Yesu ivitububoti Bwala Kwebumaboma kala katudadaimi
(Mk 13.1-2; Lk 21.5-6)
1Yesu isilavi Bwala Kwebumaboma, ililoula; e la toligalega imakaiasi ikavitusaisi Bwala Kwebumaboma. 2Mitaga ivitakauloki matausina, kawala, “Lokugisaisi vavagi makwaisina komwaidona ke? Kululuwaisi baisa! Igau gala kwaitala makwaisina dakuna bikanukwenu odabala sola, mitaga komwaidona bilisaisi watanawa.”
Tuta mwau la kaloubusi
(Mk 13.3-13; Lk 21.7-19)
3Bogwa isili wa Koya Umilela Olibe, toligalega kasimwaleta imakaiasi matauna, kawasi, “Kulukwaimasi ammakawasi kweluva baisa bitokaia? Avai kabutuvatusi paila yoku bukuma, deli paila tovana valu kala vigimkovila?”
4E Yesu ivitakauloki matausina, kawala, “Kuyamatasi taga availa bisinapwaimi. 5Paila bidubadu bimaisi bikavitagaisi yagagu, bikaibigasi, kawasi, ‘Yeigu Mesaia!’ e bisinapwaisi bidubadu. 6Bukulagaisi butula kabilia katitaikina deli bulogala kabilia kaduwonaku, mitaga taga biyowa lupomi; paila ibodi vavagi makwaisina bikaloubusibogwa; mitaga tovana valu kala vigimkovila igau. 7Paila bitokaia kabilia; tuwoli tomota bivataisi sola tuwoli tomota, e kabokwaraiwaga bivataisi sola tuwoli kabokwaraiwaga; e bitokaiasi molusaula deli likuliku ambaisa ambaisa. 8Metoya komwaidona vavagi makwaisina igigadi bikaloubusi tuta mwau.
9“Wa tuta matutowena bikasalaimi ommayuyu bidubadu saina mwau, e bikatumataimi; e komwaidosi tomota ovalu watanawa bikoulovaimi paila uula kubokulaigusi. 10Oluvi bidubadu bikapusisi, bikasalaisi sesia, bikoulovaisi sesia. 11Tovitoubobuta kaponai bidubadu bisunapulasi e bikiwolaisi bidubadu. 12Kowolova karaiwaga bidubadu bisunapulasi, mapaila bidubadu si bobwailila bimamasi. 13Mitaga availa bipeuloki tovana valu okala vigimkovila, matauna bimova. 14E tomota bikamitulaisi Bulogala Bwaina paila Labuma Karaiwogala baisa valu valu komwaidona, mwada komwaidosi mina watanawa bilagaisi. E wa tuta matutona tovana valu kala vigimkovila bima.
Tuta matutona kala mwau
(Mk 13.14-23; Lk 21.20-24)
15“Mapaila igau bukugisaisi Makwaina Vavagi Kaboyogwala bipeili la ligisa Yaubada. Daniela tovitoubobuta bogwa leilivala paila makwaina. (E ibodi tokwalawa bikateta.) 16Wa tuta matutowena ibodi tosisula Yudia bisakaulasi wa koya; 17matauna isisu obuneyova gala ibodi bikau la guguwa metoya ola bwala; 18e matauna isisu obuyagu gala ibodi bikaimilavau bikau kala kakapula. 19Wo! kapisisi minasina nasusuma deli minasina iuvanunusi wa yam makwaisina! 20Bukunigadasi kidamwa gala bukusakaulasi okala kweluva katubugibogi, kaina wa sabate. 21Paila wa tuta matutowena mwau sainela bitokaia. E kala mwau gala avaka bipati metoya kala vitouula watanawa e lagaila. E igau tuta bima gala bitokaia makawala baisa. 22Kidamwa Yaubada gala bikelituli yam kala bawa, gala availa bimova. Mitaga bogwa bikelituli uula mwada bipilasi matausina availa availa bogwa leinagi.
23“E kidamwa availa bilukwaimi, kawala, ‘Ka, kugisi Mesaia baisa emaima,’ kaina ‘Ka baisa ewaiwa,’ taga bukudubumaisi baisa. 24Paila bitokaiasi Mesaia kaponai toyo tovitoubobuta kaponai, bivagaisi kabutuvatusi kwevakaveka deli kaboyowalula, mwada bisuninaisi matausina availa availa Yaubada einagi goli, kidamwa igagabila. 25Ka, lalukibogwimi.
26“Mapaila kidamwa bilukwaimi, kawasi, ‘Ka, matauna isisu oviloupakala,’ taga bukulokaiasi; e kidamwa bikaibigasi, kawasi, ‘Ka, matauna isisu olopola bwala,’ taga bukudubumaisi makwaina. 27Paila yeigu Latula Tomota bama makawala kavikavila kidamwa bikavila okwaibwaga e bititapi baisa obomatu.
28“Ambaisa tomata bikanukwenu, baisa mluveka bitogugulasi mwada bikamsi.
Latula Tomota bimaima
(Mk 13.24-27; Lk 21.25-28)
29“Igau biwokuva tuta mwau matutona, oluvi nanakwa kalasia bidudubila, tubukona gala bilumalama, utuyam bikapusisi metoya wa labuma, e avai peula avai peula isisuaisi wa labuma biyegasi. 30Oluvi kabutuvitusila Latula Tomota biyoumatila wa labuma; e komwaidosi mina watanawa bivalamsi; e bigisaigusi yeigu Latula Tomota bamaima olowalowala labuma deli peula toyo guyugwayu sainela. 31Bitagilulu tauya kwaiveka, e bawitali ulo anelosi bilosi ovalu watanawa wokulula kwaivasi, e bikogugulaisi availa availa bogwa lanagi metoyasi ambaisa ambaisa labuma ikalitobu.
Seuseu la vituloki
(Mk 13.28-31; Lk 21.29-33)
32“Ibodi bukukwatetasi seuseu la vituloki kwaitala. Igau osisila itaginapulasi e yekwesila itamsi, kunikolaisi kala kweluva milamala katitaikina. 33Makawala goli, tutala yokomi bukugisaisi vavagi makwaisina komwaidona, bukunikolaisi tuta matutona katitaikina, makateki goli bitokaia. 34Kululuwaisi baisa; kami tubwa matubona ola tuta Yaubada bivigimkulovi komwaidona vavagi makwaisina. 35Labuma deli valu watanawa biwokuvasi, mitaga ulo biga gala biwokuva.
Gala availa inikoli yam makwaiwena
(Mk 13.32-37; Lk 17.26-30,34-35)
36“Mitaga gala availa inikoli paila yam makwaiwena kaina tuta matutona, gala anelosi wa labuma goli, kaina Latula, mitaga Tamagu kalamwaleta goli. 37E yeigu Latula Tomota bama makawala avaka ikaloubusi ola tuta Nowa. 38Paila makawala wa yam makwaisina igau gala bidadoya, ikamkwamsi imomomsi, iveivaisi ipukupakusi, ee! yam makwaiwena Nowa eisila ola waga. 39E gala binikolaisi avaka ikikaloubusi igau tutala leima dadoya, e komwaidosi idoumlabasi; e bikaloubusi makawala tutala yeigu Latula Tomota bama. 40Wa tuta matutona, taiyu tauwau obuyagu bibigubagulasi; Yaubada bikau taitala e taitalaga bisim; 41nayu vivila bitutusi kasi witi bimila pwarawa; Yaubada bikau natana e natalaga bisim.
42“Mapaila kuyuuyausasi; paila gala kunikolaisi avai yam bima mi Guyau. 43Ibodi bukululuwaisi kidamwa tolibwala binikoli avai tuta wa bogi toveilau bima, bogwa biyausa e gala bitagwala bikopwali bwala. 44E makawala yokomi, bukuiyamwasisi; paila avai tuta gala kupikwaku - e, yeigu Latula Tomota bama.
Touwata tosalau kaina tomitugaga
(Lk 12.41-48)
45“Mapaila avai tolibaku tosalau deli tokabitam? Matauwena kala tokwaraiwaga leivigaki kasi tokugwa la towotetila komwaidosi, mwada bisaiki budala kʹasi okala tuta mokwita. 46Bimwasawa touwata matauna kidamwa kala tokwaraiwaga bima e bibani matauna iuvagi makawala. 47Kululuwaisi baisa! - bivigaki matauwena tokwaraiwaga paila la guguwa komwaidona. 48Mitaga kidamwa matauna touwata gaga goli, bilivala onanola, ‘Bogwa eiyobali agu tokwaraiwaga.’ 49E bivitouula biwawaiya budala, e bikamkwam bimomom deli matausina imomomsi kabotutu, 50e avai tuta gala ipikwaku kala tokwaraiwaga bima wa tuta gala inikoli, 51e bitapupoi wowola matauna, bibani kala mipuki deli tokwatudewa gaga. Baisa tomota biuvalamsi e bipulummosilasi sainela.