1Pakai ka chunguva thilsoh ho hi hingeldoh temin, ven ichan geija vetset ka chan’u hitam? 2Ka goulo diu chengse hi namchom miho achang tauvin,

Ka in ka lou jouseu la gamchom miho’a ahitai.

3Keiho hi nunei lou panei lou kahi tauvin, kanuteu jong meithai ahi gam tauve. 4Ka dondiu twi jeng jong kakichoh thu diuvin aumdoh tan,

Ti ding thing jeng jong kakichoh thudiu ahitai.

5Eihin nungdelteuvin eihin phah pai dingu ahitan,

Keiho ka haisam tauvin, ahinlah kingahna ding mun ka neipouve.

6Neh leh chah ning lhinga kanei jouseu, Ka kihinso jou nadiuvin Egypt leh Asssyria khutna ka kipelut tauvin ahi. 7Kapu kapateu ana chonseuvin ahinlah amaho athi gamtauve,

Hijeh chun amaho chan ding thoh gimna leh engbolna hi keiho chunga achu tan ahi.

8Ka sohteu chu tun keiho Pakaiyin apang gamtauvin, ahinlah koima eihuhdoh diu aum pon ahi. 9Gamsun’a pum hatin vai ahop jeh'in thiding kicha pum pumin anneh kakiholun ahi. 10Kel khoh jeh'in ka vousou tapkonga changlhah kikang bangin avom gam tai. 11Kagal miteuvin Jerusalema numei ho Judah khosunga nungah khang dong ho kichep nan anei gamtauve. 12Ka lengteu jong akhutpiuvin akhaisangun,

Ka lamkaiteu jong noise tahin ei bolpeh tauvin ahi.

13Gollhang ho chu sumhei goi dingin akaimangun, chuleh pasal chapang ho chu tiding thing aputsahnauva a lonlele jeng tauvin ahi. 14Lamkai ho khopi kelkot ngahin apang tapouve. Khangthahten lam leh la sah abol tapouvin ahi. 15Kana lam nao chu lung khamna asohdoh tan,

Ka lungsunguva kipana abeitai.

16Ka luchang uva konin ka lallukhuhu alhamang gam tai. Ka chonset jeh'un ka chung uva sapsetna achu tai. 17Hijeh hin kalungu alhalhop tan chuleh kamit uvah mitlhi adimtan ahi. 18Ajehchu Jerusalem hi akeosehin aki jam tan, Sialten lhat nan anei tauve. 19Ahinlah Pakai nangma abang na hi jing jeng e, nalal touna chu akhang khangin aum jing e. 20Ipi dinga nei suhmil jing nahlaiyu ham? Ipi dinga donlou dai louva neikoi nahlaiyu ham? 21O Pakai neikiledohsah kitnun lang nangma komma nei puilut kittauvin! Ka kipanao masa chu neipe kittaovin! 22Ahilou leh neipui doh mong mong diu hitam? Ole Ka chunguva nalung hangjing nalai ham?