Ana la nigada
1E Ana inigada kawala:
“Guyau bogwa eivakasau nanogu deli mwasawa,
mapaila ulo mwasawa ikalisau paila avaka matauna bogwa leivagi.
Ulo mwasawa ikalisau paila Yaubada bogwa ipilasaigu!
Mapaila agigili agu tilaula.
2“Gala taitala tobumaboma makawala Guyau.
Gala wala taitala makawala matauna,
deli gala wala taitala tokwala bwaina makawala da Yaubadasi.
3Desi kaigivakaveka deli mi kamnomwana,
deli mi biga kaluvalova.
Paila Guyau matauna Yaubada inikoli avaka avaka,
deli iiyakali komwaidona avaka tomota iuvagaisi.
4Tokwabilia topapeula si kaiyala bogwa eitawoulasi,
mitaga tomamama ipeulasi.
5Tomota matausina omitibogwa eikomitigagasi.
Mitaga baisa tuta ipeulasi titoulesi paila bitakunasi kʹasi,
e tokamolu gala tuvaila ikamolusi.
Vivila minana omitibogwa nakaliga.
Mitaga baisa tuta eivilulu tailima taiyu litula,
e nasevalulu gala wala litula.
6Guyau matauna tokatumata deli toyomova.
Matauna iwitali tomota ilosi mapilana Tuma,
e oluvi ikaimilivau matausina tuvaila.
7Matauna ivigaki mimilisi tomota inamakavasi,
mimilisiga ivigaki isim si guguwa bidubadu.
Matauna ivabu mimilisi matausina metoya osi kaisisu,
e mimilisiga ilupi walakaiwa.
8Matauna isimiliwoli tonamakava metoya opwaipwaia,
matausina gala isim si guguwa ilupi metoya okasi mwau.
Ivigaki matausina ivakatusi deli gweguya dalesi,
e isaili matausina osi kabosisu isim kala taimamila.
Valu watanawa tumilela baisa Guyau la vavagi,
e metoya wa tumila makwaina, matauna bogwa ibubuli valu watanawa.
9“Matauna ikoli si momova la tomota tokimadagi,
mitaga mina mitugaga itamwausi odubilikitakita.
Gala wala avai tau bitomgwaga metoya ola peula titoulela.
10Guyau bibutupilapala metoya wa labuma,
e kala tilaula bogwa wala bidoumsi.
Guyau Yaubada matauna biyakali valu watanawa komwaidona,
deli bikatupewoli matauna availa einagi paila biguyau.
E guyau matauna bogwa leinagi, Guyau Yaubada bivigaki bitomgwaga wala.”
11Oluvi Elikana ikaimilavau ola valu mapilana Rama, mitaga Samwela isim wala mapilana Sailo, e iwotitali Guyau metoya ola vakeda Ilai matauna tolula.
Litula Ilai
12Ilai litula matausina todubakasala. Matausina gala itovilakaisi Guyau, 13deli gala ikabikuwolaisi karaiwaga makwaisina avaka ikaraiwagasi paila tolula ibodi bikau metoya baisa tomota. Mitaga tutala avai tau bigibugabu la lula, e tolula la touwata bimakaia matauna deli la kaisusuwa mitilatolu matala. Igau wala bisulusulu viliona, 14matauna la kaisusuwa bibabikoli olopola kulia, e avai vavagi wala bibabi, baisa tolula la vavagi. E ivigakaisi makawala wala baisa komwaidosi mina Isireli, availa availa imaisi mapilana Sailo paila bilulasi. 15Tuvaila, igau wala gala bikauwaisi posa bigabwaisi, e tolula la touwata bima biluki matauna availa eisisaili la lula, bikaibiga kawala, “Kusakaigu sitana viliona paila tolula bikabwasi. Kidamwa viliona bukusulu e bukusaiki, gala bitagwala bikau, mitaga kidamwa gala kala sulu e bikau.”
16Kidamwa matauna tau bikaibiga kawala, “Ibodi bitavagaisi avaka duwosisia e bikugwa bitagabwaisi posa, oluviga bukukwau avaka magim,” tolula la touwata bikaibiga kawala, “Gala! Kusakaigu wala baisa tuta. Kidamwa gala, balebu wala!”
17Makwaina si sula Ilai litula saina mwaugaga omatala Guyau, paila Guyau kala lula ivigakaisi kabokatudewa wala.
Samwela isisu mapilana Sailo
18E tuta pikekita wala magudina Samwela isetuwoli iwotetila paila Guyau, e isikoma kwama miyana yabumaboma. 19Taitu kwaitala kwaitala inala ibubasi yatala yakekita kala kwama. E avai tuta bilosi deli la mwala bigabwaisi lula paila taitu makwaina, e minana biuyoki miyana kwama bisaiki matauna. 20E oluvi Ilai bikabwaili Elikana sola la kwava, e tuvaila biluki Elikana kawala, “Ibodi Guyau bisakaim tuvaila litumwa metoya baisa minana e bikaimapu kabala magudina bogwa lokukwabomi.”
Bogwa leiwokuva, e bikeiitasi osi valu.
21E Guyau bogwa ikabwaili Ana, e ibani taitolu tuvaila tauwau deli nayu vivila. E magudina Samwela itoveka iuwotetila paila wala Guyau.
Ilai deli litula
22Ilai tuta baisa bogwa wala eitomoya, mitaga tuta komwaidona ililagi wala bulogasi avaka avaka litula ivigakaisi mina Isireli. E deli goli ilagi mwada imisiaisi minasina vivila ipupaisewasi omatala Guyau la Buliyoyova. 23E iluki matausina kawala, “Avaka uula lokuvagaisi makwaisina vavagi? Komwaidona tomota goli ilukwaigusi avai mitugaga kuuvagaisi. 24Litugwa, desi! Makwaina vavagi saina wala gaga, avaka komwaidona Guyau la tomota eilivalaisi baisa paila yokomi. 25Kidamwa taitala tau bisula baisa sola, e Yaubada ibodi bipilasi matauna. Mitaga availa bipilasi taitala kidamwa bisula baisa Guyau?”
Mitaga gala wala inakaigalaisi avaka la biga tumasi, paila Guyau bogwa eininamsi bikatumati matausina.
26E magudina Samwela isetuwoli ititoveka e ibani kala kabwaila metoya baisa Guyau deli goli tomota.
Vitoubobuta paila Ilai litula
27Taitala tovitoubobuta imakaia Ilai deli kwaitala biga metoya Guyau. Ikaibiga, kawala, “Avai tuta guyoula Itipita ivigaki la ula tabum Eroni deli litula, e yeigu ayomitali titoulegu baisa Eroni. 28Metoya komwaidona dalela Isireli anagi dilatala, dalela Eroni ulo tolula kidamwa biwotetilasi okabolula deli bigabwaisi maiina simasimina, deli bisikamsi miyana epodi mwada miyana vavagi bikibuboti nanogu. E yeigu lasaiki matausina si koni bikeulasi kasi vilavila metoya avaka tomota bigabwaisi okabolula. 29E avaka paila ikau mitami makwaisina lula deli semakavi avaka ulo tomota isisakaigusi? Mwa! Ilai, avaka uula kutemmali litumwa saina siligaga gala makawala yeigu agu taimamila, paila kutugwali matausina bikamkwamsi e bikikaitubwasi metoya makabilasina kabilipusoposa avaka ulo tomota si lula eigibugabusi baisa yeigu? 30Yeigu mina Isireli si Guyau deli si Yaubada alivala biga katotila omitibogwa baisa veyamwa deli dalem paila biwotitalaigusi makawala tolula tuta gala wala biwokuva. Mitaga tuta baisa yeigu akaibiga gala bavigivau tuvaila! Mitaga batemmali matausina availa availa itemmalaigusi, e bakaluwou matausina availa availa ikaluwouwaigusi. 31Kulagi, tuta bogwa leimaima avai tuta bakatumati tubovau tomota metoya veyamwa deli dalem, e gala taitala tau metoya veyamwa bisisu wala bila bibodi kala tomoya. 32Bogwa bukunokubukubu deli bikikau matam komwaidona kabwaila, avaka bogwa basaiki dala ituwoli olopola mina Isireli e galaga dalem. Mitaga gala tuvaila taitala veyamwa bisisu wala bila bibodi kala tomoya. 33Mitaga bakatupali taitala wala metoya veyamwa komwaidona bisisu tomomova, e matauna bivagi la wotetila tolula. Mitaga igau bikau matala e bitamwau komwaidona la pikwaku, deli komwaidona veyamwa ituwoli bogwa bikatudoumwaisi metoya wa kema. 34Avai tuta litumwa kasitaiyu Opani sola Peniasi bikaligasi yam kwaitala wala, e baisa bivitulokaim vavagi komwaidona lalivali gala wala bisala. 35E banagi taitala tolula e matauna tokimadagi baisa yeigu, e deli bivagi vavagi komwaidona avaka magigu bivagi. E batagwala matauna bibani dalela tuvaila, kidamwa tuta komwaidona biwotetilasi omatala matauwena guyau bogwa lanagi. 36Kidamwa availa metoya oveyamwa bisisuaisi tommomova, ibodi matausina bilokaiasi tolula matauna e binigadasi baisa matauna mani deli kaula, e biyoulibigasi baisa matauna tolula kidamwa bitagwala bipilasaisi tolula, e metoya baisa sitana bikamsi kobwaga.