1Siraw mahahakay a yapo do trībo no Epraim, naychipeh sa a machigobat, kan namtang sa do Oksong Jordan a nangay do Sapon. Binata da di Jepta a kon da, “Āngo ta inabtang mo sa ginobat Ammonitaw a dyi mo yamen a tinawagan a omnarāyat a somidong dyinyo? Maynamot ta komwan pinarin mo, sosohan namen bahay mwaw a myan kad irahem!”

2Tinbay ni Jepta a kāna, “Yaken kan siraw tawotawo kwaw, taywaraw nakapachikontra namen dyirad Ammonita saw. Ki do nakatawag kwaw dyinyo, insalākan nyo aba yaken yapo dyira. 3Do nakaboya kwaw sya a dyi nyo yaken a insalākan, inposta ko byay ko a namtang a nachigobat dyirad Ammonitaw, as kan intoroh ni ĀPO ballīgi dyaken. Āngo ta mangay kamo a machigobat dyaken sichangori? Pakawanen!”

4Do dāwri, chinpeh sa ni Jepta tabo mahahakayaw no Gilead, kan ginobat da saw yapwaw do trībo no Epraim. Inābak da sa no taga Gileadaw taga Epraimaw, ta inoyaw da sa no taga Epraim a kon da, “Inyo a taga Gilead, tod kamo a nagtālaw a nachiyan do tana no trībo no Epraim kan Manasses.” 5Sinākop da no taga Gileadaw pamtangan saw do Oksong Jordan a lomongo do Epraim tan abo makalības. Kāda myan taga Epraim a padāsen naw magtālaw, as mangdaw so pamalōbos a mamtang, yahes danchin taga Gileadaw a kon da, “Taga Epraim kawri?” An atbay na, “Engga,” 6akdawen da dya a abneken naw, “Syibbolet.” Ki an abneken na a kāna, “Sibbolet,” ta makabnek aba so kosto, tiliwen kan dinimanen da do asaw a pamtangan no Oksong Jordan. Nangdiman sa so apat a poho kan dadwa rībo (42,000) a yapo do trībo no Epraim do dāwri a chimpo.

7Nangipangōlo si Jepta so Israelita so anem a katawen. Sinpangan na, nadiman si Jepta a iyaw taga Gileadaw, as naitābon do idi na do Gilead.

8No somarono a nangipangōlo siras Israelita do nakadimanaw ni Jepta, ki si Ibsan a taga Betlehem. 9Tatdo a poho potōt na a mahahakay kan tatdo a poho potōt na a mababakes. Inpakabahay na saw potōt naw a mababakes dyirad matarek saw a partīdos. As nangisabat so tatdo a poho a mababakes a yapo do matarek a partīdos a inpakabahay na dyirad potōt naw a mahahakay. Inpangōlwan na saw Israelitaw so papito a katawen. 10Sinpangan na, nadiman si Ibsan, as naitābon do Betlehem.

11No somarono nangipangōlo siras Israelita do nakadimanaw ni Ibsan, ki si Elon a yapo do trībo no Sabalon. Inpangōlwan na saw Israelitaw so asa poho a katawen. 12Sinpangan na, nadiman si Elon, as naitābon do Aidyalon do tana no trībo no Sabalon.

13No somarono nangipangōlo siras Israelita do nakadimanaw ni Elon, ki si Abdon a pōtot ni Hillel a taga Piraton a nangipangōlo siras Israelitaw. 14Apat a poho pōtot na a mahahakay kan tatdo a poho apoko na a mahahakay. Nagsakay sa do papito a poho a asno. Nangipangōlo si Elon siras Israelita do wawaho a katawen. 15Sinpangan na, nadiman si Abdon a pōtot ni Hillel, as naitābon do Piraton do tana no trībo no Epraim do katokotokonan dan Amalekita do nakarahan.