1Hichun Shuh mi Bildad chun adonbut in: 2Nathusei nangah masang a ichan sauva nasei nahlai ding ham? Ka donbut diu nadeija ahile chihna thu seijin. 3Nangin keiho gamsa ho sanga phajo maimaija neigel uham? Nangin keiho hi mingol a nei ngai tou ham? 4Nalung han man in nalu jang sam chu botchai theijin nate, ahinlah hichun leiset asuhmang thei ding ham? Songpi ho akithin sah theiding ham? 5Tahbeh in migilou te thaomei kimut mit peh intin ameikong jeng u jong vahdoh lou ding ahi. ✡ 6Aponbuh uva athaomei jengu jong hung thim ding ahi, achung lang uva kikhai thaomei jong kimutmit ding ahi. 7Migilouvin ama kam'a kitahsan tah a akalson nau kisuhchom peh ding, amaho thilgon mama a chu kipal lhu diu ahi. 8Migilou chu lenna a ohin kokhuh sunga alhalut jiuve. 9Thang kikam chun akhotal jum u akhit khan thang chun akhit chah kheh e. 10Khaokol chu tolla akisel den nalaijin, alampiuva khao akijung galkai peh e. 11Migiloute chu kichat tijatnan aum kimvel un chule akalson jouse asuboi ji'e. 12Akelthoh u chun athao asulhom in chuleh vangset nachun amaho kipal lhuh ding chu anga ahi. 13Natna in ativun u anen, thinan atibah u aval lhum tai. 14Ahoidoh nau ainuva konna kibotkhen uva, chule kichat umtah lengpa henga chun akipui lha tauve. 15Migiloute in chu kihal lha a ain chung uva kath meikong akijuh lhah sah e. 16Ajungu golha a abah u jong goplha ding ahi. 17Aum ingo kihetna ho jouse leisetna konna mangthah ding ahin koima chan amaho min chu ageldoh kit lou ding ahi. 18Khovah a konna muthim lah a kisep lut ding ahiuvin vannoi leiset a konna kidel manga ahi tauve. 19Amahon chate hihen tute hijongle anei tahlou ding u ahi, achennau gamsung a hung cheng ding son leh pah hung beihel ding ahi. 20Nilhum lam miten avangset diu akichat peh un, solam amite akichauve. 21Hichehi migilou Pathen neiloute chenna mun ahi tin hin seiju vinte.