1O kamite ho, kathuhil hi ngaiyun. Kathusei a hin nakol’u hinsungun, 2ajeh chu keiman thulem a nahenga thu kaseiding ahi, keiman achesa thilsoh ho-a kon a kahin hilding nahi, ✡ 3eihon thusim ijahsa houleh ihetsahou, thusim ipu ipateuva kon a hung kiseilhapeh ho ahi. 4Eihon hiche thutah hohi icha inaoteu i-impeh loudiu, Pakai natoh loupi tahtah hohi, athaneinale akidanna hohi ikhangthah houhi iseipehdiu ahi. 5Ajeh chu Aman Jocob kom a daan anapeh-a, Israel kom a thuhil ho anapeh ahi. Aman ipu ipateu atu achateu ahil diuva thupeh anapeh ahin, 6hitia chu ahunglhung ding khangthah ten ahet nadiuleh ahung pengloulai chapang ho dinga, chuleh aman amaho chapangte ahilsonna diuva ahi. 7Hitia chu khangthah ahunglhun channa Pathen a kinepna thah aneisah nadiu, Pakai natoh kidang thil loupi hochu asuhmillou nadiu chuleh athupehho anitjing nadiuva ahiljing diu ahi. 8Hiteng chuleh ipi iputeu tobang talou a lungtahna, kiphinna, kitahlouna Pathen a alungthim’u pehnom louna anei lou diu ahitai. 9Ephraim galsat hon thalchang akipoh vangun akinung hei un galmun a konin ajam tauve. 10Amahon Pathentoh akitepnau ajuitapouvin ama thuhil dinpi ding anom tapouvin ahi. 11Pathen in ipi abolpeh uham thil kidangtah tah anabol hochu, 12napu napateu dinga thil kidang anatohdoh ho, Egypt gamsungle Zoan phaicham chunga, atohdohho asumil tauvin ahi. ✡ 13Ajeh chu Aman twikhanglen ana homkhen in twi chu bang bangin akikhangin amaho anapui galkaiyun ahi. ✡ 14Sunleh meilhang in anapuijin, janleh meikong in anapuijin ahi. ✡ 15Aman gamthip gamm a songpia kon in adondiu twi anaputdoh sah-in ahi. 16Aman songpia konna twi chu vadung bangin analondohsah in ahi. ✡ 17Ahijeng vang'in neldi gam achun amahon chonset anabol’un hatchungnung dounan ana kiphin’un ahi. 18Amahon alungsung uchu lungtahna neipumin Pathen ana patep un nehding anathumun ahi. ✡ 19Amahon Pathen Amatah dounan thu anaseiyun “Pathen in gamthip gammah an eipejou pouve” atiuve. 20Henge, song chu ajep’un twi chu aputdoh nai, ahinla amite changlhah le sa me eipejou pouve” atiuve. 21Pathennin hichehi ajahdoh phatnin alunghang lheh jengin, Jacob dounan alunghanna mei akoudoh jengin ahi! Hitihin Israel douna alung hanna ahung koudoh jengin ahi, 22ajeh chu amahon Pathen atahsanpouvin chuleh amaho akhoukhah diuvin jong ana tahsan pouvin ahi. 23Pathen in chungleng vanthamjol thu apen vankot jouse jong ahongdoh in, 24Aman aneh dingun van'a konin Mana gojuh in ahinjuhlhahsah in van changlhah chu ahinpen ahi. ✡ 25Amahon vantil buchu aneuvin, Pathen in alungna chimsetnun apen ahi. 26Aman solam huichu ahin nunsah in, Athahatnan lhanglang huijong anunsah in ahi. 27Aman aneh dingun sachu vutdijat ahin juhlhah sahin, vacha ho chu twikhanglen panga neldi jat ahin, 28Aman vacha ho chu aponbuh sungu leh avel uvah ahin lenlhah sah in ahi. 29Amahon iovasetin aneuvin ahi. Angaichat dungjuitah in apen ahi. 30Hinla amahon angaichat dungjuija anehva masangu, akamsung uva sa aumpet jeng jong chun, 31Pathen lunghana achung uvah ahunglhungtan ahileh Aman alah uva ahatpen pen hochu athat tan ahi. Israel khangthah anasapen hochu athat gamtan ahi. 32Ahijeng vang'in mipiho chun chonset aboljom jingun ahi, thilkidang ijat abol vang'in atahsan dehpouvin ahi. 33Hiti chun ahinkhou chu lhuhkam na ahitan akum khouchu kichatnan adimtai. 34Pathen in amaho ahin thapat phatnun amahon ajona langin Amachu ahin holtauvin ahi. Kisihna ahin neitauvin Pathen ahin holtauvin ahi. 35Hiti chun Pathen chu asongpiu ahi chuleh Pathen chu hatchungnung le ahuhhing pao ahi ahin geldoh tauvin ahi. 36Ahijeng vang'in hichu kamnal a anaseijiu ahibouvin alei u mangchan jou anaseiyun ahi. 37Alung sungu chu Pathen a ana petheng pouvin Pathentoh anakitep nauva jong ana dingdet pouvin ahi. ✡ 38Hinla lungsetna dim Pathen chun achonsetnau anangai damun amahochu ana sumang deh pouvin ahi. Phat atamjon alunghanna anatuh tangin hiche bangchun ima anatongdohpon ahi. 39Tahsa mihembep ahiuve ti ahejingin, hui anun leh heikhat kahbou ahin ahung kiletapoi ti ageldoh in ahi. 40Gamthip sunga ijatvei Ama douna ana kiphin jengu chuleh alungsung anatsah vang'in, 41Avel vel in Pathen thohhat nachu apatep jiuvin Israel Pathen chu asulunghang jiuvin ahi. 42Amahon athahatna agalmi houva kon a anahuhdoh u hitam ageldoh joutapouve. 43Egypt gamsunga thil kidang ijat abolu hitam chuleh Zoan phaicham a athil kidang bol hochu ageldoh tapouvin ahi. 44Vadung ho thisan asosah a don mohella alha, vadung twi donmo hella alha jengchu. ✡ 45Pathen in amaho lah a thousi vaibong alansah a uphohte alansah a anehgam ujong ahepha tapouve. ✡ 46Aman achang jouseu khongbai aneh gamsah in alousoh jouseu jong khaokhopi anehgam sah e. ✡ 47Aengpithei jouseu gel avohlhah sah sohkei in, atheipiu phung jouseu jong daibang athagamsah in ahi. ✡ 48Agancha jouseu gel lah a dalhah in aumsah in, akelngoi houjong keh alhah lihsah sohtai. 49Achung'uva nasatah in alunghangin, alung dammona alung hanna, mi sumang vantil hon tamtah alhahkhum tan ahi. 50Aman alunghanna achung uvah achuh sahtan, Egypt mite hinkho anahing hoipon, amangthah gamtan ahi, 51Egypt insunga achapa tahpen cheh athat in Egypt gamsung pumpia khangdongte pahcha amolsahtai. ✡ 52Hinla Aman amite chu kelngoi honbangin apuiyin gamthip noija bitkei in apui galkai tan ahi. ✡ 53Aman mongtahin apuilen hijeh chun amahon kichatna aneipouve, chujongleh twikhanglen in agalteu alhoh mangpeh gamtai. ✡ 54Amaho chu Pathen in agamtheng abanjetna atundoh, molsang vum achun ahin puilut in, ✡ 55Amaho masangah namtin vaipi adelmang peh sohkeiyin, abonchauvin achan dingu gam ahoppeh chehin, Israel phung namtin abonchauvin ama ama ponbuh cheh a achensah tai. ✡ 56Ahijeng vang'in amahon hatchungnung Pathen dounan thil abol jingun athupeh ho khatcha anitpeh pouvin ahi. ✡ 57Apu apateu bangin avah mang-uvin jou jengin na atonguvin ahi. Amahoa chu thalpi janglou bangin akitah pouvin ahi. 58Amahon pathen dangho doiphung aphutdoh un Pathen alunghan sah uvin, chuleh semthu pathen ahoujeh-un Pathen athangthip sahtauvin ahi. 59Pathen in ajahdoh phat in hatah’in alunghangin Israel chu pumpai in apaimangtan ahi. 60Pathen in Shiloh achenna mun adalhan mihemte lah a aumna ponbuh chu adalhatai. ✡ 61Aman aloupina le athaneina hetna kitepna thingkong chu galmiho khutna apehdohtan ahi. ✡ 62Ama amite chunga alunghan jeh-in agalmiteu athasah gamtan ahi. 63Gollhangho galah athigam tauvin, nungah ho akichenpidiu aumtapon ahi. 64Thempute athat gamtauvin ameithai houvin alhasetpi thei tapouvin ahi. 65Ajonan Pakai chu a-ihmua ahung khangdoh bangin ahung thoudoh in mihatpa jun akiltildoh bangin ahung kitildohin, 66Galmi hochu anungno in a-itiha ding jumna atosah tan ahi. 67Ahinla Joseph chilhah hochu apaidohin, chuleh Ephraim phung chu alheng tapon ahi. 68Aman akhellin Judah leh angailut Zion molchu alhengin, 69hichea chun vanho san banga sang, leiset banga chah a-itih a umjing dingin houin khat atungdoh tan ahi. 70Aman asohpa David chu akelngoi chinna a kon in anakoudoh’in analheng tan ahi. ✡ 71Aman kelngoipi le anou achin laijin akoudoh’in amite Israel Jacob chilhah hochu kelngoi chinna ching dingin anapansah tan ahi. 72David in amaho chu lungtheng tah leh chingtheitah in analamkaiyin ahi.