1Hichun Teman mipa Eliphaz in adonbut in; 2Michingin hitobang thu hom keu chu donbut ponte. Nang hi imacha hilou nahin chule khohui hungnung bep nahi. 3Michingin tang louva thu homkeu sei din akigo jipon, hitobang thu a chu ipi phatchomna um'em? 4Pathen ginna neilou nahim, ama dinga jana neilou nahi. 5Nachonsetna ho chun nakama ipi seiding ham ti naseipeh untin, nathucheng hohi joulhep themtah chunga kingam ahi. 6Nangma kam tah chun themmo nachan sah ahin, kei kahipoi; namuh mama chun nang douna a thu asei ahi. 7Nanghi apeng masapen nahim? Molle lhang ho kisem masanga peng nahim? 8Pathen in guhthima nahilna ho nangai hinam? Chihna chu nangma tum dinga nanei hinam? 9Keihon kahet louvu ipi nahetna, keihon kahet khen theilouvu nangin nahet khen thei um'em? 10Keiho langa hin upa tah tah samkangsa apangun amaho chu napa sanga hatah a tahjo ahiuve. 11Pathen in nalhamon chu nang dinga neo behseh a ham? Nemma athusei chu lhing joulou ham? 12Naki gellhah na chu ipin nalah mang peh ham? Na khomu theina chu ipin alhahsam sah ham? 13Hiti chun Pathen dounan nakihei mangin, chule hitobang thuphalou hi naseije. 14Thithei khat tou chu theng theijem? Numeija pengdoh mihem chu adih a umthei ding ham? ✡ 15Ven Pathen in vantil ho jeng jong atahsan joupoi, ama mitmu in vanho jeng jong athengsel poi. 16Chonsetna dimho leh lheplhahna dimho leh gitlouna a dangchah ho chu ichan geijin thenna alhasam tadem? 17Kathusei nangai dingle keiman navet sah inge, ken katahsa tah a kahet ho a kon in nadonbut inge. 18Apa teuva konna hiche thu mama hi ajah uva, michingho hetsah dungjuija hiche hi kisudet ahi. 19Gamdang miho hunglhun masang sot laipeh a chu koiham khat hitobang ho a konna gamkhat ana kipe ahi. 20Migiloupa chu ahinkho lhum keijin nat gim genthei thoh in akipeh peh in lungsetna neilou ho dingin hahsat gentheina kum jat tamtah kikhol ahi. 21Ama banga kichat tijatna O aging jingin chule nikho phaho jeng jong misumang hon ahin delkhum dio kichatnan aneije. 22Muthim lah a chedoh ding amahon angapcha pouve, kichatna jeh a amahon tol atha dingu ahi. 23Gamtinah avahle leuvin changlhah hoiya kakimu ding ham tin aseijuve. Amahon amanthah nadiu nikho anaije ti aheuve. 24Muthim nikhon amaho chu akichatsah uvin, galkon dinga kigong lengpa bangin lung gentheina leh lung natna dimset in ahing uve. 25Hatchungnung pa asuhboh uva Pathen akhut u athin khum jeh u chun, 26Alummu hattah chu akichoijun amadou nan isah loutah in anokhum jiuve. 27Migiloute chu athaovun chule sumle paijin akhangtou cheh cheh un akongu jong athaovin apom doh sah uve. 28Ahinlah akhopi hou hi kisumang thah ding ahin, amaho chu dalhahsa ingemma hung chenguva; sotlhuh ding sa a um cheh ahiuve. 29Ahaosat nau jong sot tapontin, anei agou hou sot ponte; anei agouho jong kolmong geijin hung kikho khong soh taponte. 30Muthim lah a konin jamdoh thei pouvin tin, ajih hung dondoh ho jong nisan halgop intin chule Pathen hu haikhum chun amaho asuhmang ding ahi. 31Haosatna homkeu tahsanna chun amaho leh amaho kilhem lha sot tapou vintin, amaho dinga akipaman u chu ahomsa hiding ahi. 32Ahinkhou hoilai tah le thingbah kilhamlha bangin kisat lhauvin tin abah hou jong avellin hung engdoh kit tapou vinte. 33Amaho chu lengpi phung aga matah a kilou lha bangle Olive thingphung aga kisem masanga apah pullha bang diu ahi. 34Ijeh inem itile Pathen neiloute chu ahomkeu ahiuvin, nehguh chahguh a haosa ho in chu kavam ding ahi. 35Amahon boina naovop bangin avop un chule gitlouna ahing doh jiuve. Anaobu houvin joule nal asodoh uve.