1Awo oYesu nʼatandiika okutumula nabo omu ngero, ngʼabakoba ati, “Wabbairewo omuntu eyakomere omusiri gwʼemizabbibbu,* nʼagusitaku olukita, nʼakuulamu ekikunyiro, nʼayombekamu ekifo ekigingice nga kuliku nʼakasiisira, abakuumi omu balengerera. Olwo nʼaguteekamu abapangisya era nʼazwawo nʼayaba omu lugendo.

2“Ekiseera ekyʼamakungula owekyatuukire, nʼatuma omugalama eeri abapangisya, bamuweeku ebineneka byʼomusiri gwʼemizabbibbu. 3Ibo bamukwaite ni bamukubba-bukubbi, era ni bamubbinga nga tibamuwaireku akantu konakona.

4“Nʼabasindikira tete omugalama ogondi, ni bamukubba oluguma, ni bamwemulayemula. 5Era nʼatuma ogondi, oyo ni bamwita. Nʼabandi bangi ni bababitya mu ngeri nanyere eyo, abamo ni babakubba, abandi ni babaita.

6“Yabbaire asigairyewo omuntu ogondi owʼokutuma moiza, niiye omutaanewe omutake eino. Onu guyasembeseryeyo okubatumira, ngʼakoba ati, ‘Omutaane wange bamuwa iye ekitiisya.’ 7Neye ibo abapangisya nago ni beegeyamu bati, ‘Onu niiye omusika, oleke tumwite, obusika bwalibba bwaiswe!’ 8Kale ni bamukwata, ni bamwita, ni bamutoola omu musiri gwʼemizabbibbu ni bamumuma eedi.

9“Kale onyere omusiri ogwo niki ekiyalikola? Yalyaba nʼaita abapangisya abo, kaisi nʼagukwatisya abandi. 10Dala mmaite nti eKiwandiike mwakisomereku ekikoba kiti:

12Awo abalabe ba Yesu owebamanyicirye bati olugero oolwo aluleetere nga lutumula ku niibo, ni bagezyaku okumukwata, neye tete ni batya ekiziima kyʼabantu, ni bamuleka ni baaba.

13ABafalisaayo nʼabawagiri ba Kerode abamo, ni babatuma okutega oYesu omu bibono. 14Batyo ni baiza ni bamukoba bati, “Musomesya, tumaite tuti iwe oli wa mazima, era tokolerera bantu kukusiima, olwakubba bonabona obabitya mu ngeri moiza, era abantu obeegesya mu mazima ebyo oKibbumba ebyataka bakole. Atyanu Musengwa, otukobere, kibba kituuce okuwa oKaisaali omusolo, ooba bbe? 15Tuli nʼokugumuwa ooba tituli nʼokugumuwa?”

OYesu nʼamanyica omutego gwabwe, nʼabakoba ati, “Lwaki muntega? Mundeetere edinaali ngibone.” 16Ni bagireeta. Iye nʼababuulya ati, “Ekifaananyi nʼamaliina ebiriku byani?” Ni bamwiramu bati, “Bya Kaisaali.”

17OYesu nʼabakoba ati, “Kale ebya Kaisaali mubiwe oKaisaali, nʼebya Kibbumba mubiwe oKibbumba.” Era ni bamwebunya ino.

18Olundi aBasedukaayo, abakoba bati mpaawo kuzuukira, ni baaba egiri oYesu, ni bamubuulya bati,* 19“Musomesya, oMusa yatuwandikiire ekiragiro kiti, omuntu owaafa nʼaleka onamwandu, neye nga tabyaireku omwana, omuganda wʼomufu ali nʼokufumbirwa onamwandu oyo, kaisi abyalire omugandawe abaana.*

20“Kale wabbairewo abaganda musanvu. Asooka nʼaleeta omukali, neye nʼafa nga tabyaireku omwana. 21Owokubiri nʼatwala onamwandu wʼoodi eyasookere, era nʼoyo nʼafa nga tabyaireku mwana. Nʼowokusatu yena atyo. 22Bonabona omusanvu ni batwalaku omukali oyo, neye era ni batamubyalamu mwana. Oluzwanyuma, bonabona nga bamalire okufa, omukali yena nʼafa.

23“Olwo oku lunaku olwʼokuzuukira, omukali oyo yalibba mukaani ngoyo bonabona omusanvu bamufumbiirweku!”

24OYesu nʼabakoba ati, “Mugota, era ekibaleetera ekyo, lwʼobutamanya Biwandiike, era nʼobwezye bwa Kibbumba. 25Abantu owebalizuukira, balibba ooti bamalaika omwigulu, nga tibakaali babba nʼobufumbo.

26“Kaisi ebifa oku kuzuukira, dala mmaite nti mwasomereku omu kitabo kya Musa, omu kitundu ekitumula oku kisaka, ngʼoKibbumba yakobere oMusa ati, ‘Ninze oKibbumba wa Ibbulaimu, era wa Isaka, era wa Yaakobbo.’ * 27OKibbumba wa bantu ababba aboomi newankubbaire nga bamalire okufa neye tiwa bantu abasigala omu kufa. Kale mugota ino!”

28Awo omoiza oku bakugu omu byʼaMateeka nʼaiza, nʼawulira aBasedukaayo nga baakana. Oweyaboine ngʼoYesu abairiremu kusani, yena nʼamubuulya ati, “Kiragiroki ekikira byonabyona obukulu?”

29OYesu nʼairamu ati, “Ekiragiro ekikira byonabyona obukulu niikyo kinu: ‘Iwe Isirairi, owulire: OMusengwa niiye oKibbumba waiswe, oMusengwa yenkani. 30Era otakenge oMusengwa oKibbumbawo, nʼomwoyogwo gwonagwona, nʼobwomibwo bwonabwona, nʼebiseegobyo byonabyona, nʼamaanigo gonagona.’* 31Ekiragiro ekiiririraku omu bukulu, niikyo kinu: ‘Otakenge omuntu omwinawo, ngʼoweweetaka iwe onyere.’ Mpaawo kiragiro kindi ekikira binu obukulu.”*

32Awo oMukugu omu byʼaMateeka nʼakoba oYesu ati, “Musomesya, oiriremu nakusani. Ekyotumwire kya mazima oti, oKibbumba ali moiza yenkani, nga mpaawo gondi yenayena.* 33Era oti okumutaka nʼomwoyogwo gwonagwona, nʼebiseegobyo byonabyona, nʼamaanigo gonagona, nʼokutaka abantu abanaiswe ngʼowetwetaka iswe abanyere, kikira byonabyona ebibawonga nga babyoca biramba, nʼebindi ebituwaayo ngʼesadaaka eeri oKibbumba.”*

34OYesu oweyaboine ngʼomukugu omu byʼaMateeka airiremu nʼamalabuki, nʼamukoba ati, “Otandiikire okutegeera ebyʼomu bwakabaka bwa Kibbumba.” Era okuzwa oolwo ni watabbaawo muntu ogondi eyagumire nʼamubuulya ebibuulyo ebindi.*

35OYesu oweyabbaire omu Yeekaalu ngʼayegesya, nʼabuulya ati, “Abakugu omu byʼaMateeka beezya batya okukoba bati, ‘OKurisito ogubasukireku amafuta Mwizukulu wa kabaka oDawudi?’ 36ODawudi onyere, oweyabbaire ngʼaizwire oMwoyo oMweru, yakobere ati:

37“Ooba ngʼoDawudi onyere amweta ‘Musengwawe,’ kaisi tete oolwo oKurisito ayezya atya okubba mwizukuluwe?” Ekiziima kyʼabantu ekyabbairewo, ebibonobye ebyo ni babiwulisisya nʼokusiima kunene.

38Atyo oYesu oweyabbaire ngʼayegesya, nʼakoba ati, “Mwekuume abakugu omu byʼaMateeka ga Musa, abataka okutambula nga bazwaire ebizwalo ebyanvuwiriri ebyekuusira ansi, okulaga bati bantu beeru. Era bataka okubasugiryasugirya omu butale, 39nʼokutyama omu bifo ebyʼomu maiso omu makumbaaniro nʼomu bifo ebyʼabantu abʼekitiisya oku mambaga. 40Era banyaga ebintu byonabyona omu manyumba ga banamwandu, nʼokusaba oKibbumba omu bibono ebingi olwʼokweraga. Abo balisuna ekibonerezo ekikiraku obunene.”

41OYesu oweyabbaire ngʼatyaime omu maiso gʼekifo omu bateeka ebirabo omu Yeekaalu, nʼabona abantu bangi nga bateekamu empiiya. Abasuni bangi bateekeremu empiiya nyingi.

42Awo onamwandu omudoobi nʼaiza, nʼateekamu obumpiiya* bubiri, obwʼebbeeyi esembayo okubba entono eino. 43OYesu nʼayeta abeegibe, ni baiza egyali, nʼabakoba ati, “Mbakobera amazima nti onamwandu onu omudoobi ateekere kinene ino omu kifo omu bateeka ebirabo, okukiraku abandi bonabona. 44Ibo bateekeremu nga batoola ku bingi ebibabbaire nabyo. Neye onamwandu onu iye, ateekeremu kyonakyona ekyabbaire ali nakyo, ekibbaire ekijejera obwomibwe.”