Buki Kimaasabaina

Yeisu Yaubada ina Katukeda ana tovatulukwanayao be Parisi ibowoidi
(Maki 12:38-40; Luke 11:37-52, 20:45-47)
1E tuwo kina Yeisu boda be nakae kai ina tovatotowanayao ilatuwokoima idigo kana,
2‘Kidi Yaubada ina Katukeda ana tovatulukwanayao be nakae Parisi madi lovina Atukedayana silumavivisi. 3Tauna kaga liliuna sivatulukoimi, nakae koguuinūwe be kokabiikaōne go, idi guinuwa taabu kovatotoowonēdi. Bogina koyagoi. Tauyadi kaga sidigedige geya siguinuweyeta. 4E lovina badabadaidi tomota sivinidi go, lovinayadi moe kónana moumoudi nakae itomatedi. Tomota sivavabedi bego sikavaledi go, geya kada tayaamo vaita sivinidi geya. 5E kaga liliuna siguuinuwedi moe bego tomota sigitedi bei siyapaliyedi. Nakae Gínina Kimaasabaina idi tomwana dedeogaidi siwodugudi gagaidi, dabadi goi o nimadi goi sisikoidi. Adi kwama adi kura sikimanavedi bego tomota siyapaliyedi. 6-7E tuwaina áika gagaidi goi sisiu wowoina basekoina goi siitusobu. Tapwaroro ana kaba tugúguna sinaena wowoina basekoina goi siitusobu bei tomota siyapaliyedi. Aba maketi goi tomota sima sikatoomoyaedi be nakae siduduwedi kadi,
“Tovatulúkwana Toolagaim.”
Ame guinuwayadi kidi nuwodi sikabi. 8E komi go taabu tomota kotaagonēdi siduduwemi tovatulúkwana toolagaimi. Imi tovatulúkwana tayamo toito. Nakae komi madabokimi boda tayamo, kovavasa. 9Geya vatau tayaamo poyapoya ame goi kodudūwe tamami. Komi Tamami tayamo; Tauyana yábana goi ikaaiyaka. 10Taabu tomota sikatoomoyaēmi. Komi imi Tomoya tayamo toito; Tauyana moe Guyau. 11E toolagaidi komi yaimi goi moe bei tauyadi imi tovaitayao. 12Go avatauwa neta toinidi sikilagalagasidi, e niga Yaubada bei ikisobuyedi. Go avatauwa neta toinidi sikisobusobuyedi, e niga Yaubada bei ikilagasidi.
13E komi Yaubada ina Katukeda ana tovatulukwanayao be nakae Parisi, imi vatulúkwana goi tomota kosanaabodedi, e Yaubada ina kalibúbuna goi geya sisiuta. Moitamo. Komi geya latuwomi kosiu go, avatauwa neta latuwodi sisiu, komi kosanabodedi. Tauna komi tokibobwata polapola! Oo komi ami toovalugo ae? [ 14Komi Yaubada ina Katukeda ana tovatulukwanayao be Parisi, kóbuya idi vada be konadi kovaaobudi namliyeta kokawanoi tuta maanawena bego tomota sigitemi. Tauna imi liuna gagaina toina bei kobabane. Komi tokibobwata polapola! Oo komi ami toovalugo ae?]
15Komi Yaubada ina Katukeda ana tovatulukwanayao be nakae Parisi, dadava liliudi goi kovanibiníbita bego tomota tayamo kotamyabi ietosaidámana bei inumisa komi nakae. Go tutayana neta tayamo ietosaidámana, e imi guinuwa pasina tauna komi itoboinemi kona asagabugabu goi go, tauyana itoboinedoko. Tauna komi tokibobwata polapola. Oo komi ami toovalugo ae?
16Komi tovakeda kebokeboimi kodigo kami,
“Avatau neta nimana ikatulágata be Vada Kimaasabaina yoina goi ikatótula, moe atotula besobeso. Go avatau neta nimana ikatulágata go, goura Vada Kimaasabaina sinaena sikaaiyaka yoidi goi ikatótula, e tauyana mana tasíkwana ina katotulayana iguinuwe.”
Oo komi ami toovalugo ae? 17Komi yaaluwoimi be tokebo! Gourayadi kimaasabaidi unana Vada Kimaasabaina pasina. Tauna nako dogoi gagaina, gourayadi gea Vada Kimaasabaina? Vadayana ae? 18Aiyuwoina komi kovatulúkwana kami,
“Avatau neta nimana ikatulágata be Yaubada ina kaba kasala yoina goi ikatótula, moe dogoi besobeso. Go avatau neta nimana ikatulágata be vininabeso aba kasalayana yatana yoina goi ikatótula, e tauyana mana tasíkwana ina katotulayana iguinuwe.”
19Komi tokebo! Vininabesoyana kimaasabaina unana aba kasala pasina. Tauna nako dogoi gagaina, vininabesoyana gea aba kasala? Aba kasalayana ae? 20Tauna avatau neta nimana ikatulágata be Yaubada ina kaba kasala yoina goi ikatótula, moe nakae aba kasala yoina be nakae kaga liliuna sikaaiyaka aba kasalayana yatana yoidi goi ikatótula. 21Aiyuwoina avatau neta nimana ikatulágata be Vada Kimaasabaina yoina goi ikatótula, moe nakae Vada yoina be nakae ana Tokaiyaka yoina goi ikatótula. 22Nakae avatau neta nimana ikatulágata be yábana yoina goi ikatótula, moe nakae Yaubada kebana esaaesaina yoina be nakae ana Totulaga yoina goi ikatótula.
23Komi Yaubada ina Katukeda ana tovatulukwanayao be Parisi, Atukedayana bogina komatakavaatedoko. Nakae imi yawóuna pai, minta be dira be nakae kumina bogina Yaubada koviinibeso go, moe guinuwa giyaiina. Go guinuwa gagaidi Yaubada ina Katukedayana goi bogina kokalavedi. Guinuwa gagaidiyadi moe kivavasa, nuwokapisi be aba numisa. E itoboine guinuwayadi gagaidi be giyaidi madabokina koguinuwedi. Tauna komi todedevimi polapola! Oo komi Parisi ami toovalugo ae? 24Komi tovakeda kebokeboimi. Komi manumánuwo ami bwenata goi kokabi, kokalave go, kameri kotono.
25Komi Yaubada ina Katukeda ana tovatulukwanayao be Parisi, komi keiga be noko nakae. Toluyedi koonikidi go, sinaedi, báila ivakayaodeidi, bailayana moe matakónana be piki. Tauna komi tokibobwata polapola! Oo komi ami toovalugo ae? 26Komi Parisi matami kebokeboidi. Mainao keiga be noko sinaedi konikīdi bego toluyedi nakae simavada.
27-28Komi Yaubada ina Katukeda ana tovatulukwanayao be Parisi, komi valiwoga ana kaba kinana nakae. Tomota sipentedi poowoudi bei toluyedi adi kaigigita kaausaraidi go, sinaedi tokámasa luludi be nakae kaga kaga baailidi sikayaoda. Komi nakae. Ami kaigigita koroto tokibóbwata go, sinaemi moe pola be apipilova sikayaoda. Tauna komi Parisi tokibobwata polapola! Oo komi ami toovalugo ae?
29Komi Yaubada ina Katukeda ana tovatulukwanayao be Parisi moe tokibobwata polapola! Latuwomi tomota siyapaliyemi bego komi todedevimi, tauna Yaubada ina tokabivalavala adi valiwoga adi kaba kinana polapola kowoodugudi. Aiyuwoina tauyadi tokibóbwata adi valiwoga adi kaba kinana kovaapasedi bei tokamasayadi kowowoinedi. Oo komi ami toovalugo ae? 30Kodigo kami,
“Neta kai boi nimatu tubumao idi tuta goi kakaaiyaka, e tubumao geya kasiukoidita bego tokabivalavalayadi kakaumatedi.”
Tauna komi tokibobwata polapola! Oo komi ami toovalugo ae? 31Tauna imi guinuwayadi goi toinimi kotalavaitemi bego Yaubada ina tokabivalavalayao adi tokaumatayao moe komi tubumiyao adi gulagula, tauna komi nakae. 32Tuwo moe dedevina. Kaga tubumiyao siikaboge, komi kolukavāve!
33Komi moteta nakae! Moitamo siyasiyaimi! Komi manakaemi bei ami liuna asagabugabu goi kosiya? Geya! 34Ame pasina tauna tokabivalavala be tonanamsa be nakae Yaubada ina Katukeda ana tovatulukwanayao mooitamoidi bei aetunedi siwo yaimi. Maniyedi bei kokaumatedi, maniyedi bei kerose goi kotupatukoidi go, maniyedi imi kaba tugúguna goi bei kodabidi. Ago maniyedi asa tamo tamo goi sikaaiyako bei koyogedegededi. 35Tauna tokibobwatayao liliudi ikaikaidi adi dau poyapoya ame goi moe komi imi puwoya. Tauna adi katumapu bei kobabane. Amo tokibóbwata Ebeli ina kámasa ima Berekiya natuna Sakarayau ina kámasa. Sakarayauyana boi nimatu Vada Kimaasabaina be aba kasala go, nauyayanaidi goi tubumiyao sikaumate. 36U, moe nakae siguuinuwe go, ame alatuuwokoimi konōve: Moe goyoyadi liliudi adi katumapu komi be nakae toogoyoidi komi nakae bei kobabane.
37Oiyoi komi da Yerusalema e! Boi Yaubada ina tokabivalavala kokaumatedi, nakae ina lobutu ana tolokoina ietunedi siwo yaimi goi go, komi gurewa goi kokaumatedi. Tuta liliuna latuwogu bego natumiyao alamgogoidi nakae kamkam bovavina natunao panepanena goi ilamgogoidi go, komi kokatae. 38Konovēgu. Imi vada Yaubada ikalave itugavile bei ana toovalugo. 39Moe moitamo go, ame alatuuwokoimi konōve: Geya tuwaina bei kogitemneigu ana kadókana kodigo kami,
“Tauyana Yauwe yoina goi imamaima kaaipakuna!” ’
Same 118:26

‡a23:5 Tomwana Dedeogaidi: Ame dedeoga tupwana giyaiina. Bulumakau sakavaina sikabi, dedeogayana siwodugu. Ikavava, tomwana maniyedi siginidi, dedeogayana sinaena goi sidodoidi. Tomwanayadi nakona Tat 13:10-16 be Atu 6:4-9; 11:13-21. Sidodoidi ikavava, dedeogayana sikabi dabadi goi o nimadi goi sisikoidi (Tat 13:9, Atu 6:8 be 11:18).

†23:5 Mad 6:1.

‡b23:5 Adi kwama adi kura: Adi kwama kikina goi kura aivasi sigilumipatukoidi. Ame aba kinana tauyadi yawoidi sikasaledi Yaubada yaina. Yoy 15:37-39 be Atu 22:12 adi lovina nakae.

†23:11 Mad 20:26-27; Mak 9:35, 10:43-44; Luk 22:26.

†23:12 Luk 14:11, 18:14; Yem 4:6,10; 1Pi 5:5-6.

‡23:14 Ame tomwanayana nakona Madiu geya iginiyeta, go sem tokaidámana tayamo toinina ina nuwonúwana igini.

†23:22 Ais 66:1; Mad 5:34.

‡23:23 Pai, minta be dira be nakae kumina: Ame pai nakae go, adi paisewa moe awoinu ana kaba vaita nakae. Tadodoidi bei awoinu ana káika dedevina.

†23:23 Vin 27:30.

‡23:24 Yaubada ina Katukeda Diyuu isanabodedi manumánuwo o kameri taabu siikanīdi. Neta sikanidi moe nakae ikibaibailidi. Manumánuwo giyaiina go, kameri yoguyogu gagaina.

†23:27-28 Yoy 19:16; Gui 23:3.

†23:33 Mad 3:7, 12:34; Luk 3:7.

†a23:35 Abv 4:8.

†b23:35 2Te 24:20-21.

‡23:38 Imi vada: Ame livalayana da Giriki niyadi goi geya imavadeta. Ana yagoina aiyuwo, tayamo moe Yerusalema go, tayamo moe Yaubada ina Vada Kimaasabaina.

†23:38 Yer 22:5.

†23:39 Mad 21:9, 23:39; Mak 11:9; Luk 13:34-35, 19:38; Iyo 12:13.