1Nangho mipite’n hichehi ngaijuvin! Nangho vannoi mite jouse’n ngaicheh uvin! 2Milen le mineo, ahao avai in ngaisoh keijun! 3Ajeh chu kathuseiho hi chihna thu ahin, chuleh kalung’a kagel jong hi hetgilna dimset ahi. 4Keiman thuchih kaseiho chu giltah’in kegel’in hiti chun semjang sai a kitilkhou in thulem kaseiho suhlhap na kanei ji'e. 5Kagalmite’n eihin umkimvel’uva boinan eihin lhunkhum teng idia kakichat ding ham? 6Amahon anei agouhou atahsan un ahaotheinau a akiletsah ui. 7Ahijeng vang’in athina diuva kon’in amaho le amaho akihuhdoh joupouvin Pathen henga sum in ahinkhou akichoh thei pouve. 8Lhatdamna kitihi bailam tah a um ahipoi, ajeh chu koiman alhingset’in apejou poi; 9tonsot’a hingjing a lhanmun’a chelou hel nading chu. 10Michingho chu nikhat thitei diu ahi, hiche mingol le lungel neilou ho banga anei agouhou chu adalhah cheh di’u ahi. 11Lhanmol chu atonsot in’u ahitan achen jingna di’u mun chu ahitai. Anei agouho’u chu amaho min putsah jeng leu. 12Aminthan nao chu sotlou ding ganhing ho bang’a thithou thou di’u ahi. 13Amaho hi min miching dan’in geljong leu mingol bang’a thina ato thou thou di’u ahi. 14Kelngoiho bang’a lhanmun lhung thou thou di’u thina chu akelngoi chingpa’u hiding, anei agouhou a kon’a gamlatah’a lhanmun khat’a monlha thou thou diu ahi. 15Ahin keivang Pathen’in kahinkho eilhatdoh peh’in tin, Aman lhanmun’a kon’in eihuhdoh nante. 16Hijeh chun migilou ho ahung hao ua a innchen ujong ahung hoibe cheh tengu le lunglhadah hih in. 17Ajeh chu amaho athiteng uleh imacha akipoh di’u aumpoi anei agou’un lhan sung’ah juilut thei pouvinte. 18Hiche lei hinkho’a hin alolhin jeh’un vangpha le ochat um’in kigel jong leu, 19Chemasa ho bang bang’a thidiu khovah amukit louhel di’u ahitai. 20Anei agou’u kiletsahpi ho chun amaho jong ganhing bang’a phat khatleh thithou thou diu ahilam akihetdoh lou’u ahi.