1Elihu in athusei ajom nalaijin: 2Thutah muchet sah ding kanei nahlai jeh in seibe kit nalai inge, ijeh inem itile Pathen thalhenga seiding kanei nalaije. 3Keiman eisempa chonphatna thu giltah a nelna kapeh ding ahi. 4Keima hetna bukim nei kahi jeh in thutah tailou thudang imacha keiman kaseipoi. 5Pathen chu hatchungnung pa ahin, ahinlah aman koima isah louvin abolpoi. Ama chu thanei naleh thil hetkhen themna akopto a hatchungnung pa ahi. 6Aman migilou ahinghoi jipon, ahinlah suhgentheija umho chu them achan ji'e. 7Aman nolna bei miho a konin amit ahei mang ngaipoi, ahinlah laltouna a leng ho toh atoukhom sah jin chuleh aimatih channa din achoisang ji'e. 8Thihkol a ana kihen hihen lang chuleh gentheina a chu kha ana hijong leu, 9Aman akiletsah nau amuchet sah jin, chuleh achonset nau avetsah ji'e. 10Alungthim u alahmang peh in, chule thilse a konna akilehei nadiu thupeh apejin ahi. 11Amahon thu ngaiju hen, chuleh athusei ngaipeh ule ahinkho lhum kei uva khantouna jousea phatthei kiboh diu ahi. 12Ahinlah athusei ngai ding anoplou uleh amaho chemjam a kithat ding ahin, chuleh hetna lhahsam jeh a thidiu ahi. 13Ijeh inem itile Pathen neiloute chu lunghan nan adimset un, aman a engbol teng u jongle nei kithopiuvin tia kou ding chu anom ji pouve. 14Ahinkhou chonchatvai na a aman jou nung uleh khangdong cha chan athijiuvin ahi. 15Ahinlah agenthei thoh jeh u chun aman ahuhdoh jiuvin ahi. Ijeh inem itile agenthei nauva kon thungaije ahiljin ahi. 16Job Pathen in vangsetna ho a konin napui doh in lungnat naho a konin ongthol tah in nahoijin, nadokhang chungah anpha pha nalui doh peh e. 17Ahinlah nangin Pathen neiloute thu kitan ding kichat nan nadim in, lungkham hih in thutanna leh thudih'a thutanna chu machal jing ding ahi. 18Ahin kivephan, achuti louleh nei le gou vin nalhem lha khantin nehguh kilah jeh in nang leh nang chonse hih in. 19Nanei leh nagou ahiloule thahattah'a nakihabol naho chun lung gentheina jouse a konna nahoidoh jou ding hinam? 20Jan hunglhun kal ngahlel hih in, ijeh inem itile hichu mihem te kisuhmang nading jan ahibouve. 21Kiging phan thilse a konin kileheijin, chonsetna hinkho a konna nahoidoh nadinga Pathen in hiche gentheina hohi ahin lhunsah ahi. 22Ven Pathen hi thahat chungnung ahin ama tobang mihil thei ding koi um'em? 23Koima chan hichehi nabol ding ahi atitheipon, ahilouleh nabolkhel tai tia seithei ding chu, 24Hiche ho khel chun athil bolthei thahatna chu achoian un, vahchoina la ho asauve. 25Gamla tah ahijeng vang'in hiche ho chu mijousen amucheh uve. 26Ven Pathen hi eihon ihet sang uvin aloupi jon amakum ho chu sim jou hilou ahi. 27Aman twi chu ahu in achop touvin chuleh chuti chun alhitheng in go asosah kit e. 28Meilah a konin go ahin sung lhan, chuleh mi jousen aphatchom pi ji'e. 29Meilom hung kijel ji khu kon ahet theija chule vanna vanging kithong jeju a akitol lele khu kon ahetdoh jou ding ham? 30Ven ama kimvel a kolphe khu iti avahsah ji a, chule twikhanglen to geija avahsah khu iti ham? 31Hiche athahat athil boltheina ho a hi mihem te avah khang ji a nehle chah neng jeng junga apeh ji ahi. 32Aman akhut in keh chang aki choijin chuleh adoina laitah a chudin aseplha jin ahi. 33Hiche van gin chun ahina aphondoh a huipi gopi chun alunghan alungsatna chu aphondoh ahi.