1Awo oYesu ngʼaizwire oMwoyo oMweru, nʼazwayo omu Mwiga oYoludaani, oMwoyo oMweru nʼamutwala omu kitera, 2nʼamalayo enaku 40 ngʼoSitaani amukema. Omu naku egyo gyonagyona mpaawo kantu akeyaliireku, era owegyawoireku, awo enzala nʼemuluma.

3Kale oSitaani nʼamukoba ati, “Ngʼooli Mwana wa Kibbumba, aale olagire eibbaale linu lisuuke kyokulya.”

4OYesu nʼamwiramu ati, “Bakiwandiikire bati, ‘Omuntu tabba mwomi omu bwizulye ngʼalya kyokulya kyonkani.’ ”*

5Awo oSitaani nʼalungamya oYesu okuniina awantu awagingice eino, era omu kaseera-buseera nʼamulagisyaku obwakabaka obwʼamawanga gonagona obwʼoku kyalo. 6Nʼamukoba ati, “Nakuwa obwezye okufuga amawanga ago gonagona era nkuwe nʼebisa byonabyona ebigalimu, olwakubba byonabyona ebyo babimpaire, era oguntaka yenayena gumbigabira. 7Aale atyanu iwe singa oikirirya okunkomera amazwi nʼonsinza, byonabyona byaba okubba bibyo.”

8OYesu nʼamwiramu ati, “Bakiwandiikire bati, ‘Osinzenge Musengwa oKibbumbawo, era guwaweereryanga yenkani.’ ”*

9Awo oSitaani nʼalungamya oYesu okwaba e Yerusaalemi, nʼamuniinisya oku kisooto kyʼeYeekaalu, kaisi nʼamukoba ati, “Ngʼooli Mwana wa Kibbumba, ozwere aanu, ojuuke ogwe ansi, 10olwakubba bakiwandiikire bati, ‘OKibbumba yalagiranga abamalaikabe okukukuuma nandi nʼobbaaku kabbikabbi konakona.’* 11Era ati, ‘Balikubbaka omu ngalo gyabwe, kaisi nandi ni weekontola ekigerekyo okwibbaale.’ ”*

12OYesu nʼairamu ati, “Bakiwandiikire bati, ‘Tokemanga oMusengwa oKibbumbawo.’ ”*

13OSitaani ngʼamalire okukema oYesu omu ngeri enyingi eino egyo, nʼamulekaku paka ekiseera ekindi.

14Awo oYesu nʼakanga omwitwale lyʼe Galiraaya ngʼali nʼamaani ga Mwoyo oMweru. Era amawuliro agamukwataku ni gasaalaana omu kitundu ekyo kyonakyona. 15Yaabire ngʼayegesya omu makumbaaniro agʼomu kitundu ekyo, era abantu bonabona ni bamuwuuja.

16OYesu oweyakangireyo omu kabuga kʼe Naazaleesi egiyakuliire era oku Saabbaato, nʼayaba omwikumbaaniro, ngʼoweyabbaire enkolaye. Awo ni bataka niiye abbe asome era nʼasetuka okusoma eBiwandiike. 17Bamukwatisirye ekitabo kya naabbi Isaaya. Oweyakibiikwire, nʼatuuka egibawandiikire bati:

20OYesu oweyamalire okusoma awo, nʼabwikaku ekitabo, nʼakiirirya omuweererya owʼomu Yeekaalu, era ni yeetyamira. Abantu bonabona omwikumbaaniro ni bamukaliryaku amaiso. 21Awo nʼatandiika okubakoba ati, “Olwatyanu ekyo eKiwandiike ekimuwuliire, kituukirire.”

22Bonabona ni bamusiima ino, era ni beewunya olwʼebibono ebisa ebiyatumwire, ni bakoba bati, “Onu tiniiye omutaane wa Yusufu?”

23OYesu nʼabakoba ati, “Mmaite nti mwaba okunkoba bibono ebyolugero olukoba luti, ‘Omugangi, weeramye.’ Era nʼokunkoba muti, ‘Ebyewunyo ebiwakoleire e Kaperenawumu, ebitwawuliire, obikolereku nʼaanu omu kibuga kyʼe waanywe.’ ”

24Era nʼabakoba ati, “Mbakobera amazima nti mpaawo naabbi ogubasiima omu kitundu kyʼe waabwe.* 25Era mbakakasa nti omu mirembe gyʼEriya wabbairewo abanamwandu bangi omwIsirairi. Omu biseera ebyo, ensaaca nʼekubba era oikendi nandi nʼatoonya okumala emyanka misatu nʼemyeri mukaaga, enzala nebba mpitiriri omu kyalo kyonakyona.* 26Neye Eriya tibamutumire eeri kadi moiza kwibo, wazira bamutumire wa namwandu omu kyalo kyʼe Zerifaasi omu omwitwale lyʼe Sidoni.* 27Era omu mirembe gyʼErisa onaabbi, wabbairewo abagenge* bangi omwIsirairi, neye tiwabbairewo kadi moiza kwibo ogubalamirye, wazira oNamani yenkani owʼomu kyalo kyʼe Siiriya.”*

28Abantu bonabona ababbaire omwikumbaaniro owebawuliire ebyo, ni banyiiga, 29ni basetuka, ni bamwindikiaga era ni bamubuluca e nza wʼekibuga, ni bamutwala oku mugo gwʼakasozi oku bombekere ekibuga kyabwe kaisi beezye okumudyaka ansi eedi. 30Neye oYesu nʼabeeteeresya kaisi nʼababitamu akati ni yeeyabira.

31Awo oYesu nʼayaba omu kibuga e Kaperenawumu, ekiri omu kitundu kyʼe Galiraaya. Era oku Saabbaato nʼayaba omwikumbaaniro okwegesya abantu. 32Abantu ni beewunya ino engeri egyayegesyamu olwakubba yayegeserye nʼobwezye.*

33Omwikumbaaniro oomwo mwabbairemu omuntu eyabbaireku omuzimu, nʼaceera ngʼakoba ati, 34“Otubbaire niki iwe Yesu owʼe Naazaleesi? Oizire kutujigirica? Nkumaite. Niiwe oMweru oyo azwa egiri oKibbumba.” 35Neye oYesu nʼagukaawuukira ati, “Osirike mangu, nʼomuntu onu omuzweku.” Omuzimu ni gukubbirawo omuntu oyo omu bantu awo kaisi ni gumuzwaku nga mpaawo kabbikabbi konakona akegumukolere.

36Era bonabona ababbairewo ni bawuninkirira, ni beebuulyangana bati, “Ekibonokye kyʼengeriki? Obona emizimu agiragira-bulagiri na bwezye ni gizwa oku bantu!” 37Olwo amawuliro agakwata oku Yesu ni gasaalaana wonawona omu kitundu ekyo.

38Awo oYesu nʼazwa omwikumbaaniro, nʼayaba omu nyumba ya Simooni omoiza oku beegibe. Omu kiseera ekyo omaaye wa muka Simooni yabbairewo ngʼomusuuja gumuluma ino. Kale abʼomu kisito ekyo ni beegairira oYesu amulamye. 39OYesu nʼayaba nʼakotama egiri omulwaire, nʼakaawuukira omusuuja era omusuuja ni gulamirawo. Amangu ago omukali oyo eyabbaire omulwaire nʼasetukirawo, era nʼatandiika nʼokubainula.

40Eisana nga ligwire, abantu bonabona ababbaire nʼabalwaire abʼendwaire egya buli ngeri, ni babaleeta egiri oYesu, nʼakwata ku buli mulwaire nʼamulamya. 41Era emizimu gyonagyona ni gizwa oku bantu bangi, ni gyaba nga giwolooga giti, “Iwe niiwe oMwana wa Kibbumba!” Neye oYesu nʼagikaawuukira, nandi nʼagiganya okutumula, olwakubba gyabbaire gimumaite giti niiye oKurisito oKibbumba oguyasukireku amafuta.

42Obwire owebwaceire, oYesu nʼayaba omu kifo ekinambulamu bantu. Abantu bangi ni bamunoonia paka owebamuboine, era ni bagezyaku okumugaana okubazwaku. 43Neye iye nʼabakoba ati, “Nteekwa okulaabba aMawuliro aMasa agakwata oku bwakabaka bwa Kibbumba nʼomu bibuga ebindi byona olwakubba bantumire lwʼensonga eyo.”

44Awo nʼayaba ngʼalaabba omu makumbaaniro agʼomu Buyudaaya.