1Si Naaman a pangōlo dan komander saw no bōyot no āri do Aram,* ki taywara a madaydāyaw, makahwahok, kan maanyib do salapen āmo naw, ta maynamot dya, intoroh ni ĀPO ballīgi do Aram.† Iya, ki matored a taga-gobat, ki aran komwan, myan liproso na.

2Do naypisa, siraw bonggoy saw no mangraot a yapo do Aram, ki minohtot sa a nangraot so tana a Israel. Myan tiniliw da asa balasītang a yapo daw, kan nayparin a nagsirsīrbi do baketaw ni Naaman. 3Binata no balasītangaw do āmo naw a baket ni Naaman a kāna, “An maboya pakono ni āmo ko a Naaman propītaw a myan do Samarya! Mapapya anchi do liproso naya.”

4Dawa, nangay si Naaman do āryaw, kan inbahey na dya an āngo inbahey naw no balasītangaw a yapo do Israel. 5Ki initbay no āryaw no Aram a kāna, “Na, mangay ka ah. Mangipaw-it ako so tolas dyimo a mangay do āryaw no Israel.”‡ Dawa, nayam si Naaman, as napanaybi so mag-340 a kakīlo a pirak, mag-68 a kakīlo a balitok kan, asa poho a kaparis a laylay a pagsokatan. 6Inyangay na iyaw tolasaw a naipaw-it dya do āri naw no Israel, as nyaw naitolas: “Do dyaya tolas, ki ipakatoneng ko dyimo pachirawatan kwaya a si Naaman tan mapapya mo liproso naya.”

7Do nakabāsa naranaw no āryaw no Israel so tolasaw, pinirit naw kagay naw, kan binata na a kāna, “Samna, Dyos akori a mangdiman kan mangbyay? Āngo ta nanoboy nya tawo dyaken so asa tawo tan papyahen ko liproso naya? Chiban nyo pa an maypāngo kaichichwas nas gondāway a machidiman dyaken!”

8Do nakadngey naw ni Eliseo a iyaw tawowaw no Dyos so nakapirit naw no āri no Israel so kagay naw, inpaipaw-it naw nya minsāhi dya: “Āngo ta pinirit mo kagay mo? Toboyen mo mahakayaya a mangay dyaken tan mapatakan nanchi a myan propīta do Israel.” 9Dawa, nangay si Naaman kontodo kabalyo na kan logan na a pachigobat, as nagsardeng do pantawaw no bahay ni Eliseo. 10Ki nanoboy si Eliseo so mangibahey dya a kāna, “Mangay ka maryos so maypapito do Oksong a Jordan, as iyanchiw asyasi mo, ki mapya anchi kan madalosan kanchi.”

11Ki komnaro si Naaman a nakasoli, kan bata na a kāna, “Pī! Iniktokto ko a syirto a mohtot a mangbayat dyaken, kan maytēnek a manawag so ngaran no ĀPO a Dyos na, as paptoptosen naw kakamay naw do yananayan liproso ko kan papyahen na yaken! 12Namna, maganaganay sabawriw oksongaw a Abana kan Parpar do Damasko kan tabo ranom do Israel? Maparin ko sabawri a paryosan kan madalosan ako?” Dawa, nagpolīgos a komnaro a makasokasoli.

13Siraw pachirawatanaw ni Naaman, ki naypasngen sa dya, kan binata da di āpo da a kon da, “Āpo namen, an inbilin na dyimo no propītaw mamarin so malidyat, parinen mo abawri? Dyori a mangamangay pa do kaibahey naya sya dyimo a ‘Maryos ka kan madalosan kanchi’?” 14Dawa, minosbos si Naaman, kan somnoneb so naypapito akmas inbaheyaw no tawowaw no Dyos dya. Napyan asyasi naw kan nadalosan akmas asyasi danaw no barīto.

15Sinpangan na, naybidi si Naaman kan sira tabo rārayay naw do tawowaw no Dyos. Naytēnek si Naaman do salapen naw, kan binata na a kāna, “Changori, chapapatak ko na a abaw Dyos do tābo tanaya malaksid do Dyos no Israel. Rawaten mo pakono sichangoriw rigālwaya a yapo do pachirawatan mwaya.”

16Inatbay no propītaw a kāna, “Akmas kasigorādo no kasibibyay ni ĀPO a pagsirsīrbyan ko, mangrawat akwaba so aran āngo.” Aran ipapīlit ni Naaman di Eliseo, rinawat naba.

17Do dāwri, binata ni Naaman a kāna, “An dyi mo a rawaten, palobōsan mo pakono yaken a pachirawatan mo a matorohan so tana a maparin a kargaen dadwa a molo.§ Ta yaken a pachirawatan mo, ki polos dananchi a dyi ako na mirwa maysosoh so dāton kan mangisakripīsyo dyirad aran āngo a dyos malaksid di ĀPO. 18Ki si ĀPO pakono mangpakawan dyaken a pachirawatan mo do dyaya a parinen konchi. Anchan machangay ako do āmo kwaw a somdep do timplo ni Rimmon* a magdaydāyaw, kan manareng do tachay kwaya, kan machita a magdaydāyaw ako a akma dya, ki pakawanen na pakononchi yaken ĀPO do dyaya parinen konchi.”

19Binata ni Eliseo a kāna, “Mayam ka na sitatalna.”

Do dyi paw a nakapakateng ni Naaman, 20iniktokto ni Gehasi a pachirawatan ni Eliseo a tawo no Dyos a “Namna, tod naya pinayam no āmo kwaw si Naaman a Arameo kan rinawat nabayaw pinanawbi naw a itoroh. Akmas kasigorādo no kasibibyay ni ĀPO, lakatan ko si Naaman kan manghap akonchi so kadwan a yapo dya.”

21Dawa, nakalyalisto si Gehasi a nanglakat si Naaman. Do nakaboyaw sya ni Naaman si Gehasi a makalyalisto a mangay do yanan naw, gominchin si Naaman do loganaw a nangbayat sya. Inyahes na di Gehasi a kāna, “Ariw problīma?”

22Initbay ni Gehasi a kāna, “Maganay a tābo. Tinoboy naw yaken āmo kwaw a mangibahey dyimo a kāna, ‘Myan saw dadwa babbaro a yapo do bonggoy dan propīta saw iyaw nangay dyaken a yapo do katokotokonan no Epraim. Torohan mo pa sa so tatdo a poho kan apat a kakīlo a pirak kan dadwa kaparis a laylay a pagsokatan.’ ”

23Binata ni Naaman a kāna, “O sigi, apen mo a dobliw karwaya no pirak.” As inpapīlit na pa di Gehasi a rawaten na, kan pinosek naw pirakaw do dadwaw a bayon a nairāman dadwaw a kaparis no laylay. Intoroh na dyirad dadwaw a pachirawatan na, kan rinara da do panmanaw ni Gehasi. 24Do nakapakarapit danaw ni Gehasi do paytokonanaw a pagyanan ni Eliseo, inhap naw dadwaw a bayon a yapo dyirad pachirawatan saw ni Naaman, kan kinapya na sa do bahayaw. Pinayam na saw mahahakayaw, kan komnaro dana sa.

25Naybidi si Gehasi do bahayaw kan naytēnek do salapenaw no āmo naw a si Eliseo, inyahes ni Eliseo a kāna, “Dino nakayapwan mom Gehasi?”

Initbay ni Gehasi a kāna, “Abaw nangayan pachirawatan mwaya.”

26Ki binata ni Eliseo di Gehasi a kāna, “Myan abawriw ispirito ko dyimo do nakagchinaw no mahakayaw do logan naw a nangbayat dyimo? Namna, changori aba met ōras a kapangrawat so kwarta mana kapangrawat so laylay mana kaolibwan, kaobāsan, arban a karniro kan kalding, bāka, mana adīpen a mahahakay kan mababakes? 27Dawa, iyaw liproso naw ni Naaman, ki komoyapet dyimo kan iyaw kapotōtan mo a abos pandan.” Sinpangan na, komnaro si Gehasi a yapo do salapenaw ni Eliseo, kan nagliproso si Gehasi, kan nanyidak a akmay yīlo.