1Pakai thupeh dungjui a chonho leh kitahna neiho chu kipah uhen. 2Koi hileh adanthu nit a alungthim pumpia Ama holjing hochu kipah’u hen. 3Amahochun thilphalou achepi pouvin Pakai deilampi joh ajui un ahi. 4Pakai nangin nathupeh hochu phatah’a kanit diuvin neiseipeh’un ahi. 5O Pakai kanitin hinkho Mandan ahin nangman neideipeh hinkho hi kilangdoh jengle kati e. 6Chuleh nathupeh leh kachondan kavetkah teng kajum louding ahi. 7Keiman nei thuhilna dihtah hochu kahet dungjui a kakimanding dol a kakimanchah theijeh’a nangma chu kathangvah ding ahi. 8Neidalha hihbeh’in, keiman nadan chu kanitjing ding ahi.

9Khangthah khatchu itileh ahinkho atheng theidem? Nangma thu angaileh hitheiding ahi. 10Keiman nangma mudoh teiding kagelkhoh’in ahi, nangma thupeh’a kon in neilam vai sahhih’in. 11Nangma douna kachonset louna dingin kalungsung ah nathu chu kachensah jingin ahi. 12O Pakai nangma kathangvah’e nathupeh nitji dan neihil in. 13Kachonding dan nangin neipeh hochu keiman kasimphongjin ahi. 14Nei le gouva housangin nadanthu chu juiding katha anomjoi. 15Neithupeh nadan hochu keiman simjing ingting neideipeh lampia chejing dingin kingaito jing nange. 16Nadanthu hohi kakipapin, juidinga neithupeh hojong sumil ponge.

17Nasohpa keima hi thilpha neibolpen kahinkhoa hi nathupeh kanit jingna dingin. 18Nathupeh hoa thudih kidangtah hohi kamuchet theina dingin kamit hi hadohsah’in. 19Keima hiche leisetna hi kholjin bep kahibouve nathupeh hochu keima nei impeh hihbeh’in. 20Phatin in keiman nachondan juiding ngaichatna hin eilonvuhtan ahi. 21Nangin mikiletsah hochu nahousejin, nathupeh a kon a pampet hochu nasamsejin ahi. 22Nadansem hohi kajui jingnai amahohi neinoise sahhih beh’in. 23Leng chapate ho toukhom u henlang keima dounan thu seijongleu keivangin na daan semhohi juiding geljing nange. 24Nadaan semho hi kakipapi lheh jenge ajeh chu hiche hohin chihna thu eihil jingin ahi.

25Keima leivui lah’a kijama kahitai nathu chun neisuhal kittan. 26Kachondan, kaumchan nakom ah kaphongdoh tai, tun nadaan semchu neisei pehtan. 27Nadaan thupeh chu neithemsah’in, chutengleh keiman natohdoh datmo umtah hochu kalungin geljing nange. 28Lungkhamnan eibom in kakaptai, nakam changing neihaldoh sahkit tan. 29Mijou milepche hotoh neichom khen in, nathuhil kahetthem theinading thuguh chu neipen. 30Kitah tah’a hinkho manding hi kakilhen ahitai, nathuhil dungjui a hinkho mandinghi kadinpi ahitai. 31Nadaan semhi katuhchah ahitai, O Pakai neijumso hihbeh’in! 32Nathupeh hohi kajui jingding ahi, ajeh chu nangin hetthem theina neipeh jingding jeh'in.

33O Pakai nathupeh chu neihillin, keiman achaina gei in juijing ing kate. 34Nathuhil kajuijing theina dingin hetthem theina neipen. Kalungthim pumpin hichu natohman podoh ingkate. 35Nathupeh dungjui in neikalson sah’in hichu kakipanapen ahi. 36Sum ngaichatna sangin nadanthu hetthemding ngaichat theina neipejon. 37Thil phachomlou hoa kon in kamit heimangin lang nathuchengin neihindoh sah’in. 38Nangma ginle jana neiho napeh kitepna chu keima kom ah neisuhdetpeh’in. 39Kajumna hinkho hi neipailhah sah’in ajeh chu nadaan semho hi aphalheh jengin ahi. 40Nathupeh hohi kajuinomlheh jenge naphatna’in kahinkho hi neithah sempeh kittan.

41Pakai namingailutna longlou tonsot hinna neiteppeh chu neipetan, 42Chutileh eitaitom ho donbutje kahetding ahi ajeh chu keiman nathutep chu katahsan in ahi. 43Phattin in thutah jeng neisei sah’in ajeh chu nangma chondan thupeh a bouhin kinepna kanei in ahi. 44Keiman nathupeh hochu itihchan hijongleh kanit jingding ahi. 45Keiman chamlhatna tahbeh chu kaneitai, ajeh chu nangma thuhil juidinga kigo kahitai. 46Keiman nathupehho hi jahchalou hella lengte masanga jong kaphondoh ding ahi. 47Keiman nang thupeh juidinghi kakipanapen ahitai ajeh chu hicheho hi keiman kadeilheh jengin ahi. 48Keiman nathupehho hi kadeilheh jengin chuleh jana jong kaneijin ahi, nadaan thu hohi giltah’in kagellin ahi.

49Kakom na kitepna chu geldoh’in hiche bouchu ahi kakinepna. 50Hiche nakitepna hin kahinkho akiledohsah kit’in kalungthim boina hoa kon in jong lungmon a eipen ahi. 51Mikiletsah hon noise tah’in eibol jongleu keivang nangma thuhilhoa kon in kapotdoh pon ahi. 52Masanglai peh’a nadaan sem nachepi hochu kangaito leh O Pakai hichechun eilhamon sahlheh jenge. 53Keima miphalou ho chunga kalung ahang’in ahi, ajeh chu amahon nathuhil apompouve. 54Hiche kakholjinna munhi hoilai hijongleh nadaan thu semho hi kala ngeipen ahijinge. 55O Pakai jantengleh nangma nahina hi kalungsung ah akilangjin, hijeh chun nathuhil hohi kajui jingin ahi. 56Nathupeh juijinghi kahinkho mandan hitoh kilhonkhomma ahitai.

57O Pakai, kachanding gouchu nangma nahi! Nathupeh juidingin kakiphaldoh jinge! 58Kalungthim pumpi hi namalsomna ngaichajing kahi, Nakitepna bangin neihepi jingtan. 59Kahinkho kalamlhahdan hi kanung gelji’in chutengleh nadanthu juina dingahin kalutkitji tai. 60Nathupeh juina dingahin gangtah’in kipelut jing nange. 61Miphalou hon chonsetna a lhohlut teiding eigojiuvin ahinla keimavang nadaan thuhilna a hin dettah’in kading jingin ahi. 62Nadaan thupeh hohi adih jeh’in jankhang jongleh kathoudoh’in nangma kathangvahjin ahi. 63Nangma thupeh juijing holeh nangma ging jingho dingin agolphau kahijinge. 64O Pakai namingailutna tanglou hin leiset chunghi adipmin, nadaan thuhi neihil jingin.

65Pakai nangin nakitepna dungjuijin thilpha tamtah neibolpeh tai. 66Nathupeh hoachun kading jinge, hetna thepna leh thu adih’a tantheina thuguh chu neihil in, 67Nangin neihilchah masang chun kana lamvaijin, tunvang nathu thun kanungtai. 68Nangman naphatna’in thilphabou naboljie, nadaan thuchu neihil in. 69Miphalou ho jouthu eiseikkhum jiuvin, ahinla kenvang kalungthim pumpin nathupeh ho dihtah’in kajuijing nai. 70Alungthim u ngol hoitah ahin; keivang nangma thupeh ho juijing hi kakipana ahijinge. 71Kathohgimna chu keidinga thilphajo anahi, ajeh chu hichehin nathupeh juinading langa lunglutna eipetheijin ahi. 72Nathuhil ho juiding hi sana le dangka simsenlou sangin aman atamjon ahi.

73Nangin neina gon a neinasemdoh ahin, tunvang nathupeh juina dinga hin hetthem theina neipen. 74Nangma ging ho jouen kei a konna hin kipa na mu u heuhen, ajeh chu keiman nathupeh ahin kinepna dihtah kanei in ahi. 75O Pakai keiman nadaansemho adihdan hi kahethem tai, neisuhgim ji ding hi keidia thil phachom ahi. 76Tuhin nasohpa neiteppeh bangin namingailutna longlou chun eilungmonsah jin ahi. 77Kahintheina dingin namihepina chun neiumkimvel jingin ajeh chu neithuhilna hohi keidinga kipana leh lunglhaina ahi. 78Keichung changa thujou seiho miphalou hochu jumle jachatna penlang, keivangin nangma thupeh hochu kangai jingding ahinai. 79Nangma daan hethemho leh nangma ging jingho chutoh neikivopkhom sahjingin. 80Nadaanthu kajuina ahin bolkhel kaneilouna dingin neivengin, chutileh jumna leh jachatna kaneilou ding ahi.

81Nangma huhdohna ding kangana lamma hin abeipaiding kahitai, ahinlah nathupeh ahin kakinepna adetjinge. 82Nakitepna ahung gulhunna ding vetnan kamit achahleutai, itih tahleh neilhamon dingham? 83Lengpi twipai savun ahun ahulgot bangin kagolhatai ahinlah nadanthu juiding kasumil dehpon ahi. 84Itih chanpi hi kanga jingding hitam? Keima eibolse hohi itihleh aphu nalah dingham? 85Nangma thuhil nahsahlou mi kiletsah hohin keima kipalna ding ko thuhtah alaijun ahi. 86Nathupeh jouse hi tahsan dinga lomtah cheh ahi. Ajeh bei a eidel lele hoa konhin neihuhdoh’in. 87Amaho hin eichaidohpai got u ahitai, ahinla keiman nathupeh hohi kajuida dehpoi. 88Namingailutna longlou chun kahinkho hi huhdoh’in, chutileh nadaan thu kajui theiding ahi.

89O Pakai tonsot'a dinga nakitepna chu van'a dettah’in aumjinge. 90Nangin nanatundoh hiche leiset hi aumjing bangin nakitahna jong akhang khanga umjing ahi. 91Nathilgon jouse hi nathupeh dungjui in tuni chan geihin aumsohkei un ahi, ajeh chu amahohi aboncha nalhacha ahisoh kei un ahi. 92Nadaan thupeh hin kipana hinkho’ah eihin khoukhah hihleh kagenthei lengvaina a kana mollem ding ahitai. 93Nathupeh daan hohi itihchan hijongleh kasuhmillou helding ahi, ajeh chu hicheho hin eihinghoi ahi. 94Pakai nanga kahi; neihuhdoh’in! Ajeh chu nadaan thu nitna a hin kakihabollheh jenge. 95Miphalouhon suhmang dingin lampi dungah eichanglhi le jonguleh kei man vang nadaan thuhi kalung sungah thipbeh chan geljing nange. 96Thiljouse hin akhonna aneisoh keije ahinlah nadaan thupeh hin akhonna aneipoi.

97Oh, nadaan thupeh hi iti kandei hitam! Nilhumkei kei in hicheho hi kageljin gin ahi. 98Nadaan thupeh hohin kagal mite sangin eichihsah’e, ajeh chu hicheho hin phattin in eiveng jinge. 99Nadaan thuhi phattin a kageljing jeh’in eihilho sangin jong hetgilna kaneijotai. 100Nathupeh daan ho kanitjing jeh’in kachunga upa tehseho sangin jong kachingjo tai. 101Nathupeh dettah a kajuijing theina dingin thilse bolna a cheding kanompon ahi. 102Nangin phate keicha neihil ahitah jeh’in nadaanthu juina a kon in kakiheimang nompon ahi. 103Nathupeh hi kapatep leh alhumlheh jenge, khoiju sangin alhumjon ahi. 104Nadaan thupeh hohin hetthemna eipen; hiti chun hinkho adihlou lam a cheding hi kathet lheh ji e.

105Nathupeh hi kakalsonna a eipuiding thaomei jin apangin, kalampi salvah ding vah’in apangin ahi. 106Nadaan thupeh dihtah hohi kajuijing ding ahin, hiche dinga hi kitepna kananei ahitan avel a kakitep kitding ahi. 107Pakai nathutep dungjui in kahinkho hoidoh sah’in ajeh chu kathohlel behseh jenge. 108O Pakai kathangvah nahi kilhaina thilto bangin neisanpeh’in lang chuleh nadaan thupeh ho neihil in. 109Keima kahinkho hi kilep ditdet in aum e, ahinlah nathuhil hi kajuidadeh pong e. 110Miphalouhon kakipalna dingin thang akam jingun ahi, ahivangin nathupeh’a kon a kakiheimangdoh louding ahi. 111Nadaan thuhi keidinga gou ahi, hicheho hin kalungthim akipasah’in ahi. 112Kathini changei a nadaan thu nitdinghi kadinpi ahitai. 113Kitahna neiloute hi kathet ahin keivang nathuhil ho juidinghi kathanopna ahi.

114Nangma hi kakiselna leh kalumdal nahi, nathupeh hi kakinepna bulpi ahijinge. 115Milung gilouho keija kon in potdoh’un, ajeh chu keiman ka Pakai thupeh hohi kajuinom e. 116Pakai, nakitepna bangin kahinjouna dingin tha neipen kakinepna hi neijumso hihbeh’in, 117Nathahatnan neituh’in chutileh kahoidohding ahi, chutengleh nathupeh hi kachepi jingding ahi. 118Nathupeh a kon a potdoh hohi nangin napaidoh gamheltan ahi. Amahohi amahole amaho kijoulhep ahibouve. 119Nangin mi-engse hochu leiset chunga kon in bohse bangin napaidoh jitan ahi, hijeh chun keivangin nadaan thuhohi kajui nom e. 120Nangma ginnan kakithinge, nathutan dihtah ho jeh’in kichatnan kadim e.

121Keiman thudih tahleh kitahna neitah’in na katonge, kagal mite khut a neidalhahih’in. 122Phatthei neibohding kinepna neipen, mi kiletsahho neibolsetsah hihbeh’in. 123Nathutep dihtah chu asuh bulhit nadinga neihuhdohna dingchu kavet vetnan kamit achah leutan ahi. 124Nami ngailutna longlou chun nasoh hi neibolpha jingin, chuleh nadaan thuho chu neihil in. 125Nadaan thuhohi kahettheina dingin nasohhi hetthem theina neipen. 126Pakai tuhi nakipatna natohphat ahitai, ajeh chu miphalouhon nadaan thu apal kehgam tauve. 127Tahbeh’in nathupeh hohi sana mantampen sangin kadeijon ahi. 128Nathupeh hohi adihsoh kei in, hijeh’a chu lamdihlou hohi kathet ahi.

129Nadaan semhohi akidang theilheh jengin hijeh’a chu kalungthim pumpia kajui ahi! 130Nadaan thuhil’a hin vah akilangin hijeh chun milham minjong ahetheijin ahi. 131Nathupeh ho kangaichat behseh jeh’in kakam kan hai jinge. 132Nangma ngailuho nabolna bangin hung kihei in lang nami khotona neimusah’in. 133Nakitepna dungjuijin kalhuh louna dingin neituh’in, thilse eijosah hihbeh’in. 134Eisugenthei hoa kon in neihuhdoh’in, hitia chu nathupehho hoitah’a kajuijing theina dingin. 135Nasohpa kei ahin namaivah chu hin kilandohsah’in chutengleh nadaan thuchu neihil in. 136Mihemten nathuhil ajuitahlou jeh’un kamitnahin mitlhitwi vadung bangin along’e.

137O Pakai nangma thudihtah nahi, nadaan semho jong adih’e. 138Nadaan semhohi nolnabei ahin chuleh tahsanthei mong mong ahi. 139Kagalmiten nathupehhi anahsah loujeh’un kalunghan hi akikhonhel jengin ahi. 140Nathutep hohi kapatep sohkei ahitan adihlheh jengin keiman kadeilheh jenge. 141Keimahi hetkhamlou leh notthap kahivangin nathupeh hohi kasumil dehpoi. 142Pakai nangahin tonsotna thudihna aum e, chuleh nathuhil dihtah hojonghi nolnabei ahi. 143Hahsatna le lungkhamna in eilonvuh jeng jongleh nathupeh hohi keidinga kipana tahbeh ahijinge. 144Nadaan semho jouse jonghi adihjing jenge, hinna kaneitheina dingin neihetthem sah’in.

145Kalungthim pumpin kataove O Pakai neihouvin, keiman nadaan thuho chu kanit jingding ahi. 146Nangma kahin kouve Pakai neihuhdoh’in, nadaan thuho chu kajuijing theinadin. 147Khovah masangin matah’in kathouvin, nathutepna chun kakinem in panpi kathum e. 148Jan khovah’in kahah’in nathutep chu kagel jinge. 149Nami ngailutna dihtah’a konchun O Pakai kataona ngai in lang nadaanthu juina ahin neichohhing kittan. 150Daan neilou miten eihung delkhum un ahi, amahohi nangma thuhilla kon in agamla lheh’un ahi. 151Ahinlah O Pakai nangma naichan naum in ahi, chuleh nangma thupeh ho jouse adih’in ahi. 152Nadaan semhohi tonsot'a ding ahije tihi kaneolai a patna kanahetsa ahitai.

153Kathoh gimna hi venlang neihuhdoh’in, ajeh chu keiman nathuhil hochu kasumil khapoi. 154Keima langa pangin lang kachungchang thu neiseipeh’in nakitepna bangin neihuhdoh’in. 155Miphalou hovang kihuhdoh louding ahiuve. Ajeh chu amahon nadaanthu hi anahsah pouve. 156O Pakai namihepina hi anasalheh jenge, nadaan semhohi jui ing kating kahinkho hi neikiledohsah tan. 157Mitamtah’in asugentheijin eisuboijin ahi, ahinlah nadaan thu juina a kon in kakiheimang dehpoi. 158Hitobanga mikitahlou hohi kamutengleh kalungnatpi lhehjin ahi, ajeh chu amahohin nadaanthu hi anahsah pouvin ahi. 159Pakai ven nathupeh hi ichangei a kagelkhoh hitam, namingailutna longlou jal in kahinkho hi neilepeh kit in. 160Nadaan hung kipatna thuguh chu thutah ahi, nadaan thu dihtah hohi tonsot'a dingjing ding ahi.

161Mithaneihon dihloutah’in eibolseuve, ahinlah keiman nathupeh hi kalungthim in ginna kanei jinge. 162Khattouvin gou nasatah akimudoh bangin nathupeh ahin kakipah’in ahi. 163Keiman jou le nal kitihi kathetnin ahinlah nathupeh hohi kagelkhoh’e. 164Nadaanthu hohi adihjeh’in nikhat in sagivei thangvahna penge. 165Nangma daanthu ho gelkhohna neiho jousen thahatna anei un ahi chuleh kipalna aneipouvin ahi. 166Pakai nangin neihuhdoh dinghi kangaichalheh jengin ahi, hijeh’a chu nathupeh ho hi kajuijing ahi. 167Nadaan semhohi kahinjui jinge ajeh chu hicheho hi deium kasalheh jenge. 168Ahi, keiman nathupeh hole nadaan semhohi kajui jinge ajeh chu nangin kakimanchahna jouse nahen ahi.

169O Pakai kahin kounahi ngai in nangin neiteppehna bangin hetthem theina lungthim neipen. 170Kataona hi ngai in, nathutepna bangin neihuhdoh tei in. 171Kakam a kon in thangvahna hi hung lengdoh jenghen ajeh chu nangman nadaan thu hohi neihil themtan ahi. 172Kalei in nathupeh hohi thangvah lan sa hen, ajeh chu nathupeh jouse hi adih’in ahi. 173Nei kithopina khutchu hin lhangdoh’in ajeh chu na thupeh ho juidinga kigotna kanei ahitai. 174O Pakai nangin neihuhdoh dinghi kangaichat jing ahi, ajeh chu nangma thuhil hohi kakipana ahijinge. 175Nangma kathangvah jing theina dingin nei hing hoi in, chuleh nathupeh hohi eikithopin pangjing hen. 176Kelngoi banga vahmanga kahitai hungin lang neihung holdoh tan ajeh chu nathupeh hohi keiman kasumil theipoi.