ikatotila iyomitali ola biga. E makwaina biga isakaigu kidamwa bakamituli, e asilasola goli paila uula la karaiwaga Yaubada kada Tokwatumovasi.
4E lagini m leta yoku Taito paila lokupataigu mokwita ogu dubumi, makawala da dubumaisi baisa Keriso Yesu.
Anigada baisa Yaubada Tamadasi deli Keriso Yesu kada Tokwatumovasi paila yoku, kidamwa bimitukwaiyaim e bitalaguva lopom.
Taito la wotetila mapilana Kiriti
5Paila asilavaim mapilana Kiriti mwada bukusebuliki vavagi gala isim kala katubaiasa, deli bukunagi ekalesia kasi tokugwa mapilasina ovalu Kiriti. Mitaga kululuwai ulo vituloki, 6baisa makawala. tokugwa ekalesia gala bibodi bisim pikolela wowola; matauna gala ibodi bivilayawa; ibodi litula totapwaroru, deli gala ibodi tomota bidokaisi magudisina tosiligalaguva deli tokowolova. 7Matauna tokugwa ekalesia gala bibodi bisim pikolela wowola, paila uula matauna kasi tokugwa la towotetila Yaubada. Gala ibodi nanola bikaiveka, kaina bigibuluwa, kaina bimomom, kaina bikaluvalova, kaina bigugoveka. 8Ibodi bimitukwaii kala ugowaga, deli biyebwaili avai vavagi bwaina. Ibodi bimanum, bikudubwaila, bikikili titoulela, deli taga bikatudewa. 9Ibodi biyosikikiti bigala tapwaroru avaka gagabila bitadubumi, paila baisa kala vituloki uulela tapwaroru. E mapaila gagabila bikatululuti tomota metoya ola vituloki duwosisia, e bivituloki si sula matausina ipakaisi mabigana.
10Paila bidubadu tokwamagwesi isisuaisi, tobigimakava deli tokapidakala matausina. E bidubadu matausina, mina Yudia leiluvapelasi totapwaroru osi boda, matausina goli si bubunela makawala. 11Ibodi bitakatupatu udosi bisimwaisi bigatona. Matausina goli iyogagaisi bidubadu tomota deli litusia, paila iuvitulokisi vavagi makwaisina avaka gala bibodi uulotoula tapwaroru, magisi tomota si mani bikauwaisi. Ka, baisa saina kabommosila goli. 12Omitibogwa taitala guma Kiriti, matauna goli taitala osi tovitoubobuta, kawala, “Tuta komwaidona mina Kiriti toubuwabu deli tokudigaga deli togugoveka mina nunumata.” 13E avaka leikamituli baisa biga mokwita. Mauula baisa bukukwamitilaki sainela bitovagasisi osi tapwaroru kwekamokwita. 14Taga wala biyosisi mina Yudia kasi libogwa deli taga biyosisi tomota si karaiwaga, paila matausina mwada tokwaraiwaga bogwa ipakaisi kamokwita. 15Vavagi komwaidona migileu paila matausina mina migileu; mitaga gala kwaitala vavagi bimigileu paila matausina tokwamgwalala deli gala todubumi, paila si nanamsa deli ninasi kala mimilakatila bogwa eiyogwalaisi. 16Ilivalasi mwada Yaubada inikolaisi mitaga si bubunela iyakali makwaina nikoli wala. Matausina tokowolova deli tokapidakala, e gala wala ibodi avai vavagi bwaina bivagaisi matausina.