1As dawa, nagpaammyānan si Abram do kahtot naw do Egipto kontodo si baket na kan tabo warawara na, as nakakwan da do Negeb do abagātanenaw no Kanaan. Nachirayay dyira si Lot a kaanakan na. 2Do dāwri, oltimos kabaknang si Abram, ta āro saw binyay na kan āro paw pirak na kan balitok na. 3Komnaro sa Abram kan rārayay na saw yapo do Negeb, kan nayadiyadis sa so yanan do kalongo daw do Betel a nandad nakarapit das logaraw a payawan no Betel kan Ai a nagtoltoldaan da do nakarahan. 4Dawri paw namarinan naw so nangidātonan na. As dawa, minirwa dana nagdaydāyaw di ĀPO do dawri a yanan.

5Do dāwri, si Lot a nachirayay di Abram, ki myan bōkod na sa karniro, kalding, kan bāka, as kan myan bōkod na pamilya kan adīpen na saw. 6Mayengay sa dadwa a āros binyay do asaw a yanan. As dawa, nanawob abaw pagpastwan daw an nāw da mayrapa. 7Nawriw nanghapan na a pirmiw kapaydidiman dan magpaspastor da saw da Abram kan Lot. Do dāwri a chimpo, myan pa sa daw tawotawo saw a Kananeo kan Pereseo a omyan do dawri a tana a pagpastwan da Abram.

8Sinpangan na, binata ni Abram di Lot a kāna, “Imom Lot, magkabagyan ta. Dawa, dyi ta pakono a palobōsan a myan kaynyin aktokto ta a maynamot do kapaydidiman dayan adīpen ta saya, ah. 9Maganaganay āno an maysyay ta na? Mamidi ka an dino chakey mo a pamangketan, ta marahawayaw tanaya. An chakey mo iyaw myan do kaholi, mangay akod kawanan. Mana an chakey mo kawanan, kaholiw kwanan ko.”

10Chiniban a mapya ni Lot, ki naboya na maganay kawyog no ranomaw do intīrwaw a payahosongan no Jordan a mandad idi a Soar a akmas plastaraw no minoyonganaw ni ĀPO do Eden mana akma do tanaw do Egipto. Komwan plastar no syodad no Sodoma kan Gomorra do sakbayaw no karārayaw sira ni ĀPO. 11Dawa, pinidi ni Lot intīrwaw a payahosongan no Jordan, kan kominwan do mangket do dāya. Komwan nakapaysyay da Abram kan Lot. 12Sa Abram, ki nabidin sa do Kanaan. Ki sa Lot, ki minyan sa do masngenaw do syodad saw a myan do payahosonganaw, as nagtolda sa do masngen do Sodoma.* 13Ki do dāwri, oltimo a karahet dan tawotawo saw daw, kan taywaraw kapaygaygatos da do salapen ni ĀPO.

14Do dāwri, do nakakarwaw ni Lot, binata ni ĀPO di Abram a kāna, “Yapod yanan mwaya sichangori, chiban mo tabo a tana do omdibon mwaya, iyaw myanaw do ammyānan, do abagātan, as kan iyaw myan do dāya kan do lāod. 15Tabo a tana a maboya mo, ki dyira mo nanchi a abos pandan kan siraw kapotōtan mo saw. 16Torohan ko panchimo so taywaras kāro a kapotōtan. Abanchiw makabidang so kāro da, ta maydaydamnay anchi a bidangan ahbek do tanaya kan siraw kapotōtan mo. 17Ngay, yangay mwa bidibidyen tan chiban mo iyaw kanaro kan kawbong na, ta iyaw nyaya tana, ki itoroh ko a tabo dyimo.” 18Do dāwri, nayadis si Abram, kan nangay do Hebron a nagtolda do masngenaw do nagdindināmagaw a kayokayo ni Mamre.† Dawriw namarinan nas pangidātonan na di ĀPO.