1Ahinlah tun vang apateu kelngoi chinga pang kauicha ho toh lhaikhom dinga jong lhing joulou mihem, kasanga dong jo golhang khangdong ho nuisat bep in kaum doh tai. 2Amaho khu keija dinga tamtah'a pha ahiuvin, hiche ho chu von sesa lungset um ahiuve. 3Amaho chu akel thoh jeh uva gong ahiuvin, chuleh nel phai gam mihem chen louna leh gaso talou leiset muthim gam'a chu jam ah ahiuve. 4Hiti chun amahon hamboh lah a konin gamlah a na eng ho chu akilo uvin chuleh muntheh phung jung ho chu akilah un anejiuve. 5Amaho chu mihem kiloikhom na a konna kidel mangah ahiuvin, chuleh gucha ahijeh uvin mihem ten amaho chu asamse jiuvin ahi. 6Hiti chun gom kokhuh thuhtah tah lah a timul thou pumin leiko lah leh songpi ho lah a chun ching uve. 7Amaho chu hamboh lah a sa loupitah a aum bangun a ao chehchuh jiuvin thahpi ho noija chun alhaikhom jiuve. 8Amaho chu kiloikhomna a kon kipaidoh mingol minbeiho ahiuve. 9Chuleh tun amahon pao ngeilou louvin isah loutah in einuisat jiuvin eiphin phin jiuve. 10Amahon iman eisep pouvin chuleh kamaija chil set khumpeh ding tailouvin kakomah ahung pouve. 11Ijeh inem itile Pathen in kathal khao eisattan peh in aman eisuhnem ahin, hijeh a chu thuneina umnaho jouse chu apaimang u ahi. 12Hiche akideldoh ho chun kamaichang tah a eidoudal un, kilhon changnam pet dingin eisol un chuleh kalampi ah thang eikampeh uve. 13Amahon kalamlhah jouse eikha peh un chule keiman eikithopi ding koimacha kaneilou ahet jeh uvin eisuhmang nathei diuvin abolthei jouseu abol'un ahi. 14Amaho muntinna konin kakomah ahungun keima kalhah suh pet in amaho kachungah akichom uve. 15Tun vang kicha tah in kahingin eikijabol najouse huilah a akithe mangin kanei leh kagou jouse meilhang kitol mang bangin amangthah soh tai. 16Chuleh tua hi kahinkho along mang ahitan, kanikho ho jong genthei hesoh nan eihen den tai. 17Jan teng kagu kachang ho natnan alodim jin hichun tang louhel in eichip eichip ji'e. 18Khuthat tah in Pathen in ka sangkhol eilah peh in ka sangkhol ngong ah eimanchah kheh in ahi. 19Aman bonlhoh lah a eisep lut in keima hi leivui leh vutvam sanga jong panna beijo kahi. 20Nahenga hung tao kahi O Pathen, ahinlah nangin nei donbut pon, namasang a ding kahin, ahin nangin vet ding'in jong neigo poi. 21Keija dinga lungsetna beihel nahung hitai. Nathahat na chu kei engbol nan namange. 22Nangin chimpei lah a neisep lut in chuleh huipi kinong in nei sumange. 23Chuleh nangin mihing jouse lhunna kathina ding munna chu neisol ahi ti kahei. 24Tahbeh mongin genthei hahsatna a kithopi ngaicha ahung tao tengule koima cha hiche genthei thoh ho lang ngan kihei pouvinte. 25Hahsatna toh ho dinga kapji kahi lou ham? Vaicha genthei tedinga nasatah a ka genthei pi ji hilou ham? 26Hijeh chun thilpha kave jin ahinlah hiche sang chun thilphalou joh chu ahung jin ahi. 27Kalungthim agentheijin chuleh cholngahna kanei theipoi. Kagentheina nikho te hin eisu genthei lheh e. 28Nisavah umlouna muthim lah a kavah len mipi kigol toh chet lah a kadingin kithopi ngaichan kakap e. 29Hiche ho khellin keima gam-ui sopipa simbupi toh kikoppan eiki ngaiton ahi. 30Kavun ho aduplha soh tan chule kagu kachang ho jouse khosih in kati apeh henhun e. 31Ka selangdah gin in jong lungkham la ahin sa in katheile gin jong kana ogin in aginge.