1O Pakai, phulaji Pathen, O phula ji Pathen nathutanna dihtah chu loupitah chu hung kilang doh hen. 2Hungthou doh in, vainoi thutan pa. Mi kiletsah hochu achanding dol u chansah in! 3Miphalou hohi itih chanpi kipah diuham, ichan gei in em Pakai? 4Itih chan kiletsah tah a thu asei diu ham? Hiche migilou hohi itih chanpi kihatsah diu ham? 5Pakai amahon namite asuchip gamtauve. Nangma mite hohi amahon asugenthei’un ahi. 6Amahon meithai hole gamdang mi chule chaga ho athat gam un ahi. 7Amahon asei un, “Pakai in eive pouve chule, Israel Pathen in anasah poi”. 8Kigel pha kit un, mingol ho! Itihleh tahle nahin hethei diuvem? 9Na nakol sempa chu a nangong ham? Namit sempau chu amitcho a ham? 10Aman chitin namtinte ana engbol in ahi, nangjong na engbol louding ham? Aman imajouse ahesoh kei in ahi, nangin ipi naboljong ahetsohkei louding ham? 11Pakai in mitin lunggel ahesoh kei e, imacha phatchomna neilou ahi ahesoh kei e. ✡ 12Pakai, nadanthu a nahil hole nasuhdih ho chu iti kipah u hitam? 13Migilou te kimat nading leiko tong akilai kah sen nangman amaho chu boina akon in lung ol na nape e. 14Pakai in amite nungsun ponte; Aman ami deitumte donlou in koi ponte. 15Thutanna mun a thudih kimuding chuleh michonpha ho jousen apanhu diu ahi. 16Gitlou na akon a koiham eidal ding? Miphalou ho masang a ei din peh ding koi ham? 17Pakai in eina kithopi lou hile, keima thina lhankhuh mun a thipchet a ana kicholdo tading kahi. 18“Keima kalhutai” tin kakap jah in, O pakai nami ngailutna longlouchun eiphong dingin ahi. 19Keima lungdon na a kadim teng, nami lungmon nachun kinep nale kipa na eipe ji e. 20Dandih lou a natong lamkai ho chun Pakai kalang a pangding hi ati ngam nadiu vem? 21Themmo nabei ho dou din amaho akipun khom un mona neilou chungah thina chan in athepmo sah uve. 22Ahin pakai ka Pathen hi kakisel na songpi kakulpi chu ahi. 23Pathen in migiloute achonset nau chu ale thuhding ahi. Achonset nau jeh a asuh gam ding ahi. Pakai I Pathen uvin asuh gam ding u ahi.