1Do dāwri, narapit kapaychapteng a aran do tana a Kanaan, kan nadidiw no kāda pamilya a aran pamilya ni Jakob. Ki do nakatonengaw sya ni Jakob a myan irek do Egipto,* inbahey na dyirad pōtot na saw a kāna, “Āngo ta nāw nyo a masalasalap a magselleng? 2Nadāmag kwaw a ari kono irek do Egipto. Mangay kamo a gomātang, tan dyi ta madiman do kapteng dya!”

3Do dāwri, nangay saw asa pohwaw a aākang ni Jose do Egipto a gomātang so irek. 4Ki pinawnot aba ni Jakob si Benhamin a mismo a ādi ni Jose dyirad aākang na saw a mangay do Egipto, ta mamo an myan marahet a maparin dya. 5As dawa, siraw pōtotaw ni Jakob, ki nangay sa akma dyirad kadwan saw a taga Kanaan a mangay do Egipto tan gomātang sa so irek da. Ta aran do Kanaan, ki maychapteng sa tabo daw.

6Do dāwri a kangay dan pōtotaw ni Jakob, ki si Jose iyaw gobirnador do tābo a Egipto, as iya paw makatoneng do kapaglāko so irek do tabo tawotawo do Egipto kan tabo tawotawo a yapo do matatarek a logar. Dawa, do nakawara daw daw no kakakteh na saw, ki nangay sa di Jose, as nagrōkob sa do salapen naw. 7Do nakaboyaw ni Jose siras kakakteh na saw, nanyeng na sa nailāsin. Ki inkaskāso na saba a akmaw dyi na sa chapatak. Midyo na sa kelkelgaen a akmay ipsok na sa. Inyahes na dyira a kāna, “Dino nakayapwan nyo?”

Ki tominbay sa a kon da, “Yapo kamyaw do Kanaan, mo āpo. Mangay kami dya a gomātang so kanen namen.”

8Oyod a nailāsin sa ni Jose a siraw aākang naw. Ki sira, ki polos a dyi da mailāsin si Jose a ādi da. 9Ki do dāwri, nanakem ni Jose iyaw tinayēnep naw a maynamot dyira.† Binata na dyira a kāna, “Bayataw kamo! Ispya kamo āno? Yangay nyo āno a sisiimen tanaya kan pagkapsotan namen tan abāken nyo yamen?”

10Ki initbay da a kon da, “Ay enggaw, mo āpo ko. Tod kami a mangay dya a gomātang so kanen namen a tobotoboyen mo. 11Makakakteh kami, ta asaw āmang namen. Yamen a tobotoboyen mo, ki mapagtalkan kami. Ispya kami aba!”

12Ki tominbay si Jose a kāna, “Engga! Nangay kamo dya, ta sisiimen nyo tanaya kan pagkapsotan namen, tan abāken nyo yamen!”

13Ki initbay da a kon da, “Yamen a tobotoboyen mo, ki asa poho kami kan dadwa makakakteh. Asaw āmang namen a omyan do tana a mayngaran so Kanaan. Iyaw boridek namenaw, ki ari a nabidin di āmang. As no asaw, ki araba.”

14Ki binata ni Jose dyira a kāna, “Oyod bata kwaya dyinyo a ispya kamo! 15Tan sigorādo a mapatakan ko a oyod inbahey nyowaya, sintiren ko pa inyo. Isapata ko dyinyo do ngaran ni Paraon a abaw komaro dyinyo dya, an dya mangay dya iyaw bata nyowaya a boridek nyo. 16Dawa, manoboy kamo so asa dyinyo a mangay a manghap so bata nyowaya a boridek a kakteh nyo. Mabidin kamo a kadwan do bahodan a mandan mapaneknekan ko an oyod bata nyowaya. Ki an bayataw nyo, isapata ko do ngaran ni Paraon a dawrinchi a mapatakan a oyod a ispya kamo.” 17Do dāwri, binahod na sa so tatdwa karaw do asa a bahodan.

18Do chatatdo naranaw a karaw, nangay si Jose dyira, as nakabata na sya a kāna, “Asa akwa tawo a manganohed do Dyos. As dawa, abaw pakarārayawan nyo an parinen nyo ibahey kwaya dyinyo. 19An oyod a mapagtalkan kamo, machita mabidin asa dyinyo do bahodanaya, as maybidi kamo a kadwan, tan isabat daw ginātang nyo saya dyirad maptengan saw a pamilya nyo. 20As do dāwri, machita a isabat nyo dyaw boridekaw a kakteh nyo a bata nyo. Nyaw mangipaboya a oyod iyaw batabatahen nyowaya. Ta an komwan parinen nyo, ipadiman kwaba inyo.” Nakey saw makakaktehaw do dyaya a binata na.

21Ki binata da no katakatayisa dyira a kon da, “Ayya! Nya ngataw dōsa ta do marahetaw a pinarin ta do kakteh taw. Ta do kachwaw, do nakaboya taw so kabakel kan kaynyinaw no aktokto na, kan nakadngey taw so nakapachikakaāsi na dyaten, ki inkaskāso taba. As dawa, naparin dyaten nya riribok sichangori.”

22Sinpangan na, binata ni Ruben dyira a kāna, “Nyawen! Binata kwaw dyinyo do kachwaw a maygatos kamo abad ādi taya, ki polos a dyi nyo yaken a inadngey. Na, changori nyaw bahes no nakadiman naw a maynamot do pinarin taw dya.” 23Do dāwri, naawātan a tabo ni Jose binatabata daw, ki chapatak daba naawātan na maynamot ta myan ngamin inosar na a nangiyōlog so inbahey naw an machisarsarīta dyira. 24Sinpangan na, mapenpen paba ni Jose iyaw kakey naw a tomanyis. Dawa, komnaro do salapen daw a nangay a tomnanyis. Nakapakarahan naranaw, ki naybidi kan naychirin dyira. Do dāwri, inhap na si Simeon, as nakaipabahod na sya do kasalasalapan daw.

25Sinpangan na, inbilin ni Jose dyirad magsīrbyaw dya a apnohen daw kostal dan aākang na saw so irek. Inbilin na pa a sililimed a pabidyen daw kwarta daw do irahemaw no kostal no katakatayisa dyira kan matorohan sa so bahon da. Do dāwri, pinarin da tabo nyaya. 26Katayoka no nawri, pinasakay dan makakaktehaw iyaw ginātang daw a irek do asno da saw, as nakayam da.

27Do nakaychehan daw do dāwri a ahep, asa dyiraw nangiwang so kostal na, tan pakanen naw asno naw. Ki do dāwri, naboya naw kwarta naw a naposek do hapotaw no irek do irahem no kostal naw. 28Binata na dyirad kakakteh na saw a kāna, “Samna! Pinaybidi daya tabo pinagbāyad kwaw! Myanaya do irahemayan kostal kwaya!”

Do dāwri, akmaw nawarwaraw barōkong da do dyaya naparin. Namirpir sa a batabatahen da do katakatayisa dyira a kon da, “Āngo nyaya pinarin no Dyos dyaten?”

29Do kawara daw di āmang da a si Jakob do Kanaan, inbahey da tabo napariparinaw dyira do kayan dad Egipto. 30Binata da a kon da, “Kelkelgaen naw yamen no tawowaw a āpohen no tana no Egipto a batahen naw a ispya kami do tana da. 31Ki tominbay kamyaw a kon namen, ‘Ay engga, mo āpo. Mapagtalkan kami a tawo. Ispya kami aba! 32Asa poho kami kan dadwa a makakakteh, as asaw āmang namen. Arabaw asaw a kakteh namen, as arid āmang namen do Kanaan iyaw boridekaw a kakteh namen sichangori.’ 33Ki nyaw binata no tawowaw a āpohen no tana dyamen a kāna, ‘Nyaw pakaboyan ko an oyod a mapagtalkan kamo a tawo. Mabidin asa dyinyo dyaken. As siraw kadwan, ki maybidi tan isabat nyo irekaya do maptengan saw a pamilya nyo. 34Yangay nyo a ahapen iyaw bata nyowaya boridek a kakteh nyo, ta yangay nyo dyaken, tan chapatak ko a ispya kamo aba, an dya mapagtalkan kamo a tawo. Anchan maybidi kamo, wayawayaan konchiw kakteh nyowaya a pabidyen dyinyo, as kan libri kamonchi a midibidi a magnigosyo do tana namenaya.’ Nyaw binata na dyamen.”

35Do nakapakaro daw so irekaw a yapo do kostal da saw, naboya da no katakatayisa dyira a myan paw nabedbed a kwarta na a pinagbāyad so irekaw. Namo sa may-aāmang a nakaboya so kwarta saw. 36Binata ni Jakob a āmang da dyira a kāna, “Yakenayaw pagmamayohen nyo do kabo daranayan pōtot ko saya. Apaba si Jose. Komwan si Simeon. Changori, chakey nyo pa ikaro dyaken si Benhamin. Tabo nyaya, ki sobra danaw karahmet na dyaken.”

37Tominbay si Ruben di āmang na a kāna, “Āmang, italek mo dyaken si Benhamin, as pabidyen konchi dyimo. An dyi kwa mapabidi, maparin monchya dimanen dadwa saw a pōtot kwa mahahakay.”

38Binata ni Jakob a kāna, “Ay, maparin aba pawnoten ko dyinyo iyaw boridekaya. Nadiman danaw mismwaw a kakteh na, as iya danaw nabidin.‡ An myan marahet a maparin dya do kapagbyahi na, inyo manoroh so kapagmamayo ko a pakayapwan kadimanan ko, ta taywara malkem ako na.”