1Nagaya Yonina agoana hagotenoma hanea ikaene mopaene hage limoene fanane higeno haegafa ikaene mopaene age-mainoe. 2Nagaya alu aotage kumala, haegafa Yelusalemu, Anumaya Kotia ikapinagati ataleno elavigena agoe. Agogeno amoa vema aligahe kanale kenama fai-lineno kanale konagali ali-maleno velema nevia augafa kava huno elavigena age-mainoe. 3Nagaya havugeno ala sauve kanomo sialeti nago ala kegefafiti mage huno hie “Menia Anumaya Kotia veanene tokaeno maigahie. Ani veamogami amunopi mainesigeya mukia veala agaia veane maisageno Anumaya Kotiami maigahie. 4Maineno amaunua aye hami-talesigeya nagoene veala ofaligahae. Amaipamoa kana ohinageya avia oategahayanagino amakata aisaya yamoenena hano hugahie. Nayoma nemaiya augafa auava yamoa ani kanafina hano hugahie.” huno hu-maine.

5Higeno ala Sauve kanomo sialema maiya kanomoa mage huno hie “Haviho nagaya mukia yana ago alina haegafaage hu-maluanagino haegafa huno hanegahie. Mani kea tamage nehue. Mukia veamoya haviya amakupi maleya amametiti hisaya yafe mani kelamage ke nehugi kae-malo.” 6Mage huno nahapaiye “Mukia aliyania hai alivaya aye-mainoe. Nagaya mukia tokiyamona aepaa mainoanagina kava yagai-mainena mukia yana ali vayayesoa kano mainogi uhagotena maitena haenagalafa mainoe. Veamoya tifema amakesigeya hamaimu alisaya tina kapaima nehagea tinagiya miya ohugahagi afaa amamisugeya negahae. 7Veamoya Sataniene tuma huya agasesayana nagaya mani kanale yayaga afaa amamigahue. Amamitena nagaya Anumayaami maisugeya amakaya nagai nafaneyaga maigahae.

8Maigahagi koli nehaya veanene, nagaifema haviya amakupima nomalaya veanene, amakuamo oniyaage humai veanene, veama hamaeya falimate veanene, kumai heya vai neayaya veanene, hanageke kavama nehaya veanene, ago fali-mainaya veafe ‘Anumayati maine.’ huya amakisana nevaiya veanene, havigeage veanene himanaage atama nelea yafayagamoa atama tegelege nehia komufi hanea yate taviya maigahae. Ani veamoya hagoteya fali-mainayanagiya ani atama nelea komufima visayana tole (2) yupa eteya faligahae.”

9Anile sevenia (7) yopafi, haenagalafama Anumayamona hai vai-mateno ali haviya humatesia yamaa hanea yopayagama atafa hu-linaya ensole veapiti nago kanomoa nagaifena mage huno hie “Kagaya egena Sipi sipi nafanemoa menima ama alitesia anea kavelino.” huno hie. 10Higena Alu Aotage Avamumoa tusiya huno natafa huteno navaleno nagola anayapi hai-mainea agoyafi mo nateteno alu aotage kumala, Yelusalemua, Anumaya Kotitegati ikapinagati ataleno elavia kumala naveli-maine. 11Nave-ligena agoana Anumaya Kotina tokiyaage hale yamaamoa ani kumatela aivasa humaine. Hale yamaamoa tusiya huno alua augafa kava huno ala miyamo hai-mainea yafatetima aivasa nehia avamete kava humaine. Ani yafamo agia yasipa taugosama neagona galasimoma nehia kava huno alave alave higena halegena age-mainoe. 12Neagogeno ani ala kumatela kegiya anayapi hu-malageno hane. Ani kegiya kovefina tuelufua (12) fiana hane. Ani fiamo amete ametela ensole veala hetiya maite maite humainae. Ani fitatela tuelufua (12) Isaleli nofi veamogami amakia kae-malenae. 13Ani kegiyafima hanea fiana yagema vayi nehilega tagufa (3) fiane. Yagema tavi nefalea kaiyaga tagufa (3) fia hane. Aluga aluga haopalega nago haopalega tagufa (3) fia hanegeno nago haopalega tagufa (3) fia hanegeno humaine. 14Ani kegiya ala kumatema aye-govema huya kegiyama humalayana hagoteya tuelufua (12) yafana amalaguma aimale yatela maleteya kegiya hu-malenae. Ani yafatela Sipi sipi nafanemona tuelufua (12) aposolo vayamogami amakia kae-malenae.

15Nagaienema kea kea hia ensole kanomoa ani kumaene kegiyaene fiaene maleno agege gege huno hapaligahe kanileta yafateti talo humale kayona ali-line. 16Ali-lino eaamo me maleno ageana ani ala kumala ayaayaamoene nago kaiyagaamoene anayafima hai-maineaamoenena nagotineno nago avamete tueti tu hataleti (2,200) kilomita higeno mukiamoa nago avamete humaine. 17Higeno maleno neagea kayoteti ani kegiyamona maleno ageana amegama hanemamoa veamoyama maleyama neagaya augafa kava huno vani hataleti fotifo (144) mita humaine.

18Ani kumate kegiya Anumaya Kotima hu-maleana ala monemo hai-mainea yafana yasipae nehaya yafateti hu-malene. Hu-maleteno ani kumatela kanileta yafateti ki-malegeno aivasa huno alave alave hia yamoa galasimoma hia kava humaine. 19Ani ala kumatema amalagu aimale yatema hu-maleana kegiyale malenaya yafana ala miyakefa hai-mainea yafateti malete malete huno humalene. Hagotenoma malegamae-malenea yafamo agia yasipa. Anima tole molia yafana oko yafamo agia sapaiya malene. Anile tagufama (3) molia yafana nagola efeage yafamo agia agetie huno malene. Anile foa (4) molia yafana yosa haisa yafamo agia emelalie huno malene. 20Anile faefu (5) molia yafamoa efeene haesaene havigu humainea yafamo agia satonikisie huno malene. Anile sikisima (6) molia yafana haesa yafamo agia konilianie huno malene. Anile seveni (7) molia yafana kanileta yafamo agia kalisolaitie huno malene. Anile eiti (8) molia yafana yosa haisa yafamo agia pelie huno malene. Anile naeni (9) molia yafana nagola kanileta yafamo agia topasie huno malene. Anile teni (10) molia yafana yosa haisa kaliteno kaniletamaa hanea yafamo agia kalisopelesie huno malene. Anile aleveni (11) molia yafana oko yafamo agia haiyasinie huno malene. Anile tuelufuma (12) molia yafana haesa yafamo agia ametisie huno malene. 21Ani kumamo kegiyalema hanea fita tuelufua (12) fitmona miyamaamoa hai-mainea seveliyateti talo humale fita hane. Nagoke nagoke fitalela nagoke ala seveliyateti talo humalene. Ani kumatema visaya katela kanileta yafateti talo hu-malenegeno alave alave nehigeno akalo katema he-nemalaya galasimoma hia kava higeya age hagalo huya age-mainae.

22Agogeno ani kumatela nagola mono nona omalegena age-mainogi tusia tokiyaa hanea Anumaya Kotiene Sipi sipi nafanene ani kumatela mainaageya mukia veamoya anakai anakima alisaga haya yafenagino mono no kana huana mainaagena age-mainoe. 23Agogeno ani ala kumatela yagemoene ikamoene aivasa hisia aliyaania omalegi Anumaya Kotina tokiyaage hale yamaamo ani kumatela tusiya huno aivasa hu-maigeno Sipi sipi nafanemoa ani kumate kanila maine. 24Mainaageno ani kumateti hale yamo aivasa hu-mainegeya mukia koteti veamoya vai neyesageya mukia ma mopafi Sauve vayamoya kanale-nale yaamia aliya ani kumate esayaamoya emaigahae. 25Mainesageno ani kumatela hanina okigahianagiya ani kegiyamo fita aliya okigahae. 26Mukia veamoya konagali yaamiene ala amakiene aliya ani kumatekeya egahae. 27Egahayanagi kefo yamaagema nehaya veanene, amakuamo oniyaage hu-mainea veanene, havigeage veanenena ani kumatela ometafa huya omegahae. Omegahagi Sipi sipi nafanemo avopima, maige maige hisaya hamaimuma hanea avopima amakima kae-malenesia anagamoya amakaiamige ani kumatela ehaigahae.